EAA toou manako me tae mai tetai reta pumaana mei toou oa meitaki? Kua tae mai tetai reta ki te pipi Kerititiano ko Timoteo mei te apotetoro ko Paulo, e reta kua kite tatou mei te puka Pipiria o 2 Timoteo. Kare e ekoko anga kua papu ia Timoteo e ka akara aia i tetai ngai tau no te tatau i te reta a tona oa akaperepere. Penei kua manako ana a Timoteo i teia: ‘Peea ua a Paulo? Eaa tana au akakite anga naku ei tauturu iaku kia akamanako no runga i taku angaanga? Ka tauturu ainei teia reta iaku kia tere ki mua i roto i te angaanga tutu aere e te tauturu i tetai ke?’ Mei ta tatou i kite mai, kua kitea e Timoteo te pauanga ki teia au uianga e te puapinga maata o teia reta. Inara i teianei, ka akamou tatou ki te au arataki anga tauturu tei roto i teia reta.

Te akamata anga a Timoteo i te tatau i te reta, kua kite mai aia i tona pirianga vaitata kia Paulo. Te mea pumaana, kua kapiki a Paulo iaia e ko “taku tamaiti akaperepere.” (2 Timo. 1:2) Kua manako meitaki a Timoteo i tona 30 mataiti, te rauka mai anga te reta, no te 65 T.N., kua papa takere aia ei Kerititiano pakari e te kite. Kua piri ana aia kia Paulo no tetai anere mataiti e kua apii maata atu.

E akamaroiroi anga maata ta Timoteo i apii mai mei ia Paulo e kua akakoromaki tiratiratu ua atu rai aia. Tei roto a Paulo i te are auri i Roma, e kare e roa ka tamateia aia. (2 Timo. 1:15, 16; 4:6-8) Kua kite a Timoteo i te akamaroiroi anga ngakau toa a Paulo: “I akakoromaki marie ei au nei i te au mea katoa.” (2 Timo. 2:8-13) Mei ia Timoteo rai, ka rauka ia tatou i te maroiroi mei to Paulo akaraanga manea no te akakoromaki.

Kua raurau a Paulo ia Timoteo kia akono i tana au angaanga na te Atua ei mea akaperepere. Inangaro a Paulo ia Timoteo ‘kia akaaraara mei te ai i tei oronga uaia mai e te Atua’ mei tei roto iaia. (2 Timo. 1:6) Kua taangaanga a Paulo i te kupu khaʹri·sma no tei “oronga uaia mai.” Teia kupu Ereni tei taikuia, ko te apinga aroa tei oronga uaia mai.  Kua orongaia kia Timoteo tetai apinga aroa i tona akanooia anga no tetai angaanga takake i roto i te putuputuanga.​—1 Timo. 4:14.

Eaa ta Timoteo i rave ki teia apinga aroa? Iaia e tatau ra i teia tuatua ‘e akaaraara mei te aʼi’ penei kua akamanako aia i te aʼi akamaana i te ngutuare tei mura ua mai te ngarau. Ka akaaraara me kore ka tairiiri i te au ngarau kia ka e kia maata mai te vera. Karanga tetai lexicon e ko te verepa Ereni (a·na·zo·py·reʹo) ta Paulo i taangaanga, te aiteanga ‘akaou, akaora, tairiiri i te aʼi,’ ei akatutuanga kia “akaoraora i te angaanga ma te maroiroi.” Kua akakite a Paulo kia Timoteo: ‘Rave maroiroi i taau angaanga ma te ngakau tae!’ Ka anoano katoaia tatou kia pera​—kia maroiroi i ta tatou angaanga.

Tatau ua atu aia i te reta mei tona oa akaperepere, kite akaou a Timoteo i tetai tuatua tei tauturu iaia i roto i tana angaanga tutu aere. Tata a Paulo: “Taua tuatua meitaki i tukuia atu ia koe ra, e mou meitaki ïa, i te vaerua tapu e noo ki roto ia tatou nei ra.” (2 Timo. 1:14) Eaa ra teia tuatua meitaki tei irinakiia? Eaa te au apinga akaperepere tei orongaia kia Timoteo? I te irava i mua ake, te taiku ra a Paulo i te “akonoanga tuatua tikai,” te tuatua mou i roto i te Tuatua Tapu. (2 Timo. 1:13) Ei orometua Kerititiano, ka tutu aere a Timoteo i te tuatua mou ki te aronga i roto e i vao i te putuputuanga. (2 Timo. 4:1-5) Pera katoa, kua akanooia a Timoteo ei tangata pakari kia tiaki i te anana a te Atua. (1 Pete. 5:2) Ka rauka ua ia Timoteo i te paruru i tona irinaki anga—te tuatua mou tana ka apii—na te irinaki anga ki te vaerua tapu o Iehova e Tana Tuatua.​—2 Timo. 3:14-17.

I teia tuatau, kua orongaia mai te tuatua mou kia tatou kia piri atu ki roto i te angaanga tutu aere. (Mata. 28:19, 20) Ka akono tatou i teia au irinaki anga manea na te pure ua anga e te apii ua anga i te Tuatua a te Atua. (Roma 12:11, 12; 1 Timo. 4:13, 15, 16) Penei ka rave tatou i tetai au angaanga kia tavini ei tangata pakari e te angaanga orometua tamou. Ka akaaka tatou i te akono i teia angaanga, kia irinaki ua rai tatou ki runga i te Atua. No reira ka rauka ia tatou i te arataki, e te paruru i te reira ma te irinaki i ta Iehova tauturu kia akono i te reira.

Ko te angaanga tei orongaia kia Timoteo kare kiaia anake ua. Kua ō maira tetai pae ki roto. No reira rai a Paulo i raurau ei ia Timoteo: “E te au tuatua taau i akarongo iaku nei . . . ko taau ïa e tuku ki te aronga tuatua-mou, ko te tau kia apii atu ia etai ke ra.” (2 Timo. 2:2) Ae, kua apii mai a Timoteo mei tona au taeake Kerititiano e kia piri atu kia ratou. E mea puapinga no te au akaaere i roto i te putuputuanga Kerititiano i teia tuatau kia rave katoa i te reira. Kare tetai akaaere e uuna ua i tona kite no runga i te angaanga tei orongaia kiaia. Mari ra, ka apii aia ia ratou kia rave katoa i te angaanga. Kare aia e mataku e e meitaki atu ratou iaia i te reira angaanga. No reira kare te akaaere e apii ua i te au mea rikiriki o te angaanga. Ka inangaro aia i te tauturu i te aronga tana e tereni ra kia rauka te turanga meitaki e kia karape—kia tupu i te pae vaerua. Na teia tu, ka riro te au “tangata tiratiratu” tana i apii ei mea puapinga maata no te putuputuanga.

Kare e ekoko anga kua akaperepere a Timoteo i tana reta mei ia Paulo. Me akamanako tatou iaia e tatau ra i te puapinga o te ako, e akapeea aia me rave meitaki i tana angaanga i orongaia mai.

Ka taangaanga katoa tatou i teia ako ma te ngakau tae. Akapeea ra? Kia angaanga pakari tatou na te akaaraara anga mei te aʼi i tei oronga uaia mai kia tatou, kia mou meitaki i te tuatua meitaki, e kia oronga i to tatou kite e te karape ki te aronga ta tatou e apii ra. Na teia ravenga, mei ta Paulo i akakite kia Timoteo, “e rave akaope takiri i to taoonga na.”​—2 Timo. 4:5.