ӔВӔДЗИ дин хъӕбӕр ӕхцӕуӕн уодзӕй, дӕ хуарз ӕмбал дӕмӕ финстӕг ку ӕрбарвета, уӕд. Ӕма Тимофейӕн дӕр гъе уотӕ ӕхцӕуӕн адтӕй, Павел имӕ ку ниффинста, уӕд. Еци финстӕг Библимӕ хаст ӕрцудӕй ӕма хуннуй Дуккаг финстӕг Тимофеймӕ. Тимофей еци финстӕг ку нӕма райхалдта, уӕд, ӕвӕдзи, сагъӕс кодта: «Цума мӕмӕ Павел ци ниффинста? Ӕвӕдзи мин ӕ хабӕрттӕ дӕр ракодта. Ести унаффӕ дӕр куд нӕ ниффинстайдӕ, мӕ ихӕстӕ куд ӕнхӕст кӕнон ӕма иннети ахур кӕнунмӕ хуӕздӕр куд арӕхсон, уой фӕдбӕл». Еци финстӕги берӕ хуарз гъудитӕ адтӕй. Гъӕйдӕ си мах дӕр цалдӕремӕ ӕркӕсӕн.

Тимофей еци финстӕг кӕсун куддӕр райдӕдта, уотӕ ’й балӕдӕрдтӕй, Павел ӕй куд берӕ уарзуй, уой, уомӕн ӕма ’й исхудта «мӕ уарзон фурт» (2 Тим. 1:2). Еци финстӕг райста нӕ эри еу 65 анзи. Уӕд ибӕл 30 анземӕй минкъий фулдӕр цудӕй ӕма уӕдмӕ фӕлтӕрдгун хестӕр нӕлгоймаг иссӕй. Тимофей Павели хӕццӕ еу дӕс анземӕй фулдӕр фӕллӕггадӕ кодта ӕма си берӕ цӕбӕлдӕрти исахур ӕй.

Тимофейӕн, ӕвӕдзи, хъӕбӕр ӕхцӕуӕн адтӕй, Павел фӕлварӕнти федар ке лӕууй, кӕд ахӕстдони адтӕй ӕма ин мӕлӕти тӕрхон рахастонцӕ, уӕддӕр (2 Тим. 1:15, 16; 4:6–8). Павелӕн ӕ дзурдтӕй, «алцӕмӕндӕр бухсун», зӕгъгӕ, бӕрӕг адтӕй, ӕ нифс федар ке ӕй, е (2 Тим. 2:8–13). Аци дзурдтӕ абони мах дӕр хъӕбӕр федар кӕнунцӕ, кӕддӕр Тимофеййи куд федар кодтонцӕ, уотӕ.

Павел Тимофеййи разӕнгард кодта, цӕмӕй аргъ кодтайдӕ, Хуцау ин ци гъуддаг баихӕс кодта, уомӕн. Павел имӕ финста, дӕ искурдиади зинг, дан, «ниххуссун ма бауадзӕ» (2 Тим. 1:6). Ами Павел испайда кодта грекъаг дзурдӕй ха́рисма. Еци дзурд комкоммӕ нисан кӕнуй «адӕймагӕн ести уотид ку балӕвар кӕнунцӕ, ци искодта кенӕ ин ци бантӕстӕй, уой туххӕй нӕ, фал». Тимофей дӕр уӕхӕн лӕварӕй исхайгин ӕй, ӕмбурди ин кадгин ихӕстӕ ку баихӕс кодтонцӕ, уӕд (1 Тим. 4:14).

Тимофей еци лӕварӕй куд гъӕуама пайда кодтайдӕ? Дзурдтӕ «зинг ниххуссун ма  бауадзӕ», зӕгъгӕ, ку бакастӕй, уӕд, ӕвӕдзи, ӕ цӕститӕбӕл рауадӕй, аги бунмӕ зингтӕ куд фӕццӕфсунцӕ, е. Цӕмӕй хӕдзарӕ дзӕбӕх исгъар уа, уой туххӕй еци зингтӕ иссодзун фӕгъгъӕуй. Еу дзурдуати куд финст ӕй, уотемӕй Павел ци грекъаг дзурдӕй испайда кодта, аназопире́о, зӕгъгӕ, е нисан кӕнуй «иссодзун, исцӕфсун кӕнун» кенӕ ба «иснӕуӕг кӕнун, нӕуӕг цард бауадзун». Зӕгъӕн ес, ӕма Павел Тимофеййи разӕнгард кодта: «Зингзӕрдӕй ӕнхӕст кӕнӕ, ци гъуддаг дин баихӕс кодтонцӕ, уой!» Мах дӕр гъӕуама гъе уотӕ зингзӕрдӕй архайӕн игъосун кӕнуни гъуддаги.

