ŁAʼ áhą́dígo bił ałkʼis nílínígíí nichʼįʼ íʼiiłʼįįhgo haitʼéego baa nitsíníkees łeh? Íhoołʼaahii Timothy éí yilʼaadii Paul ákótʼéego łahda bichʼįʼ íʼiilaa, éí Diyin Bizaad biiʼ naaltsoos 2 Timothy wolyé. Timothy hakʼis hachʼįʼ íʼiilaaígíí kʼadę́ę jíídóołtah jinízingo doo íitsʼaʼígi hajinitá. Timothy shı̨́ı̨́ éí kótʼéego nitsékees. Paul haash dayitʼéego hoł hazʼą́, shinaanish shaa yílyáii díí átʼéego álʼı̨́ haʼnínígíí daatsʼí łaʼ yee shił ahoʼniilneʼ. Áádóó naʼnishtingi áká anáshwoʼígi ałdóʼ. Díí naaltsoos biiʼ éí Timothy yínaʼádééłkid yę́ę, nizhónígo bił ííshjání ádaalyaa. Áko díí átʼéego biʼdooʼniidígíí łaʼ áłtsé hazhóʼó dadíníilʼįįł.

Paul hachʼįʼ íʼiilaaígíí tʼóó jíʼníiłtaʼgo tʼáá bééhózínígo ayóóʼáhóʼní. Paul éí kóhółní “shiyeʼ ayóóʼóóshʼníinii.” (2 Tim. 1:2) Díí daatsʼí 65 C.E. yihah góneʼ Timothy tádiin binááhaigo bichʼįʼ éʼélyaa, áko tʼáá íídą́ą́ʼ elder nilı̨́. Paul éí 10 nááhaidóó bilááh bił nijishnishgo ląʼí bitsʼą́ą́dóó íhojiiłʼą́ą́ʼ.

Yilʼaadii Paul bichʼįʼ nahwiiʼnáago yichʼįʼ haʼólnínígíí éí shı̨́ı̨́ Timothy chánah ábiilaa. Paul éí Romedi awáalyaaí jílı̨́įgo dazdootsaałgo baa hoolzhiizhígíí hoł bééhózin. (2 Tim. 1:15, 16; 4:6-8) Paul doo náldzidgóó “tʼáá ałtsoní bichʼįʼ haʼííníshní” nínígíí éí Timothy yił ííshjání áyiilaa. (2 Tim. 2:8-13) Paul haʼólnínígíí yinahjįʼ Timothy bidziilgo ábiilaa, éí nihí ałdóʼ ákónihidoolíiłgo átʼé.

Paul éí Timothy, God bá nanilʼaʼ doo biniyé naanish naa yílyáii yéigo nił nílı̨́į doo hodííniid. “Diyin God yee nikʼijisdliʼgo niih yiyííláhígíí nídiiłtłáadgo yéego diltłiʼgo íínísin” hodííniid yę́ę ałdóʼ bikʼeh ázhdoonííł hóʼní, Paul. (2 Tim. 1:6) Gríikjí saad khaʹri·sma éí niih yiyííláhígíí jiníigo óolyé, éí Paul choyoosʼįįd. Áko díí Gríikjí saad áhyiłnínígíí éí haa yíílyáii doo bą́ą́h jílı̨́į da ndi, hó yileehgo áhyiłní. Timothy éí áłah náʼádleehgi nijilʼaʼ doogo biniyé bikʼi hodiiniiʼgo naanish haa yílyá.—1 Tim. 4:14.

Timothy haa yílyáhígíí éí haitʼéego chojidoołʼįįł? Timothy éí “nídiiłtłáadgo yéego diltłiʼgo íínísin” hodooʼniid yę́ę shı̨́ı̨́ éí  hooghangi kǫʼ tsííd siką́ągo bił niʼjitsigo éí yéigo diltłiʼígíí áhyiłníigo baa tsídzízkééz. Éí dictionary biiʼ Gríik kʼehjí verb (a·na·zo·py·reʹo) wolyéhígíí ákótʼéego yaa yáłtiʼ, éí honaanish haa yílyáhígíí ayóo hoł nilı̨́įgo ájósingo áhyiłní. Dííshjı̨́įdi ałdóʼ tʼáá ákótʼéego nideilʼaʼgi yéigo bídaniidlı̨́įgo deiyíníilníish doo.

