¿IMAYNAN sientekunki amigoykimanta juj cartata chaskispa? Kallpachasqan ¿riki? Timoteopas juj sumaq cartatan chaskiran Pablomanta. Chay cartaqa kunanqa Bibliapin kashan, chay cartatan sutichakun “Segunda Timoteo” nispa. Timoteoqa chay cartata chaskispaqa tukuy yuyaychá leeran amigonpa imakunachus nimusqanta yachananpaq. Yaqapaschá Timoteoqa kaykunata tapukuran: “¿Imaynachá amigoy Pablo kashan? ¿Imallatapas nimuwashanmanchu allinta iñiq t’aqapi llank’anaypaq? ¿Yanapawanqachu kaypi qelqamusqan allinta Diosmanta willanaypaq jujkunata yanapanaypaqpas?”, nispa. Chaykunamantapunin chay cartapiqa sumaq yanapaykuna karan paypaq. Kunanmi qhawarisun imakunapi noqanchistapas yanapawasunman chayta.

Timoteoqa chay cartata leespan repararan Pablopaqqa importante kasqanta. Apóstol Pabloqa munakuywanmi niran: “Munasqa wawáy Timoteo”, nispa (2 Tim. 1:2). Timoteoqa chay tiempopaqqa 30 watanpiñan kashanman karan 65 watapi jina, payqa allin umalliqmi karan. Timoteoqa chunka wata masmi Pablowan llank’aspa allinta paymanta yacharan.

Timoteotaqa maytachá kallpacharan Pablo allin kashasqanta yachasqanqa, imaymana sasachakuykunata aguantasqanpas. Pabloqa preson Romapi kasharan, pisi tiempollamantan wañuchinankupas karan (2 Tim. 1:15, 16; 4:6-8). Timoteoqa repararanmi Pabloqa mana manchakuq kasqanta “tukuy imata aguantashani” nisqanpi (2 Tim. 2:8-13). Pablopa imayna aguantasqanmi Timoteotaqa anchata kallpacharan, noqanchistapas maytan kallpachawanchis.

Pabloqa Timoteotan kallpacharan Diospaq llank’asqanta ancha valorniyoqpaq qhawarinanpaq. Paymi niran: “Chaymi yuyarichiyki [...] imatachus Dios qorasunki chayta ninata jina kausarichinaykipaq”, nispa (2 Tim. 1:6). Pablo “imatachus” Dios qosqanmanta rimasqanqa griego simipi khárisma ninmi. Chay simiqa imapas gratislla mana imata ruwaspa chaskiymantan rimashan. Timoteo chaskisqanqa juj regalo jinan  karan, paymi ajllasqa karan iñiq t’aqapi yanapakunanpaq (1 Tim. 4:14).

¿Imatan Timoteo ruwanan karan imatachus Diosmanta chaskisqanwan? Pablon niran: “Yuyarichiyki qanman [...] imatachus Dios qorasunki chayta ninata jina kausarichinaykipaq”, nispa. Chayta leespaqa, yaqapaschá piensaran juj wasipi nina rauray pisi-pisimanta chiriyaspa wañusqanpi, astawan nina raurashanallanpaqqa llant’atan churana. Juj diccionario nisqanman jinaqa, griego simipi (anazōpyréō) Pabloq nisqanqa “jujmanta kausarichiy, kallpachay” nikullanmantaqmi. Pabloqa Timoteotan kallpachasharan tukuy atisqanta ruwaspa kusikuywan llank’ananpaq. Chaypiqa “tukuy sonqoykiwan llank’ay” nishanmanpas jinan karan. Kay tiempopipas noqanchisqa chaytan ruwananchis, kallpachakunanchismi Jehová Diospaq tukuy sonqowan llank’ananchispaq.

Timoteoqa Pabloq apachisqan cartata leespan reparallarantaq Diosmanta willashanallanpaq yanapayta. Pablon niran: “Noqanchispi kaq santo espirituq yanapayninwan allinta cuiday qanman jap’ichisqa karan chay qhapaq kayta”, nispa (2 Tim. 1:14). ¿Iman karan chay qhapaq kay jap’ichisqan? Ñaupaqtan apóstol Pablo rimaran ‘ancha allin yachachikuykunamanta’, chay yachachikuykunaqa Diospa simin qelqapin kashan (2 Tim. 1:13). Timoteoqa umalliqtaq karan chayqa, yachachinanmi karan cheqaq kaqmanta iñiq t’aqanpi juj llaqtakunapipas (2 Tim. 4:1-5; 1 Ped. 5:2). ¿Imaynatan Timoteo payman jap’ichisqa kaq allin willakuykunata cuidanan karan? Jehová Diospa santo espiritunpa yanapayninwan, Diospa simin qelqawan iman (2 Tim. 3:14-17).

Noqanchismanpas Jehová Diosmi jap’ichiwanchis allin willakuykunata runakunaman yachachinanchispaq (Mat. 28:19, 20). Diosmanta allin willakuykuna yachachisqanchisqa ancha valorniyoqmi. Chaymi Diosmanta mañakunanchis, simin qelqatapas sapa p’unchay leenanchis allinta yachachinanchispaq (Rom. 12:11, 12; 1 Tim. 4:13, 15, 16). Chaymantapas yaqapaschá umalliq kashanki otaq tukuy tiempoykiwan Diosta servishanki. Diosmanta allin willakuyninta jap’ispaqa k’umuykukuqmi kananchis, Diospitaqmi confiananchispas. Chhaynaqa, chay qhapaq kayta cuidaspan valorasqanchista rikuchinchis.

Timoteoqa jujkunamanpas yachachinanmi karan. Chaymi Pabloqa niran: “Noqamanta uyariranki chaykunawan [...] yachachiy junt’aq sonqo runakunaman, chhaynapin paykunapas allin preparasqa kanqaku jujkunata yachachinankupaq”, nispa (2 Tim. 2:2). Pablon Timoteota kallpacharan yachasqanmanta jujkunaman yachachinanpaq. Kay tiempopipas umalliqkunaqa kallpachakunankun jujkunaman yachachinankupaq. Manan paykunallapaqchu kanan yachasqankuqa, aswanpas jujkunamanpas yachachinankun. Manan paymanta aswan yacharunanta manchakuspachu jujkunata mana yachachinanku. Aswanpas kallpachakunankun tukuy atisqankuta yachachinankupaq. Ajinapi allin poqosqa juj iñiqmasikunapas kananpaq. Chhaynapin chay “junt’aq sonqo” iñiqmasikunaqa allinta iñiq t’aqapi yanapakunqaku.

Timoteoqa maytachá valoraran Pablomanta chaskisqan cartata. Payqa askha kutitachá leeran chay cartata, ajinapi amigonpa yuyaychasqankunapi piensananpaq junt’ananpaqpas.

Noqanchispas kasukunanchismi chay cartapi nisqanta. ¿Imaynata? Imatachus Dios qowaranchis chayta ninata jina kausarichinanchispaq, Diospa qowasqanchis yachachikuyninkunatan cuidananchis, imachus yachasqanchiskunatataqmi jujkunaman yachachinanchis. Chhaynapi Pablo Timoteoman nisqanta junt’asunchis Jehová Diospa allin willakuyninmanta yachachispa (2 Tim. 4:5).