ДЕ ’МБАЛ дӕм писмо куы ныффыссы, уӕд нӕ фӕцин кӕныс? Апостол Павел дӕр Тимофеймӕ ныффыста писмо. Уыцы писмо ис Библийы, хуыйны Дыккаг фыстӕг Тимофеймӕ. Тимофей йӕ куы райста, уӕд ӕй, хӕрзаг, фӕндыд тагъддӕр сабыр бынат ссарын, цӕмӕй йӕ зынаргъ ӕмбалы фыстӕг бакастаид. Ӕвӕццӕгӕн, хъуыды кодта: «Цымӕ Павел куыд у? Ницы хорз уынаффӕтӕ мын ныффыста, мӕ хӕстӕ хуыздӕр куыд ӕххӕст кӕнон, уый фӕдыл? Йӕ фыстӕг мын нӕ баххуыс кӕндзӕн, цӕмӕй рӕстдзинад хуыздӕр амонон ӕмӕ уыцы хъуыддаджы иннӕтӕн дӕр ӕххуыс кӕнон?» Тимофей уыцы фыстӕджы йӕ фарстатӕн дзуапп ссардта, стӕй ма дзы бирӕ хорз хъуыдытӕ бакаст. Ныртӕккӕ аныхас кӕндзыстӕм, цы хорз уынаффӕтӕ дзы ис, уыдонӕй цалдӕрыл.

Тимофей Павелы фыстӕг кӕсын райдыдта. Йӕ фыццаг рӕнхъытӕй дӕр бӕрӕг уыд, Павел ӕй тынг кӕй уарзта. Схуыдта йӕ «уарзон хъӕбул» (2 Тим. 1:2). Тимофейыл уӕд 30 азӕй фылдӕр цыдаид (фыстӕг райста н. э. 65 азмӕ ’ввахс). Ӕмӕ кӕд ӕрыгон уыд, уӕддӕр уыд фӕлтӕрдджын хистӕр нӕлгоймаг. Павелимӕ 10 азӕй фылдӕр фӕлӕггад кодта, ӕмӕ бирӕ цӕуылдӕрты сахуыр.

Павел уыд Ромы ӕмӕ уыд ахст. Хаст ын ӕрцыд мӕлӕты тӕрхон, ӕмӕ уыцы тӕрхон хъуамӕ тагъд сӕххӕст кодтаиккой. Фӕлӕ йӕ фыстӕгӕй бӕрӕг уыд, дарддӕр дӕр фидар ӕмӕ иузӕрдион кӕй у (2 Тим. 1:15, 16; 4:6–8). Стӕй ма бӕрӕг уыд, цы йӕм ӕнхъӕлмӕ кӕсы, уыдӕттӕй кӕй нӕ тӕрсы. Уый ныффыста: «Алцӕмӕн дӕр быхсын» (2 Тим. 2:8–13). Тимофейӕн уыдӕттӕ йӕ ныфсыл ныфс куыннӕ бафтыдтаиккой. Ӕмӕ-иу мах дӕр Павелы фидардзинадыл куы хъуыды кӕнӕм, уӕд-иу махӕн дӕр нӕ ныфсыл ныфс бафтдзӕн.

Павел Тимофейӕн фӕдзӕхста, цӕмӕй аргъ кодтаид, йӕ бар ын кӕй бакодтой, уыцы хъуыддагӕн. Ныффыста йӕм, зӕгъгӕ, дам, дӕ «Хуыцау кӕмӕй схайджын кодта, уыцы курдиаты зынг ахуыссын ма бауадз» (2 Тим. 1:6). Ам дзырд «курдиат»-ӕй тӕлмац ӕрцыд грекъаг дзырд ха́рисма. Ацы дзырд сӕйраджыдӕр амоны, цӕйдӕр тыххӕй нӕ, фӕлӕ ӕнӕуи цы балӕвар кодтой, ахӕм цӕмӕдӕр. Тимофей ӕвзӕрст ӕрцыд сӕрмагонд лӕггадӕн, цӕмӕй ӕмбырдтӕн ӕххуыс  кодтаид. Ӕмӕ афтӕмӕй схайджын уыцы курдиатӕй (1 Тим. 4:14).

Павел Тимофеймӕ афтӕ кӕй ныффыста, уыцы курдиаты зынг ахуыссын ма бауадз, зӕгъгӕ, уымӕй йӕ цы зӕгъын фӕндыд? Уыцы ныхӕстӕ кӕсгӕйӕ Тимофейӕн, ӕвӕццӕгӕн, йӕ цӕстытыл ауад, хӕдзӕртты-иу цы арт сыгъди, уый. Цыренӕй-иу куы нал сыгъд, уӕд-иу дзы зынгтӕ мынӕг сыгъд кодтой. Ӕмӕ-иу цӕмӕй арт ногӕй ссыгъдаид, стӕй тынгдӕр ӕндӕвтаид, уый тыххӕй-иу хъуыди зынгтӕ басхъауын. Иу дзырдуаты фыст ис, Павел цы грекъаг мивдисӕгӕй спайда кодта (аназопире́о), уымӕн йӕ хъуыды кӕй у «ногӕй ссудзын, ӕндзарын, зынгтыл фу кӕнын, цӕмӕй арт ссудза». Ӕмӕ ахӕсгӕ хуызы амоны, кӕмӕндӕр йӕ зӕрдӕйы зынг кӕй ссудзы, ног тыхтӕ дзы кӕй бацӕуы ӕмӕ та хъуыддагмӕ зӕрдиагӕй кӕй бавналы. Ӕндӕр ныхасӕй, Павел Тимофейӕн фӕдзӕхста: «Дӕ бар чи ис, уыцы хъуыддаджы дӕ удӕй арт уадз!» Ӕмӕ мах дӕр хъуамӕ афтӕ кӕнӕм, ома хъуамӕ зынгзӕрдӕйӕ лӕггад кӕнӕм.

