TONGANA mo wara mbeni lettre so akpengba zo so mbeni nzoni kamarade atokua na mo, a yeke sara mo tongana nyen? Bazengele Paul atokua lani mara ti lettre tongaso na Timothée, mbeni disciple so ayeke Chrétien, lettre so la e iri ni laso Use mbeti na Timothée. Kite ayeke dä ape so, Timothée aye lani ti wara mbeni place so ayeke kpô tongaso si lo diko mbeti so kota kamarade ti lo atokua na lo. Peut-être Timothée ayeke hunda lani terê ti lo, atene: ‘Paul ayeke kâ tongana nyen? Eskê lo yeke na mbeni wango ti mû na mbi ti aidé mbi ti sara akua so a mû na mbi? Eskê mbeti so apeut ti aidé mbi ti fa tënë nga ti fa ye nzoni mingi na ti mû maboko na ambeni zo?’ Tongana ti so e yeke bâ, Timothée awara kiringo tënë na ahunda ti lo so nga na ambeni nzoni tënë na yâ ti mbeti so. Me ti fadeso, zia e bâ ambeni kpengba wango so alingbi ti mû maboko na e so ayeke na yâ ti lettre so.

Gï so Timothée akomanse ti diko lettre so, lo bâ so Paul apensé biani na lo. Paul airi lo “molenge ti mbi so mbi ye mo mingi” ti fa yengo so lo ye na lo (2 Tim. 1:2). Atâa so Timothée ayeke lani na ngu 30 tongaso na ngoi so lo wara lettre so na ngu 65, lo yeke lani mbeni ancien so aninga na kua ni awe. Lo sara kua lani na terê ti Paul ahon ngu bale-oko, na Paul afa na lo aye mingi.

So Timothée amä so Paul agbu ngangu na yâ ti aye ti ngangu so lo wara, a doit ti kpengba lo mingi. Paul ayeke lani na kanga na Rome, na a ga nduru ti fâ lo awe (2 Tim. 1:15, 16; 4:6-8). Timothée apeut ti bâ so Paul ayeke lani na courage tongana lo tene: “Mbi ngbâ ti gbu ngangu na yâ ti aye kue.” (2 Tim. 2:8-13). Legeoko tongana Timothée, gbungo ngangu ti Paul alingbi ti kpengba e.

Paul awa Timothée ti bâ kua so lo yeke sara ndali ti Nzapa tongana mbeni ye so ayeke kota mingi. Paul aye ti tene Timothée ‘asara si matabisi ti Nzapa so ayeke na lo angbâ gï ti za tongana wâ’. (2 Tim. 1:6). Tënë “matabisi” so Paul asara kua na ni ayeke tënë ti Grec kharisma. Tënë ti Grec so aye ti sara tënë ti mbeni matabisi wala mbeni ye so zo awara sân ti sara mbeni ye. Timothée awara lani matabisi so na ngoi so a soro lo ti sara mbeni kua so ayeke nde na yâ ti bungbi.—1 Tim. 4:14.

 Paul awa Timothée ti sara nyen na matabisi so? Na ngoi so lo diko tënë ‘sara si matabisi so ayeke na mo angbâ gï ti za tongana wâ,’ peut-être lo yeke pensé lani na awâ so azo ayeke sara na yanga-da na keke ti wâ, so keke ni ate awe angbâ gï acharbon so wâ ayeke dä. A doit ti pë acharbon so si wâ ni aza. Mbeni bakari atene so tënë ti Grec (anazopyreo) so Paul asara kua na ni aye ti tene “wâ so akiri aza wala so a pë ni juska aza”, so ti tene ti duti na nzara mingi ti sara mbeni kua na ti yapu na yâ ni. Tongaso, Paul ayeke tene lani na Timothée atene: ‘Sara kua so a mû na mo na bê ti mo kue.’ Laso, e doit ti sara nga tongaso, so ti tene, ti sara kua so a mû na e na bê ti e kue.

