CAMBAJ alli amigomanta shuj cartata chasquishpaca ¿ima shinataj sintiringuiman? Apóstol Pablomi Timoteomanca shuj cartata escribirca. Cai cartaca Bibliapaj shuj libromi can. Caitaca 2 Timoteo nishpami rijsinchij. Timoteoca paipaj amigo ima nishcata yachangapajmi de seguro tranquilo pushtuta chai cartata liyingapaj mashcashcanga. Tal vez Timoteoca cashna nishpami tapurishcanga: “¿Pabloca allillachu canga? ¿Ima responsabilidadcunata alli pajtachingapajchu consejota cushcanga? ¿Cai cartapica huillanapi mejorangapaj, shujtajcunata ayudangapajchu valinga?” De seguro cai cartapica Timoteo rurashca tapuicunata, shujtaj tapuicunatapishmi cutichishcanga. Timoteoman Pablo quillcashca cartapimi huaquin consejocunata ricushun.

Timoteoca cai cartata liyi callarishpaca Pablo paita achcata cꞌuyashcatami cuentata curca. Timoteoca chai cartapica, Pablo “canca ñuca cꞌuyashca huahuami cangui” nishpa quillcashcatami ricurca (2 Timoteo 1:2). Chai cartata chasquishpaca Timoteoca 30 o ashtahuan huatacunatami charishcanga. Timoteoca cai cartataca más o menos huata 65-pimi chasquishcanga. Chai huatacunapajca Timoteoca congregacionta pushaj cashcamantami achca experienciata charirca. Paica Pablohuan 10 huatacunata yalli Diosta sirvicushcamantami achcata yacharca.

Diosta sirvingapaj Pablo llaquicunata ahuantacushcata yachaj chayashpaca Timoteoca achcatami animarishcanga. Pabloca Romapimi prezu carca. Ñallami paitaca huañuchigrircacuna (2 Timoteo 1:15, 16; 4:6-8). ¿Timoteoca Pablo mana manchaj cashcataca ima shinataj yacharca? Pabloca Timoteomanca ‘tucui llaquitami apacuni’ nishpami quillcarca (2 Timoteo 2:8-13). Pablo, Diosta sirvingapaj sinchi llaquicunata ahuantajta ricushpami Timoteoca achcata animarirca. Pablopaj ejemploca ñucanchijtapishmi animan.

Pabloca Timoteotaca Diosta sirvina valishca cashcata ricuchunmi animarca. Pabloca Dios cushca regalota ninata japichij shina, japichishcata charichunmi Timoteomanca animarca (2 Timoteo 1:6). Pabloca griego rimaipi khárisma nishca shimitaca Dios “cushca” nishpami utilizarca. Khárisma nishca shimica imatapish gratis chasquinatami nisha nin. Cunaj yuyajcuna Timoteotaca  congregacionpi alli sirvichun agllajpica Timoteoca Diosta ashtahuan sirvingapaj Dios cushca regalotami chasquirca (1 Timoteo 4:14).

¿Timoteoca Dios cushca regalohuanca imatataj rurana carca? Pabloca Timoteomanca Dios cushcataca ninata japichij shina japichi nircami. Timoteoca cai shimicunata liyishpaca tushpapi tiyaj ninapimi yuyashcanga. Ninaca asha asha huañushpaca carbonllami tucun, pero nina ama huañuchunca japichishcata charinami minishtirin. Shuj diccionariopica griego shimipi, Pabloca anazopireo nishca shimica cutin japichina, cutin animana nisha ninmi. Pabloca Timoteoman cai shimicunata nishpaca animohuan cushilla trabajanatami nisha nicurca. Chashna nishpaca Dios mingashcata pajtachinapi shunguta churai nicuj shinami carca. Cunan punllacunaca ñucanchijpish Timoteo shinallatajmi Diosta sirvingapajca tucui pudishcata cushicuihuan rurana canchij. Dios mingashcatapish allimi cuidana canchij.

Timoteoca Pablopaj cartata liyicushpaca huillanapi tucui alli llujshichun imata rurana cashcatami yacharca. Pabloca Timoteomanca: “Alli yachachinata Dios mingashcata ñucanchijpi causacun jucha illaj espirituhuan alli cuidangui” nishpami escribirca (2 Timoteo 1:14). ¿Timoteoca ima mingashcatataj chasquirca? 2 Timoteo 1:13-pica Pabloca Bibliapi tiyaj alli yachachinacunamanta o mana llulla yachachishcacunamantami parlarca. Timoteoca Jesusta catij cashcamantami huauqui panicunaman, gentecunamanpish mana llullata yachachina carca (2 Timoteo 4:1-5) Dios mingashca ovejacunatapishmi cuidana carca (1 Pedro 5:2). Pero ¿Dios mingashca mana llullata cuidangapajca imatataj rurana carca? Jehová Dios pajpaj espíritu santohuan, paipaj Shimihuan ayudajpimi cai mana llullataca cuidai tucurca (2 Timoteo 3:14-17).

Cunan punllacunapish mana llullata gentecunaman yachachichunmi Jehová Diosca mingashca (Mateo 28:19, 20). Mana llullata yachachinaca valishcami can. Chaitaca manataj cungarinachu canchij. Cai valishca regalota ama chingachingapajca Yaya Diostami cutin cutin mañana canchij. Paipaj Shimitapishmi cada punlla estudiana canchij (Romanos 12:11, 12; 1 Timoteo 4:13, 15, 16). Congregacionta pushaj cashpa, tiempo completopi Diosta sirvishpaca humilde canataca mana cunganachu canguichij. Cashna shina mingashcata charishpapish Jehová Diospimi confiana canchij. Mana llullata cuidangapajca Diospaj ayudatami mashcana canchij.

Timoteoca paiman mingashcata shujtajcunapish pajtachichun yachachina responsabilidadtami charirca. Pabloca: “Ñuca yachachishcata, uyashcataca shujtajcunata yachachi tucuipaj, alli pajtachijcunaman mingai” nircami (2 Timoteo 2:2). Pabloca pai imalla yachashcata shujtajcunaman alli yachachichunmi Timoteomanca mingarca. Cunan punllacunapish congregacionta pushajcunaca cai consejota pajtachingapajmi esforzarina can. Shuj alli superintendenteca ima yachashcacunataca mana pailla yachashpa saquirinchu. Ashtahuanpish shujtajcunapish alli pajtachichunmi paicunaman yachachin. Paicunaca: “Ñucata yalli ratomi ruranga. Allimi ruranga” nishpaca mana yuyancunachu. Chaimantami paicunaca ima mingashcata pajtachichunca ashallataca mana yachachincuna. Ashtahuanpish tucuitami yachachincuna. Congregacionta pushajcunapish alli yachachijcuna cachun espiritualmentepish sinchi cachunmi yachachincuna. Chashnami cai yachachi tucuipaj huauquicunaca congregacionpi ashtahuan ayudangacuna.

Timoteoca Pablopaj cartata chasquishpaca de seguromi cushilla sintirishcanga. Paica chai cartapi imata yachachishcatami cutin cutin yuyarishcanga. Shinallataj paipaj causaipipish ima shina pajtachinatami ricushcanga.

¿Ñucanchijpish cai consejocunataca ima shinataj pajtachina canchij? Dios cushca regalota ama chingachingapajca ninata japichij shinami esforzarina canchij. Shujtajcunamanpish ñucanchij imalla yachashcacunataca tucuita yachachishunchij. Pablopish Timoteopish Dios mingashcata pajtachishca shina ñucanchijpish pajtachishunchij (2 Timoteo 4:5).