Áádóó hakʼis hachʼįʼ íʼiilaaígíí náájííltaʼgo, Timothy éí nahojilneʼgi Paul ánáádooʼniidígíí háká anáádoolwoł, éí kóní: “Éí tʼáá aaníinii bee naʼahoosdlíiʼii níłchʼi diyinii nihiiʼ dahólóonii bee baa áhólyą́.” (2 Tim. 1:14) Éí haʼátʼíí bee hakʼihosdliʼ? Timothy haʼátʼíí ayóó ílı̨́įgo haa yílyá? Díí verse 13 biiʼ saad “tʼáá ákogi átʼéii” bínaniníłtą́ąʼii yínítąʼ hałnínę́ę éí Diyin Bizaad biiʼdóó tʼáá aaníinii yaa yáłtiʼ. (2 Tim. 1:13) Timothy Diyin Bizaad biiʼdóó tʼáá aaníinii bee nazhnitinígíí éí brothers dóó sisters áłah náʼádleehgi nazhnitin, áádóó diné ákweʼé kééhatʼíinii ałdóʼ. (2 Tim. 4:1-5) Áádóó Timothy God bidibé baa áhojilyą́ą dooleeł biniyé elder áhoʼdiilyaa. (1 Pet. 5:2) Timothy éí ílı̨́įgo naanish haa yílyáii yéigo baa áhojilyą́ą dooleeł. Tʼáá aaníinii bee naʼjinitinígíí éí Jiihóvah biníłchʼi diyinii dóó bizaadígíí baʼjólíigo tʼéiyá doo.—2 Tim. 3:14-17.

Dííshjı̨́įdi ałdóʼ tʼáá ákótʼéego tʼáá aaníinii bee ndaʼnitinígíí nihaa áhódlíigo nihąąh niilyá. (Matt. 28:19, 20) Díí tʼáá aaníinii ayóó ílı̨́įgo bee ndaʼnitinígíí éí tʼáá áłahájįʼ sodadiilzin dóó Diyin Bizaad deiyíníiltaʼgo éí baa ahééh daniidzingo ánihósin doo. (Rom. 12:11, 12; 1 Tim. 4:13, 15, 16) Áádóó elder doodaiiʼ full-time ministry shı̨́ı̨́ ałdóʼ daʼniitahgo átʼé. Ákótʼéego naanish nąąh niilyáhígíí biniinaa aʼohgo ádííníilzin, ákótʼéego éí God baʼííníidlíhígíí bééhózíní doo. Díí ayóó ílı̨́įgo nihąąh niilyáhígíí Jiihóvah nihíká adoolwołgi baʼííníidlíigo yéigo baa áhwiilyą́ą doo.

Díí naanish Timothy baa yílyáhígíí doo tʼáá bí tʼéiyá bídéétʼiʼ da. Náánáłaʼ bee nináádíníítı̨́ı̨́ł bidooʼniid. Éí biniinaa Paul éí Timothy kóyidííniid: “Naʼnishtingo disínítsʼą́ąʼii diné badaʼahódlíii baa danisįįh. Náánáłaʼ diné nideinitin dooleełgo yídaneelʼánígíí baa danisįįh.” (2 Tim. 2:2) Timothy éí bibrothers yitsʼą́ą́dóó íhoołʼaah doo, áádóó náánáłaʼ bibrothers nináánéiinitin doo. Áko Christian congregationgi tʼáá ałtso elders danilínígíí ałdóʼ tʼáá ákótʼéego ádajiʼdoolííł. Díí elders danílínígíí bindaanish yéédahósingi doo yaa danichįʼgóó náánáłaʼ hazhóʼó naanish ádeidoolíiłgi yee nideinitin łeh. Azhą́ shı̨́ı̨́ biláahgo yee dadooleeł ndi. Áko díí elder éí náánáłaʼ doo tʼóó bikiinígo neidínóotı̨́įł da, ndi éí tʼáá ákogi éʼétʼé dóó hóyą́ągo nitsékees dooleełígíí bee bíká aníjílwoʼ doo. Áko “diné badaʼahódlíii” nilı̨́į doogi nazhneeztą́ąʼgo éí áłah náʼádleehgi yéigo áká análwoʼ doo.

Timothy éí Paul ayóóʼáhóʼníigo hachʼįʼ íʼiilaaígíí shı̨́ı̨́ ayóó hoł nilı̨́. Bééhózínígo shı̨́ı̨́ díí átʼéego hodiʼníigo bee háká aʼoolwodígíí díkwíidida nijííłtaʼ, éí binahjįʼ naanish haa yílyáhígíí ayóó bízhneedlı̨́įgo bikʼeh áʼjiilaa.

Nihí ałdóʼ tʼáá ákótʼéego bidaʼdiilnííł daniidzin. Éí haitʼéego? Naanish nihaa yílyáhígíí nídidiiltłiʼ áádóó yéigo diltłiʼgo áníilzin doo, áádóó tʼáá aaníinii bee nihaa hojoosdliʼígíí yéigo baa áhwiilyą́ą doo. Áádóó bééhoniilzinígíí nááná háida bee nináádíʼníitı̨́ı̨́ł. Áko Paul, Timothy “haneʼ yáʼátʼéehii baa nahólneʼ, niʼdoolʼaadígíí biʼílééh” yidííniid yę́ę, nihí ałdóʼ bidaʼdiilnííł.—2 Tim. 4:5.