So Timothée angbâ ti diko lettre ti kota kamarade ti lo, lo si na ndö ti mbeni tënë so a-aidé lo ti sara kua ti lo ti fango tënë nzoni. Paul atene: “Pendere ye so a zia na maboko ti mo ti bata ni so, mo bata ni na lege ti yingo vulu so aduti na yâ ti e.” (2 Tim. 1:14). Pendere ye ni so ayeke nyen? Nyen la a mû lani na Timothée? Na versê 13, Paul asara tënë ti “anzoni tënë”, wala tâ tënë so ayeke na yâ ti Mbeti ti Nzapa (2 Tim. 1:13). So Timothée ayeke mbeni wakua so ayeke Chrétien, lo doit ti fa tâ tënë na aita ti congrégation nga na azo ti territoire ti lo (2 Tim. 4:1-5). Nga, a zia Timothée tongana mbeni ancien ti bata kundu ti ataba ti Nzapa (1 Pi. 5:2). Timothée alingbi ti bata pendere ye so a mû na lo, so ti tene, tâ tënë so lo doit ti fa ni, na lege so lo sara confiance na yingo vulu ti Jéhovah nga na Mbeti ti Nzapa.—2 Tim. 3:14-17.

E nga kue a mû na e laso tâ tënë so e yeke fa ni na azo (Mat. 28:19, 20). E lingbi ti ngbâ ti bâ tâ tënë so na nene ni tongana e ngbâ ti sambela nga ti manda Bible lakue (aRom. 12:11, 12; 1 Tim. 4:13, 15, 16). A lingbi nga ti mû na e mbeni kua tongana kua ti ancien wala kua ti ngoi kue. Pendere kua tongaso adoit ti sara si e sara terê ti e kete nga e zia bê ti e na Jéhovah ti mû maboko na e. Tongaso, tongana e bâ na nene ni mingi kua so a mû na e nga e zia bê ti e na mungo maboko ti Jéhovah ti sara ni, andâ e yeke bata pendere ye so a mû na e ti bata.

Akua so a mû lani na Timothée abâ gï lo lo oko ape. A bâ nga ambeni zo. Ndani la Paul awa lo, atene: “Aye so mo mä ni na yanga ti mbi . . . , mo zia ni na maboko ti azo so ayeke be-ta-zo, so ala nga na pekoni [alingbi] ande biani ti fa ni na ambeni zo.” (2 Tim. 2:2). Timothée ayeke manda ye lani na terê ti aita ti lo aChrétien, nga lo yeke fa na ala aye so lo manda. A yeke kota ye ti tene ancien oko oko kue na yâ ti congrégation agi ti sara tongaso. Mbeni nzoni ancien ayeke honde pëpe na aita ye so lo hinga na ndö ti mbeni kua. Me lo yeke fa ni na ala tongaso si ala lingbi ti sara ni. Lo yeke sara mbeto ape so ala lingbi ti hinga ye ahon lo wala ala lingbi ti sara kua nzoni ahon lo. Tongaso, ancien ayeke fa pëpe gï akete ye na ndö ti mbeni kua. Lo ye ti aidé azo so lo fa ye na ala ti sara ye na ndara, so ti tene, ti ga aChrétien so akpengba. Tongana lo sara tongaso, “azo so ayeke be-ta-zo” so lo fa ye na ala ayeke mû maboko mingi na congrégation.

Kite ayeke dä ape so Timothée abâ na nene ni mingi pendere lettre ti Paul so. E lingbi ti imaginé lo so lo yeke diko lani anzoni wango so fani mingi nga lo yeke gbu li ti lo na ndö ni ti bâ tongana nyen la lo lingbi ti sara ye alingbi na ni na yâ ti akua ti lo.

E nga e ye ti sara ye alingbi na wango so. E yeke sara ni tongana nyen? E lingbi ti sara ngangu ti sara si matabisi so e yeke na ni angbâ gï ti za tongana wâ, ti bata pendere ye so a zia na maboko ti e ti bata nga ti fa aye kue so e hinga na amba ti e. Tongana e sara tongaso, e lingbi ti “sara kusala ti [e] ni kue” tongana ti so Paul atene.—2 Tim. 4:5.