Павел ма Тимофеййӕн уӕхӕн унаффӕ равардта: «Нӕ медӕг ци сугъдӕг хъаурӕ цӕруй, уой фӕрци гъӕуай кӕнӕ, дӕ барӕ ка ӕй, еци хӕзна» (2 Тим. 1:14). Цума ин ци бабарӕ кодтонцӕ? Ӕ сӕрмӕ еци стихи Павел Хуцауи Дзурди рӕстдзийнадӕ исхудта «раст дзурдтӕ» (2 Тим. 1:13). Еци рӕстдзийнадӕ Тимофей гъӕуама амудтайдӕ ӕмбурди хуӕртӕ ӕма ӕнсувӕртӕн, удта иннӕ адӕнӕн дӕр (2 Тим. 4:1–5). Тимофей ма хестӕр нӕлгоймаг дӕр адтӕй ӕма Хуцауи уӕриккитӕмӕ ӕ цӕстӕ дардта (1 Пет. 5:2). Цӕмӕй ӕ бон адтайдӕ, ӕ барӕ ин ци бакодтонцӕ, (иннетӕн ке амудта, еци рӕстдзийнадӕ) уой гъӕуай кӕнун, уой туххӕй гъӕуама ӕ зӕрдӕ дардтайдӕ Йегови сугъдӕг хъаурӕбӕл ӕма ӕ Дзурдбӕл (2 Тим. 3:14–17).

Абони Йеговӕ махӕн дӕр ӕ рӕстдзийнадӕ нӕ барӕ бакодта ӕма еци рӕстдзийнадӕ гъӕуама иннетӕн дӕр амонӕн (Матф. 28:19, 20). Гъӕуама макӕд иронх кӕнӕн, цӕхуӕн устур аргъ ин ес, уой. Уой туххӕй ба нӕ гъӕуй алкӕддӕр Йеговӕмӕ ковун ӕма ин ӕ Дзурд ӕртасун (Ром. 12:11, 12; 1 Тим. 4:13, 15, 16). Мах астӕу дӕр ес, ӕ барӕ кадгин ихӕстӕ кӕмӕн бакодтонцӕ, уӕхӕнттӕ, зӕгъӕн, хестӕр нӕлгоймӕгтӕ ӕма ӕнхӕстрӕстӕг лӕггадгӕнгутӕ. Уӕхӕн кадгин ихӕстӕ нин ке ес, е нӕ разӕнгард кӕнуй, цӕмӕй сӕрниллӕг уӕн, удта ма иронх кӕнӕн, ӕнӕ Йеговӕй нин ке неци бантӕсдзӕй, уой. Нӕ барӕ нин ци бакодтонцӕ, уомӕн цӕмӕй алкӕддӕр аргъ кӕнӕн, уой туххӕй ма гъӕуама Йегови ӕнхусбӕл дӕр арази кӕнӕн.

Тимофейӕн ма ӕ ихӕс адтӕй, ӕхуӕдӕг ци базудта, уой иннӕ ӕнсувӕртӕн дӕр амонун. Уомӕ гӕсгӕ ’й апостол Павел разӕнгард кодта: «Мӕнӕй ци фегъустай, уони байамонӕ ӕууӕнкгун адӕймӕгтӕн, ӕма уӕд уонӕн дӕр сӕ бон уодзӕй уой иннетӕн амонун» (2 Тим. 2:2). Павел Тимофеййӕн ӕ зӕрдӕбӕл ӕрлӕуун кодта, ӕхуӕдӕг ци базудта, уой ӕнсувӕртӕн дӕр амонун куд ӕхсидзгӕ ӕй, уой. Еци унаффӕ абони хестӕр нӕлгоймӕгтӕмӕ дӕр хауй. Хуарз хестӕр нӕлгоймаг, ци базудта, уой иннетӕн дӕр амондзӕй, цӕмӕй етӕ дӕр сӕ ихӕстӕ дзӕбӕх ӕнхӕст кӕнонцӕ. Удта си еске ӕхецӕй дӕснидӕр ке фӕууодзӕй, уобӕл дӕр нӕ тухсдзӕй. Ӕнсувӕртӕн уӕлӕнгай цидӕртӕ нӕ амондзӕй, фал син ӕнхус кӕндзӕй, цӕмӕй фӕлтӕрдгун киристӕнттӕ исуонцӕ. Уӕхӕн ахури фӕрци «ӕууӕнкгун адӕймӕгтӕ» ӕцӕгӕйдӕр ӕмбурдӕн хӕзнатӕ исуодзӕнцӕ.

Тимофей Павели финстӕгӕн устур аргъ кодта. Ӕвӕдзи, еци унаффитӕ еу ӕма дууӕ хатти нӕ бакастӕй ӕма сагъӕс кодта, куд хуӕздӕр си испайда кӕна, уобӕл.

Мах дӕр фӕндуй Павели финстӕги унаффитӕй пайда кӕнун. Гъӕйдӕ мадта нӕ «искурдиади зинг ниххуссун ма бауадзӕн», нӕ барӕ нин ци бакодтонцӕ, уой гъӕуай кӕнӕн ӕма нӕхуӕдтӕ ци базудтан, уой иннетӕн дӕр амонӕн. Уотемӕй мах дӕр архайдзиан, Павел Тимофеййӕн ке равардта еци унаффӕмӕ гӕсгӕ: «Дӕ лӕггади иронхуати маци уадзӕ» (2 Тим. 4:5).