KANSI mukumvwa tyani mukalondela kalata yolimbikisha kufumila kuli shamwali wanu? Wophunzila Wacikhristu Timoteyo elondelako kalata yoteti kufumila kwa Paulo, yamene lomba ni buku ya m’Baibo yuitiwa kuti 2 Timoteyo. N’zosakaikisha kuti pecilondela kalata iyi, epeza malo abata kuti aŵelenge zecimulembela Paulo. Payakine Timoteyo enzozikonsha kuti: ‘Kansi umoyo wake uli tyani? Kansi pali malangizo yakufuna kunipasa okhuza utumiki wangu? Ko malangizo ali mu kalata iyi aniyavye pa utumiki wangu noyavyako ayakine?’ Monga ni mwatitiphunzilile, Timoteyo epeza mayankho a makonsho aya m’kalata yamene iyi. M’nkhani ino, tilaŵizhyane malangizo oyavya amene opezeka m’kalata iyi.

Timoteyo peciyamba kuŵelenga kalata yamene iyi, eyamba kumvwisha kuti Paulo omudela nkhaŵa ngako. Niye cifukwa cake enzomuita kuti “mwana wangu wokondeka.” (2 Tim. 1:2) Timoteyo pecilondela kalata iyi mu 65 C.E., payakine enze na vyaka vopitilila pa 30. Pa nthawi iyi enze kale mkulu wokhwima mwauzimu apo n’kuti waseŵenzapo kale na Paulo kwa vyaka vopitilila 10 nophunzila zinyinji kwa yove.

Cuoneka kuti Timoteyo elimbikishiwa ngako peeciziŵa kuti Paulo opitilizhya kupilila mavuto mokhulupilika. Yove enze womangiwa na macheni m’jele ku Roma ndipo enzoyembekezela kupaiwa. (2 Tim. 1:15, 16; 4:6-8) Timoteyo eona kuti Paulo ni wotang’a mtima cifukwa emulembela kuti: “Nupitilizhya kupilila vinthu vonse.” (2 Tim. 2:8-13) Molingana na Timoteyo, kupilila kwa Paulo kungatilimbikishe nase.

Paulo elimbikisha Timoteyo kuti akoona utumiki wake monga mwai ukulu. Paulo enzofuna kuti Timoteyo ‘akosonkhelela mphaso yake yofumila kwa Mulungu monga ni mulilo.’ (2 Tim. 1:6) Paulo eseŵenzesha mau Acigiriki akuti khaʹri·sma amene otanthauza “mphaso.” Mau Acigiriki amene aŵa otanthauza mphaso ya mahala yamene munthu opasiwa cifukwa ca kuwama mtima. Timoteyo elondela mphaso iyi  pecisankhiwa kuti akotumikila mumpingo m’njila yapadela.​—1 Tim. 4:14.

Kansi Paulo enzolimbikisha Timoteyo kuiseŵenzesha tyani mphaso iyi? Peciŵelenga mau akuti “ukoisonkhelela monga ni mulilo”, cuoneka eganizila za mulilo wamene ŵanthu okozhya ku mang’anda ŵao wamene nthawi ziyakine ukondozima patontho-patontho. Mulilo kuti upitilizhye kuyaka mwamphamvu ufunika kuusonkhelela. Dikishonali iyakine yelaŵila kuti vebu Yacigiriki (a·na·zo·py·reʹo) yeciseŵenzesha Paulo, yutanthauza “kucita khama pa nchito.” Tetyo Paulo enzolimbikisha Timoteyo kuti ‘akoika mtima wake pa utumiki.’ Masiku ŵano, nase tufunika kucita khama pa utumiki wasu.

Peenzoŵelenga kalata yofumila kwa shamwali wake, Timoteyo epeza soti mfundo iyakine yomuyavya kuti apambane pa utumiki wake. Paulo elemba kuti: “Ukosunga luweme cuma capadela cili m’manja mwako, moyavyiwa na mzimu utuŵa wamene uli muli seo.” (2 Tim. 1:14) Kansi Timoteyo esungizhyiwa cinji? M’vesi yapavuli, Paulo enzolaŵila za “mau acendi” opezeka m’Baibo. (2 Tim. 1:13) Monga mtumiki Wacikhristu, Timoteyo enzofunika kulalikila cendi mumpingo na m’gawo yake. (2 Tim. 4:1-5) Kuyangizhyila apo, Timoteyo eikiwa kunkhala mkulu kuti akoŵetela mbelele za Mulungu. (1 Pet. 5:2) Kuti asunge luweme cuma cenze m’manja mwake, camene ni cendi ceenzofunika kulalikila kwa ayakine, Timoteyo enzofunika kudalila mzimu utuŵa na Mau a Mulungu.​—2 Tim. 3:14-17.

Masiku ŵano, tapasiwa cendi camene tufunika kuuzhyako ayakine mu utumiki. (Mat. 28:19, 20) Tingaoneshe kuyamikila cendi camene ici mwa kupitilizhya kupemphela nophunzila Mau a Mulungu nthawi zonse. (Aro. 12:11, 12; 1 Tim. 4:13, 15, 16) Payakine tutumikila monga mkulu olo tili mu utumiki wanthawi zonse. Kuti ticite luweme pa utumiki wasu, tufunika kunkhala olicefya nodalila thandizo ya Mulungu. Tetyo, tingateteze utumiki wasu mwa kuuyamikila nodalila thandizo ya Yehova.

Utumiki wecilondela Timoteyo wenzoyangizhyilapo kuphunzisa ayakine. Niye cifukwa cake Paulo elimbikisha Timoteyo kuti: “Zinthu zewecimvwa kuli neo . . . , uziphunzise kwa ŵanthu okhulupilika amene nao ankhale oyenelela luweme kuphunzisa ayakine.” (2 Tim. 2:2) Paulo enzokumbusha Timoteyo kuti ofunika kuphunzisa ayakine zinthu zonse zeciphunzila. Nao oyanganila mumpingo masiku ŵano ofunika kuyesayesa kuphunzisa ayakine. Woyanganila muweme ofisa lini zinthu zakuziŵa zokhuza nchito. M’malomwake, ophunzisa ayakine kuti nao akakwanishe kucita nchito yamene iyi. Ove oyopa lini kuti ŵanthu ŵakuphunzisa angankhale na maluso kupambana ove. Tetyo, woyanganila ophunzisa lini tyala zokhuza nchito. Yove oyavya soti ŵanthu ŵakuphunzisa kuti ankhale Akhristu okhwima mwauzimu. Mwa njila yamene iyi, “ŵanthu okhulupilika” ŵakuphunzisa, angayavye ngako mpingo.

Mosakaikila Timoteyo eyamikila ngako kalata yecilondela kufumila kwa Paulo. N’zoonekelatu kuti enzoŵelenga malangizo aŵa mowelezhyawelezhya nosinkhasinkha kuti aone mwangayaseŵenzeshele.

Nase tufuna kuseŵenzesha malangizo aŵa. Kansi tingaŵaseŵenzeshe tyani? Tufunika kuyesayesa kusonkhelela mphaso yatili nayo monga ni mulilo, kuteteza cuma capadela camene cili m’manja mwasu nophunzisa ayakine vinthu vonse vatuziŵa. Ngati tucita izi, ‘tikwanilishe mbali zonse za utumiki wasu’ monga ni mwecilaŵilila Paulo kuuzhya Timoteyo.​—2 Tim. 4:5.