LUHOLO lutshi wana gudivua gula futa diaye wa guzumba wagutumila mukanda? Timote wahetele mukanda wamutumine mupostolo Phaula. Mangino mukanda wene wana gutamegewa mu Biblia egi 2 Timote. Idi naye gukhala egi, Timote wakambele fundo diabonga ha gutanga mukanda wamutumine futa dienji. Yajiya gukhala egi Timote wakhalele gudihula egi: ‘Phaula udi muabonga ba? Wangusonegela malongo ajiya gungukuatesa ha gutagenesa ginemo giami ba? Mukanda owu mbawungukuatesa ha gukalagala muabonga mudimo wami nu ha gukuatesa athu ako ba?’ Gifua luholo tuza guyimona, mu mukanda wene, Timote wahetele mvutu gu mihu eyi nu gu mihu iko yavula. Uvi henyaha, tutadilenu malongo ako a ndando tuajiya gumona mu mukanda wene.

Ha sendesele Timote gutanga mukanda, idi naye gukhala egi wakotelesele diago egi Phaula udi diago futa dienji wakola. Phaula wamutamegele egi ‘mun’ami wa guzumba.’ (2 Tim. 1:2) Ha hetele Timote mukanda owu mu givo 65 gia T.D., idi naye gukhala egi wakhalele nu ivo 30 nu holu, wakhalele mukulu nu wakhalele mujiya ndaga jiavula. Wakalegele mudimo hamoshi nu Phaula ivo yavula, walongugile ndaga jiavula gudi muene.

Timote wahetele diago gikhesa ha guvua egi Phaula wakhalele mukolesela mu malamba nu gujinginyina guagasue. Phaula wakhalele mu bologo gu Roma, akhalele mutshigina gumushiya. (2 Tim. 1:15, 16; 4:6-8) Timote wamonele diago gikhesa gia Phaula mu mbimbi eji: ‘Ngudi mukolesela gu ndaga jiagasue.’ (2 Tim. 2:8-13) Esue nji, tuajiya guzula gikhesa mu luholo Phaula akolesele mu malamba.

Phaula wawambelele Timote ha guzula ginemo giamuhuile Nzambi nu ndando yavula. Wakhalele mutshigina egi Timote ‘alemese khapho diamuhuile Nzambi gifua tshuya.’ (2 Tim. 1:6) Phaula wakalegele mbimbi ya Greke kharisma ha guzuelela ‘khapho.’ Mbimbi yene yana monesa khapho dia khenda, nga gabalu ga khenda. Timote wahetele khapho diene tangua amuhanele inemo mu hungu.—1 Tim. 4:14.

Itshi Timote atshitshile nu khapho diene? Ha tangele muene mbimbi eji ‘lemesa khapho diaguhuile  Nzambi gifua tshuya,’ yajiya gukhala egi watangijile tshuya tuana hagewa monzo nu khunyi, matangua ako tuana kabuta. Khunyi jiana gukuatesa hagula tshuya tuleme muabonga nu jiana hana muzuza. Mukanda umoshi wana kotelesa Biblia (lexicon) udi muzuela egi mbimbi ya Greke (anazopyreo) inyi Phaula akalegele idi mukotelesa “gusesa khunyi hagula tshuya tujimigo,” yakotelesa egi “gukalagala mudimo nu ngolo nu gikhesa.” Idi mumonegesa egi Phaula wawambelele Timote egi: ‘Tagenesa ginemo giaye nu mutshima wagasue!’ Esue nji mangino tudi naye gutagenesa ginemo gietu nu gikhesa giagasue.

