SHUJ ali amigo shuj cushichij cartata cachamujpica ¿imashinata sintiripanguiman? Punda tiempopica apóstol Pablomi Timoteoman shuj cartata cacharca. Cunanbica cai cartataca Segunda Carta a Timoteo nishpami rijsipanchi. Chai cartata chasquishpaca Pablo imata nijujta yachangapaj munaimandami Timoteoca chulunlla pushtugupi liingapaj rishcanga. Timoteoca cashnami tapuririanga: “Pabloca ¿imashinashi can? ¿Jehová Dios mingashcata ali pactachichun nishpa imapash concejocunatachu cachamurca? ¿Ali villachichun, huauquipanicunata ayudashpa catichunllu cai consejocunaca ayudahuanga?”. Chai cartami cai tapuicunata contestarca. Shinaca chai cartapi tiashca concejocunata ricupashunchi.

Timoteo chai cartata liijushpaca Pablo paita ninanda juyashcatami cuenta japirca. Apóstol Pabloca “ñuca juyashca churishnami cangui” nircami (2 Tim. 1:2). Casi huata 65​pica Timoteoca ashtaca experienciata charij ancianomi carca. Cai cartata chasquishpaca Timoteoca 30 yali huatacunatallami charirca. Paica 10 yali huatacunata Pablohuan villachimandami paimandaca alipacha yachajurianga.

Apóstol Pablo llaquicunata aguantashpa catijujta ricushpami Timoteoca ninanda cushijurianga. Pabloca Roma llactapica prezo carca. Paipa huañuna punllapash ñami chayamujurca (2 Tim. 1:15, 16; 4:6-8). Timoteoca chaicunata yachashpami Pablo na manllaj cashcata ricurca. Pabloca “llaquita apajuni” nishpami escribirca (2 Tim. 2:8-13). Llaquicunata Pablo aguantajta ricushpami Timoteoca ñaupaman catirca. Chai experienciaca ñucanchicunatapashmi ninanda ayudan.

Timoteomanga Jehová Diosta sirvina ninan valishca cashcatami Pabloca yachachirca. Pabloca Timoteotaca: “Taita Dios carashca nina rupajunshna cambi tiajujtaca, causachinshna charina cangui” nircami (2 Tim. 1:6). Cai textopi “carashca” nishpaca griegopi khárisma shimitami Pabloca utilizarca. Cai shimihuanga pipash imatapash na jatushpa gratis carajtami ningapaj munan. Shina cuendami Timoteoca huauquipanicunata sirvingapaj agllai tucurca (1 Tim. 4:14).

Chai ‘carashcahuanga’ Timoteoca ¿imatata rurana carca? “Ninata causachinshna charina  cangui” nijta ricushpaca huasi ucucunapi tulpacunahuan ima pasan cashcatami Timoteoca yarishcanga. Tulpacunaca asha asha huañushpa, nina ñana rupajpimi carbonlla quidan. Chaimi nina ama huañuchunga yamdata catichina tucun. Shinami ninaca na huañun. Shuj diccionariopica, Pablo griegopi (anazōpyréō) shimita utilizashcatami nin. Chai shimica “cutin causachina o japichina” cashcatami ningapaj munan. Shinaca Pabloca ¿imatata Timoteomanga ningapaj munarca? Cushilla villachishpa catinatami nijurca. Chai shimicunaca: “Jehová Dios mingashcata tucui shunguhuan pactachingui” nijuj cuendami carca. Cunanbipashmi Jehová Diosta tucui shunguhuan sirvishpa catingapaj ninanda esforzarina capanchi.

Pablo escribishca cartata Timoteo liijushpaca villachishpa catichun shuj alipacha consejotapashmi tarirca. Pabloca cashnami consejarca: “Dios alita mingashcataca, ñucanchi shungupi causajuj Diospaj jucha illaj Espiritupaj ushaihuan aliguta pactachingui” (2 Tim. 1:14). Timoteomanga ¿imatata mingashca carca? Verso 13​pica, ‘ali shimicunamandami’ Pabloca parlarca. Shina nishpaca Taita Diospa Shimimandami parlajurca (2 Tim. 1:13). Timoteoca misioneromi carca. Chaimandami paica huauquipanicunaman, shuj gentecunamanbash Diospa Shimimanda yachachina carca (2 Tim. 4:1-5). Shinallata huauquipanicunata cuidashpa ayudachun Timoteotaca anciano cachunmi agllashca carca (1 Ped. 5:2). Jehová Dios mingashcataca Timoteoca ¿imashinata ali pactachi ushana carca? Chaipaca Jehovapa espíritu santota, Diospa Shimipi tiashca consejocunatapashmi Timoteoca charirca (2 Tim. 3:14-17).

Ñucanchicunamanbashmi Jehová Diosca ali villaigucunata shuj gentecunaman yachachichun mingashca (Mat. 28:19, 20). Jehová Diospa ali villaigucuna ninan valishca cashcataca nunca na cunganachu capanchi. Shinallata Jehovata tucui shungu mañangapaj, Bibliata cada punlla liingapami esforzarina capanchi (Rom. 12:11, 12; 1 Tim. 4:13, 15, 16). Tal vez quiquinga anciano o tiempo completopi sirvijupangui. Chaimandami ali villaigucunata shujcunaman yachachina bendicionda charimandaca humilde cangapaj, Jehovapi tucui shunguhuan confiangapaj esforzarina capangui. Chai mingashcata valichishcata, Jehová Dios ayudanapi confiashcatapashmi ricuchina capanchi.

Pabloca shuj huauquicunata ali yachachichunbashmi Timoteomanga mingarca. Chaimandami Pabloca, “Ñuca yachachijujtaca, ashtacacunapaj ñaupajpimi uyarcangui. Chaitaca, ali pactachijcunaman, shujcunamambash yachachi ushana crijcunaman yachachishpa mingapangui ninimi” nirca (2 Tim. 2:2). Cai shimicunahuanga Timoteo shuj huauquicunamanbash yachachina cashcatami Pabloca nijurca. Cunanbipash Timoteopa ejemplota catishpami ancianocunaca congregacionbi huauquicunataca ali yachachina can. Shuj alipacha ancianoca pai imata yachashcataca tucuitami shuj huauquicunamanga ali yachachina can. Ancianocunaca paipa puestota quichunga yashpaca na pensanllu. Pairami ñucata yali ali yachan nishpapash na pensanllu. Chaimandami imagutapash yachachijushpaca aliguta ricushpa pactachichunmi shuj ancianoca pai yachashcata yachachin. Shina yachachishpa ayudajpimi chai huauquicunaca ‘ali pactachijcuna’ cashpa congregacionbipash ali ayudaita ushanga.

Timoteoca cartapi cushca consejotaca ninandami valichirca. Chai consejocunata pactachingapaj munaimandami Timoteoca cutin cutin yarijurianga.

Ñucanchicunapashmi Timoteoshna chai consejotaca pactachingapaj esforzarina capanchi. ¿Imashinata pactachi ushapanchi? Jehovata ashtahuan sirvingapami esforzarina capanchi. Shinallata Jehová Dios mingashcata pactachingapaj, shujcunaman yachachingapapashmi esforzarina capanchi. Imaguta yachashpapash shujcunamanga tucuitami yachachina capanchi. Shinami Timoteoman Pablo nishcashnaca Jehová Diospa mingashcataca tucui shunguhuan cushijushpa pactachishun (2 Tim. 4:5).