САР осетинеа тут кеда добинеа јекх охрабрувачко писмо таро јекх шукар амал? О ученико о Тимотеј добинѓа асавко писмо таро апостол Павле. Акава писмо акана тано пенџардо сар о библиско лил 2. Тимотеј. Сигурно о Тимотеј едвај аџикерела сине те аракхел јекх мирно тхан те шај те читинел акава писмо хем те дикхел со иси те вакерел леске лескоро мангло амал. Шај мислинѓа песке: „Сар тано о Павле? Дали иси ле несаво совет со ка поможинел манге ки мли задача? Дали шај лескоро совет те поможинел манге те проповединав хем те сикавав е јаверен ко пошукар начин?“ Сар со ка дикха, освен со о Тимотеј ко акава важно писмо аракхља о одговорија ко акала пучиба, ов добинѓа јавера да важна поуке. Ама, акана те концентририна амен ко важна советија со аракхљовена ко акава писмо.

Кеда о Тимотеј почминѓа те читинел о писмо, панда таро почеток шај сине те хаљовел кобор паше сине е Павлеа. О Павле мангипаја пишинѓа леске кај ов тано лескоро „мангло чхаво“ (2. Тим. 1:2). О Тимотеј добинѓа акава писмо околу ко 65 берш а.е., кеда изгледа сине ле повише таро 30 берш хем више сине јекх искусно старешина. Ов соработинѓа заедно е Павлеа повише таро 10 берш хем адалеске сиклило бут лестар.

О Тимотеј сигурно сине бут охрабримо кеда шунѓа кај о Павле верно издржинѓа ко неволје. О Павле сине затворенико ко Рим, хем панда хари ваљани сине те овел мудардо (2. Тим. 1:15, 16; 4:6-8). О Тимотеј шај сине те дикхел кај ов сине храбро адалеске со вакерѓа: „Трпинава са“ (2. Тим. 2:8-13). Исто сар о Тимотеј, амен да шај те добина сила таро е Павлескоро пример баши истрајност.

О Павле поттикнинѓа е Тимотее те ценинел бут пли задача со иси ле ки е Девлескири служба. Ов мангља о Тимотеј те тхарел „сар јаг е Девлескоро поклон“ со сине ки лесте (2. Тим. 1:6). О Павле акате користинела о лафи каризма башо „поклон“. Акале грчко лафеа мислинела пе ко поклон сој тано бизо паре хем со на заслужинела пе. О Тимотеј добинѓа акава поклон кеда сине биримо те служинел ко собрание ко јекх посебно начин (1. Тим. 4:14).

 Со охрабринѓа о Павле е Тимотее те керел акале поклонеа? Кеда о Тимотеј читинѓа о лафија „тхар сар јаг“ ов шај мислинѓа ко жарија со ачхона сине тари јаг со о мануша користинена ла сине ко пумаре кхера. Акала жарија ваљани сине те пхуден пе те шај те тхабљон хем те таќарен. Јекх лексикони вакерела кај о Павле користинѓа јекх грчко лафи кова со значинела „палем те тхаре, те иране ко живото, те пхуде ки јаг“. Адалеа ов мангља те вакерел „те овел пе ревно баши несави бути“. Значи о Павле вакерела сине е Тимотееске: „Де тутар са кеда кереа тли задача!“ Амен да авдиве ваљани те ова ревна хем те да амендар са ки амари служба.

Ко акава писмо, о Павле вакерѓа е Тимотееске јекх јавер да бути со шај сине те поможинел леске те овел успешно ки пли служба. Ов пишинѓа: „Аракх акала скапоцена буќа со добинѓан лен преку о свети дух, кова сој ки аменде“ (2. Тим. 1:14). Кола скапоцена буќа сине денде е Тимотееске? Ко 13 стихо, о Павле спомнинела о „састе лафија“, или о чачипа сој тане ко списија (2. Тим. 1:13). Адалеске со о Тимотеј сине христијани, ов ваљани сине те сикавел о чачипе е пхрален хем е пхењен ко собрание хем те проповединел е манушенге ко подрачје (2. Тим. 4:1-5). Освен адава, ов сине старешина со мора сине те грижинел пе башо е Девлескоро стадо (1. Пет. 5:2). О Тимотеј шај сине те аракхел акаја скапоцено бути — о чачипе — адалеа со ка мукхел сине те водинел ле е Јеховаскоро свети дух хем лескоро Лафи (2. Тим. 3:14-17).

Авдиве, амен да ваљани те вакера о чачипе е јаверенге ки служба (Мат. 28:19, 20). Шај те сикава кај ценинаја акава чачипе адалеа со понадари да ка молина амен хем ка проучина и Библија (Рим. 12:11, 12; 1. Тим. 4:13, 15, 16). Освен адава шај служинаја сар старешине ко собрание или сием полновремена слуге. Асавке скапоцена задаче сој аменге денде ваљани те керен амен те ова понизна хем свесна кај зависинаја таро Девел. Адалеске ваљани те аракха, или те заштитина амаре скапоцена задаче сој аменге денде адалеа со ка рода о Јехова те поможинел аменге те кера лен.

Јекх дело тари е Тимотеескири задача сине те сикавел е јаверен те керен адава со ов керела сине. Адалеске о Павле поттикнинѓа е Тимотее: „Адава со шунѓан мандар... вакер ле е верна манушенге, кола со пало адава ка овен способна те сикавен е јаверен“ (2. Тим. 2:2). Оја, о Павле потсетинѓа е Тимотее те сикавел е јавере пхрален са адава со ов сиклило. Бут тано важно секова надгледнико авдиве те постапинел исто аѓаар. Јекх шукар надгледнико на гаравела адава со сиклило баши пли задача. Наместо адава, ов сикавела е јаверен, ола да те шај те исполнинен пумари задача. Ов на дарала кај о јавера шај те керен пли задача пошукар лестар. Адалеске на сикавела лен само о основна буќа. Ов мангела те поможинел ленге шукар те проценинен о буќа те шај те овен зрела христијања. Ко асавко начин, ’о верна мануша‘ шај повише те поможинен ко собрание.

Сигурно о Тимотеј бут ценинела сине акава охрабрувачко писмо со добинѓа ле таро Павле. Шај те замислина аменге сар о Тимотеј бут пути читинела сине акава совет хем хор размислинела сине сар шај пошукар те применинел ле ко пле задаче.

Амен да мангаја те применина акава совет, аѓаар со ка тхара сар јаг е Девлескоро поклон сој ки аменде, ка аракха о скапоцена буќа сој аменге денде хем ка сикава е јаверен о буќа со џанаја лен. Ко асавко начин, сар со вакерѓа о Павле е Тимотееске, ка шај целосно те кера амари служба (2. Тим. 4:5).