Tangua Timote alanduile gutanga mukanda wamutumine futa dienji wa guzumba, wamonele mbimbi iko yamukuatesele ha gukalagala muabonga mudimo wenji wa gulongesa. Phaula wasonegele egi: ‘Bamba ndaga jiabonga jiaguhuiwe mu njila ya nyuma yabonga, inyi idi mukatshi dietu.’ (2 Tim. 1:14) Ndaga jitshi jiabonga jiamuhuiwe? Mu verse idi muza gutuama, Phaula udi muzuelela “mbimbi jiabonga,” yakotelesa giamatshidia gidi mu Mbimbi ya Nzambi. (2 Tim. 1:13) Luholo Timote akhalele Muklisto, wakhalele nu ginemo gia gulongesa giamatshidia mukatshi dia hungu nu gudi athu ako. (2 Tim. 4:1-5) Luko, Timote watombewe gifua mukulu ha gubungula imeme ya Nzambi. (1 Phet. 5:2) Ha gubamba ndaga jiabonga, yakotelesa egi giamatshidia giakhalele mulongesa muene, Timote wakhalele naye gusha mutshima gu nyuma ya Yehowa nu gu Mbimbi yenji.—2 Tim. 3:14-17.

Mangino, esue nji atuhuile ndaga jiabonga, yakotelesa giamatshidia tuana gulongesa. (Mat. 28:19, 20) Ha gubamba ndaga eji jiabonga jiatuhuiwe, tudi naye gulandula gusamba muavula nu tudi naye nji gulonguga Mbimbi ya Nzambi muabonga. (Lomo 12:11, 12; 1 Tim. 4:13, 15, 16) Yajiya gukhala egi atuhuile luko inemo iko gifua gukhala mukulu nga gukalagala mudimo wa tangua diagasue. Inemo ya luholo elu idi naye gututuma ha gukhala athu a gudibulumuisa nu guhaga mutshima gudi Nzambi. Hene tudi naye gubamba inemo yene, guyizula nu ndando, tudi naye nji gusha mutshima gudi Yehowa ha guyitagenesa muabonga.

Inemo yahanewe Timote yakhalelego gumutadila phamba muene hakhenji. Yakhalele nji mutadila athu ako. Gishina giene Phaula wamuwambelele egi: ‘Ndaga wavile gudi ame . . . , jihane gudi athu a gujinginyina, hagula ajiya gukhala atagana ha gulongesa athu ako.’ (2 Tim. 2:2) Phaula wawambelele Timote ha gulongesa aphangi ako ndaga jialongugile muene. Mangino nji, akulu mu hungu adi naye gutshita luholo lumoshi. Mukulu wabonga ashigo naye gubamba ndaga jiana gujiya muene phamba mukunda nu muene hakhenji. Uvi udi naye gulongesa aphangi ako ndaga jiene hagula ene nji akhale atagana ha gutshita mudimo wene. Gashigo naye guvua woma egi aphangi ene mbaajiya ndaga jiavula nga ndo egi mbaatshita mudimo wene muabonga gumubalega muene. Hene, mukulu gashigo naye gulongesa aphangi ndaga holu-holu. Udi naye gukuatesa aphangi adi muhana muene formasio ha gukudisa makalegelo abonga ha gukula mu nyuma. Ngenyi, ‘athu a gujinginyina’ anyi mbaalongesa muene, mbaakhala atagana ha gukuatesa hungu.

Idi yadiago egi Timote wasuangulugile muavula nu makanda wamutumidile Phaula. Idi naye gukhala egi Timote watangele mukanda wene iphungu yavula nu wakhalele mutangiza luholo ajiya gukalegela malongo ene ha gutagenesa inemo yenji.

Esue nji tudi naye gukalegela malongo awa. Mu luholo lutshi? Tudi naye gutshita ngolo ha gulemesa khapho diatuhuile Nzambi gifua tshuya, ha gubamba ndaga jiabonga atulongesele, nu ha gulongesa aphangi ako ndaga tuana gujiya. Ngenyi, mbatukhala hehi ha ‘gutagenesa muabonga mudimo [wetu] wa Uklisto’ gifua luholo Phaula awambelele Timote.—2 Tim. 4:5.