WOO wurscht du die feelen, wan du von dienen Frint eenen feinen Breef kjrieechst? Timotäus kjrieech mol soonen feinen Breef von dän Apostel Paulus. Nu es dis Breef een Poat von de Bibel un daut es 2. Timotäus. Secha jinkj Timotäus fuaz no eene ruje Städ, om to weeten, waut sien leewa Frint am jeschräwen haud. Veleicht wundad hee: “Weet, woo Paulus daut jeit? Woat hee mie Rot jäwen, waut mie bie miene Oppgowen halpt? Kaun dis Breef mie halpen, noch bäta to prädjen un to lieren un aundre bietostonen?” En Paulus sienen Breef wieren de Auntwuaten bennen fa dise Froagen un noch väl mea goodet. Nu woa wie een bät waut von dän gooden Rot derchnämen, waut doabennen wia.

Aus Timotäus aunfunk, dän Breef to läsen, kunn hee fuaz späaren, daut Paulus om am bekjemmat wia. Ut Leew nand hee am sienen “leewen Sän” (2. Tim. 1:2). Timotäus kjrieech disen Breef ojjefäa aune 65 n. Chr. Hee wia dan aul enne 30 un een erfoarna Eltesta. Hee haud aul äwa tieen Joa met Paulus toop em Deenst jeschauft un väl von dän jelieet.

Daut mott Timotäus väl Moot jejäft haben, aus hee läsd, daut Paulus en Schwierichkjeiten tru uthilt. Paulus wia en Room enjestopt un wudd boolt dootjemoakt woaren (2. Tim. 1:15-16; 4:6-8). Timotäus kunn seenen, daut Paulus nich oppjeef, wiels dee säd: “Ekj [go] dit aula derch” (2. Tim. 2:8-13). Ons kaun Paulus sien Biespel uk stoakjen, soo aus Timotäus.

Paulus säd, daut Timotäus doa nich von vejäten sull, daut dee eene sea wieetvolle Oabeit deed. Paulus wull haben, daut Timotäus “dee Gow fonn Gott kloa aum brenne [hilt]” (2. Tim. 1:6, Reimerbibel). Aus Paulus von dise “Gow” räd, brukt hee daut griechische Wuat khárisma. Dit Wuat jeft auntovestonen, daut eena eene Gow emsonst kjricht un sikj dee nich vedeenen kaun. Timotäus haud dise Gow jekjräajen, aus se am fa eene besondre Oppgow en de Vesaumlunk utjeläst hauden (1. Tim. 4:14).

 Waut sull Timotäus met siene Gow doonen? Aus hee läsd, daut hee dee sull “kloa aum brenne” hoolen, docht hee veleicht aun daut Fia, waut se to jane Tiet tus brukten. Eenjemol wia doa bloos noch Gloot un dan musten dee waut doonen, daut et wada jescheit brend. No een Wieedbuak no bediet daut griechische Wuat anazopyréo, waut Paulus hia brukt, “oppflaumen ooda wada aum brennen moaken ooda pusten, daut et wada Fia jeft”. Doawäajen kaun daut uk bedieden, daut eena wada met Moot aun eene Oppgow naunjeit. Paulus deed Timotäus aulsoo tooroden: “Lot die gaunz en diene Oppgow nenn!” Wie sellen vondoag dän Dach krakjt soo flietich fa Jehova schaufen.

Paulus säd en sienen Breef noch waut, waut Timotäus en sienen Deenst halpen wudd. Hee schreef, daut Timotäus daut bewoaren sull, waut am “derch dän Heiljen Jeist siene Krauft” aunvetrut wia (2. Tim. 1:14). Waut wia daut, waut dän aunvetrut wia? Paulus säd, daut et “de heelsome Wieed” wieren – de Woarheit ut de Schreft (2. Tim. 1:13). Aus Gott sien Deena sull Timotäus de Breeda un Sestren von de Vesaumlunk un uk aundre de Woarheit lieren (2. Tim. 4:1-5). Hee wia uk een Eltesta, waut no Gott siene Häad oppaussen sull (1. Pet. 5:2). Wan Timotäus sikj opp Jehova sienen heiljen Jeist un opp sien Wuat veleet, dan kunn hee daut bewoaren, waut am aunvetrut wia, un aundre dise Woarheit lieren (2. Tim. 3:14-17).

Ons es vondoag dän Dach uk de Woarheit aunvetrut worden, daut wie aundre dee lieren sellen (Mat. 28:19-20). Om daut wie kjeenmol vejäten, woo wieetvoll de Woarheit es, mott wie aunhoolent bäden un pinkjlich Gott sien Wuat studieren (Reem. 12:11-12; 1. Tim. 4:13, 15-16). Veleicht kjenn wie uk een Eltesta sennen ooda een Voltietdeena. Dan sell wie deemootich sennen un ons opp Gott siene Help veloten. Wan wie onse Oppgow väl räakjnen un ons opp Jehova veloten, dan kjenn wie daut bewoaren, waut ons aunvetrut es.

Bie Timotäus siene Oppgowen wia uk met en, daut hee aundre krakjt daut lieed, waut hee deed. Doawäajen säd Paulus to am: “Waut du von mie . . . jehieet hast, daut vetru true Mana aun, dee em Staund sent uk aundre to lieren” (2. Tim. 2:2). Timotäus sull von siene Gloowesbreeda lieren un hee sull uk dee waut lieren. Jieda Oppsechta vondoag dän Dach mott sikj uk aunstrenjen, dautselwje to doonen. Wan een gooda Oppsechta aundre fa eene jewesse Oppgow utlieet, dan helt dee nuscht trigj. Dee lieet dee aules, waut dee weeten motten, daut dee daut fein doonen kjennen. Hee haft nich Angst, daut de aundre daut met eemol bäta doonen kjennen ooda mea weeten aus hee. Doawäajen lieet hee dee nich bloos daut eefache. Hee well deejanje, waut hee utlieet, halpen, daut dee derchjedocht sent un Sachen vestonen kjennen un daut dee erfoarne Christen woaren. Doaderch kjennen dise “true Mana” noch väl mea fa de Vesaumlunk doonen.

Secha räakjend Timotäus dän feinen Breef sea väl, waut hee von Paulus kjrieech. Wie kjennen ons goot väastalen, daut hee dän emma wada läsd un kjikjt, woo hee dän gooden Rot nokomen kunn bie siene Oppgowen.

Wie wellen ons disen Rot uk to Hoaten nämen. Woo kjenn wie daut doonen? Wan wie ons aunstrenjen, onse Gow kloa aum brennen to hoolen un daut to bewoaren, waut ons aunvetrut es, un aundre daut to lieren, waut wie weeten. Opp dee Wajch kjenn wie onsen “Deenst volstendich [derchfieren]”, soo aus Paulus to Timotäus säd (2. Tim. 4:5, NW).