Тимофей ма йӕ зынаргъ ӕмбалы фыстӕджы ноджыдӕр иу хорз уынаффӕ ссардта. Павел ӕм ныффыста: «Нӕ мидӕг цы сыгъдӕг тых цӕры, уый фӕрцы хъахъхъӕн, дӕ бар чи ис, уыцы хӕзна» (2 Тим. 1:14). Йӕ бар цавӕр хӕзна уыд? Уый размӕ 13-ӕм стихы Павел скодта «раст ныхӕсты» кой, ома, Фыстады чи ис, уыцы рӕстдзинады кой (2 Тим. 1:13). Тимофей чырыстон кӕй уыд, уымӕ гӕсгӕ хъуамӕ ӕмбырды дӕр ӕмӕ иннӕ адӕмӕн дӕр рӕстдзинад амыдтаид (2 Тим. 4:1–5). Стӕй ма уыди хистӕр нӕлгоймаг дӕр, ӕмӕ хъуамӕ Хуыцауы дзугмӕ кастаид (1 Пет. 5:2). Ӕмӕ цӕмӕй уыцы хӕзна, ома, иннӕтӕн кӕй хъуамӕ амыдтаид, уыцы рӕстдзинад, хъахъхъӕдтаид, уый тыххӕй хъуамӕ йӕ ныфс дардтаид Йегъовӕйы сыгъдӕг тыхыл ӕмӕ йӕ Ныхасыл (2 Тим. 3:14–17).

Махӕн дӕр нӕ бар ис хӕзна – иннӕтӕн кӕй амонӕм, уыцы рӕстдзинад (Матф. 28:19, 20). Ӕмӕ цӕмӕй уыцы хӕзнайӕн алкӕддӕр аргъ кӕнӕм, уый тыххӕй хъуамӕ Хуыцаумӕ ӕппынӕдзух кувӕм ӕмӕ Библи алы бон дӕр иртасӕм (Ром. 12:11, 12; 1 Тим. 4:13, 15, 16). Уымӕй уӕлдай ма чидӕр лӕггад кӕны хистӕр нӕлгоймагӕй, чидӕр ӕххӕстрӕстӕг лӕггадгӕнӕг у. Ӕмӕ нӕм кӕд ахӕм кад ӕрхауд, уӕд хъуамӕ уӕм сӕрныллӕг ӕмӕ нӕ ныфс Хуыцауыл дарӕм. Афтӕмӕй равдисдзыстӕм, Йегъовӕ нын нӕ бар кӕй бакодта, уыцы хӕзнайӕн кӕй аргъ кӕнӕм.

Тимофейӕн ма йӕ хӕс уыд иннӕтӕн дӕр амонын, йӕхӕдӕг цы арӕзта, уый. Павел ын фӕдзӕхста: «Мӕнӕй цы фехъуыстай, уыдӕттӕ бацамон ӕууӕнкджын адӕймӕгтӕн, ӕмӕ уӕд уыдонӕн дӕр сӕ бон уыдзӕн уыдӕттӕ иннӕтӕн амонын» (2 Тим. 2:2). Тимофей йӕхӕдӕг цӕуыл сахуыр, уыдӕттӕ хъуамӕ амыдтаид иннӕ ӕфсымӕртӕн дӕр. Ӕмӕ абон дӕр чырыстон цӕстдарджытӕй алчидӕр хъуамӕ афтӕ кӕна. Хорз цӕстдарӕг иннӕтӕн йӕ зонындзинӕдтӕ нӕ фӕхӕлӕг кӕны. Уый иннӕ ӕфсымӕрты дӕр фӕахуыр кӕны, йӕ бар цы хӕс ис, уый ӕххӕст кӕнын. Уый нӕ фӕтӕрсы, иннӕтӕ уымӕй фылдӕр кӕй зондзысты кӕнӕ уыцы хъуыддагмӕ хуыздӕр кӕй арӕхсдзысты, уымӕй. Ӕмӕ сӕ уӕлӕнгӕйтты нӕ фӕахуыр кӕны. Фӕфӕнды йӕ, цӕмӕй сын баххуыс кӕна ӕмбаргӕйӕ ӕмӕ уӕззау зондӕй архайынӕн, ома цӕмӕй суой фӕлтӕрдджын чырыстӕттӕ. Ӕмӕ уӕд, кӕй сахуыр кӕны, уыцы «ӕууӕнкджын адӕймӕгтӕ» ӕмбырдӕн вӕййынц стыр ӕххуыс.

Тимофейӕн Павелы фыстӕг тынг зынаргъ уыдаид. Ӕвӕццӕгӕн та-иу ӕй ногӕй бакаст ӕмӕ-иу хъуыды кодта, цы хорз уынаффӕтӕ дзы ис, уыдон ын йӕ хӕстӕ хуыздӕр ӕххӕст кӕнынӕн куыд баххуыс кӕндзысты, ууыл.

Мах дӕр фӕнды уыцы уынаффӕтӕм гӕсгӕ архайын. Цӕй ӕмӕ, Хуыцау нӕ кӕмӕй схайджын кодта, уыцы курдиаты зынг ахуыссын ма бауадзӕм, нӕ бар чи ис, уыцы хӕзна хъахъхъӕнӕм ӕмӕ-иу иннӕтӕн дӕр фӕхай кӕнӕм, нӕхӕдӕг цы базыдтам ӕмӕ цӕуыл сахуыр стӕм, уыдӕттӕй. Ӕмӕ уӕд нӕ лӕггады рохуаты ницы уадздзыстӕм (2 Тим. 4:5).