IA OMW pepehm ahnsou me ke alehdi kisinlikou kangoang ehu sang rehn kompoakepahmw mwahu men? Tohnpadahko Timoty alehdi soangen kisinlikou duwehte met sang rehn wahnpoaron Pohl. Kisinlikou wet iei 2 Timoty me mi nan Paipel. Timoty uhdahn men diarada wasa ehu me meleilei pwe en kak wadek dahme kompoakepaho pahn koasoia. Ele Timoty medemedewe: ‘Ia iren Pohl? Mie eh mehn kaweid me pahn sewese ie nan ei pwukoa kan? Eh kaweido kak sewese ie en kamwahwihala ei kin kalohk oh padahk ong meteikan?’ Ni atail pahn kilang, Timoty diarada pasapengpen peidek pwukat oh soahng teikan nan kisinlikou kesempwalo. Ahpw met, kitail pahn koasoiapene ekei kaweid kan me kitail kak diarada nan kisinlikou wet.

Ni Timoty eh tepida wadek tepin lokaia ko nan kisinlikowo, e kak mwadangete ese me Pohl uhdahn nsenohkin ih. Ni kadek, Pohl ndahki ih “nei seri kompoak.” (2 Tim. 1:2) Timoty alehdi kisinlikou wet mpen pahr 65. Ele e sounpar silihsek samwa, oh e wia elder Kristian koahiek men. E kin iangih Pohl doadoahk daulih sounpar eisek samwa oh e esehla soahng tohto.

Ele Timoty ale mehn kangoang laud ni eh esehda me Pohl kin dadaur pahn kahpwal kan ni lelepek. Pohl wia emen me kin sensel nan Rom, oh e kereniongehr kamakamala. (2 Tim. 1:15, 16; 4:6-8) Timoty kak kilang me Pohl eimah pwehki Pohl nda: “I kin dadaurete ni mehkoaros.” (2 Tim. 2:8-13) Duwehte Timoty, ahn Pohl dadaurete kak kakehlaka kitail.

Pohl kangoangehki Timoty en kilengwohng eh pwukoa nan sapwellimen Koht doadoahk nin duwen mehkot me uhdahn kesempwal. Pohl men Timoty en doadoahngki sapwellimen Koht kisakis me e ahneki ni ngoang duwehte kisiniei me kin mpwumwpwul. (2 Tim. 1:6) Pohl doadoahngki lepin lokaia khaʹri·sma ong “kisakis.” Lepin lokaiahn Krihso kin dokedoke kisakis ehu me kohda ni soh isepe oh ni kadek sapan. Timoty alehdi kisakis wet ni ahnsou me e pilipilda en papah nan mwomwohdiso ni ahl tohrohr ehu.​—1 Tim. 4:14.

Dahme Pohl kangoangehki Timoty en wia? Ni eh wadek lokaiao “doadoahngki sapwellimen Koht kisakis . . .  ni ngoang duwehte kisiniei me  kin mpwumwpwul,” ele e medewehla kisiniei ehu me kin wiahla mwoalus. Mwoalus ko pahn anahne diepeseng pwehn lulda oh kihda karakar. Ehu dikseneri koasoia me lokaiahn Krihso (a·na·zo·py·reʹo) me Pohl doadoahngki kin wehwehki en kengkanahda de ngoangkihda duwen doadoahk ehu. Eri Pohl ndindaiong Timoty: ‘Wia uwen omw kak koaros nan ahmw pwukoa!’ Rahnwet, kitail anahne wia duwehte, me iei, en ngoangki atail doadoahk.

Nan nah kisinlikowo, Pohl koasoia pil ehu mehkot tohrohr me pahn sewese Timoty en pweida nan eh kalohk. E ntingihedi: “Sinsile likilik kaselel wet pwehki sawas en sapwellimen Koht manaman, me kin mi loalatail.” (2 Tim. 1:14) Likilik dahieu mwo? Soahng kesempwal dah me Timoty ahneki? Nan iretikitik en mwoweo, Pohl koasoakoasoia “padahk mehlel,” me dierek nan Paipel. (2 Tim. 1:13) Pwehki Timoty Kristian men me kin papah, e anahne padahngki padahk mehlel ong rie Kristian kan nan mwomwohdiso oh ong aramas akan nan eh wasahn kalohk. (2 Tim. 4:1-5) Oh Timoty pil pilipilda nin duwen emen elder pwehn apwalih sapwellimen Koht pelin sihpw. (1 Pit. 5:2) Timoty kak sinsile likilik wet me kohieng ih, me iei padahk mehlelo me e anahne padahngki, sang ni eh likih sapwellimen Siohwa manaman oh Mahsen.​—2 Tim. 3:14-17.

Rahnwet, padahk mehlelo me kitail kin ehukihong meteikan kowohngehr kitail. (Mad. 28:19, 20) Kitail en dehr manokehla ia uwen kesempwal en padahk mehlel wet me kitail kin padahngki, eri kitail anahne pousehlahte kapakap oh kaukaule onopki Mahsen en Koht. (Rom 12:11, 12; 1 Tim. 4:13, 15, 16) Ele kitail pil ahneki pwukoa en papah nin duwen elder men nan mwomwohdiso de kin doadoahngki pali laud en atail ahnsou ong papah Koht. Pwukoa kesempwal duwehte met anahne kahrehiong kitail en aktikitikla oh likih sapwellimen Koht sawas. Eri kitail kak pere oh kesempwalki met oh likih sapwellimen Siohwa sawas en apwalihala.

Pil kisehn ahn Timoty pwukoa iei en kaiahne meteikan en wia doadoahko me e kin wia. Meteikan pil iang pidada. Ihme kahrehda Pohl kangoangehki Timoty: “Soahng kan me ke rong sang ie . . . , likihong ohl lelepek kan soahng pwukat, irail pahn uhd koahiekla pwe ren padahkihong meteikan.” (2 Tim. 2:2) Ei, Pohl katamankihong Timoty en padahkihong rie Kristian teikan soahng koaros me e sukuhlkihdi. E kesempwal me koaros sounapwalih nan mwomwohdisohn Kristian rahnwet en pil wia duwehte. Sounapwalih mwahu men sohte kin ekihla dahme e ese duwen doadoahk ehu. Ahpw, e kin padahkihong meteikan pwe irail en kak wia doadoahko. E sohte perki me re kakete ese laudsang ih de wia doadoahko mwahusang me e kin wia. Eri, sounapwaliho sohte pahn padahngkihte kahk kan en pwukoa ehu. E pahn men sewese irail kan me e kaiahne en kakairada koahiek en wiahda pilipil mwahu oh en wehwehki soahng kan, me iei en wiahla Kristian koahiek. Ni ahl wet, “ohl lelepek kan” me e kaiahnehda pahn kak sewese laud mwomwohdiso.

Timoty uhdahn kesempwalki kisinlikou kangoang me e alehdi sang Pohl. E kak mengei ong kitail en medewehla eh pwurupwurehng wadek kaweid kesempwal ko oh doudouloale ia duwen eh kak doadoahngki kaweid ko ni ahl me keieu mwahu ong eh pwukoa ko.

Kitail pil men doadoahngki kaweid wet. Ia duwen? Kitail kak nantihong en doadoahngki sapwellimen Koht kisakis ni ngoang duwehte kisiniei me kin mpwumwpwul, sinsile likilik kaselel wet, oh likihong meteikan soahng koaros me kitail ese. Ni ahl wet, duwehte me Pohl ntingkihlahng Timoty, kitail kak “kapwaiada [atail] doadoahk ni unsek.”​—2 Tim. 4:5.