MITTU lubbote jaalikki jawaachishshannota borrote sokka soyihero hiitto ikkatto? Phaawuloosi rosaanchu Ximootewoosira togoo sokka borreessinosi; tini sokka Qullaawu Maxaafi giddo noote layinki Ximootewoosiiti. Ximootewoosi lubbote jaalisi soyinosi sokka cancu nookki bayicho ofolle nabbawate quqquxaminoti dihuluullissannote. Ximootewoosi togo yee hedinoha ikkara dandaanno: ‘Phaawuloosi keere noo ikka? Uyinoonnie looso loosate kaaˈlitannoe amaale amaalaeraati ikka? Tini sokka albinni roore sabbakeemmonna rosiiseemmo gede hattono woloota kaaˈla dandeemmo gede assitannoe ikka?’ Tenne sokkara Ximootewoosi xaˈmuwasira dawaro afiˈrinota laˈneemmo; hattono wole kaajja roso ronseemmo. Hanni xa tenne sokka giddo noota mite kaaˈlitanno amaale laˈno.

Ximootewoosi tenne sokkara noota umi hedo nabbawa hanafanni heeˈrenni, Phaawuloosi isi daafira lowo geeshsha hedannota wodanchino. Phaawuloosi iso “baxeemmohu beettiˈya” yiinosi. (2 Xim. 1:2) Phaawuloosi 65 M.D. balla tenne sokka borreessisi woyite Ximootewoosira 30 diro saisikkinni digatino; isi hatte yannara worba cimeessaati. Isi Phaawuloosi ledo tonne saˈˈanno diro soqqamino daafira isiwiinni lowore rosino.

Ximootewoosi, Phaawuloosi iillinosi qarra ammaname cince sainota afiti lowo geeshsha jawaatinoti dihuluullissannote. Hatte yannara Phaawuloosi Roomaho sansalatete usurame no; hattono mulenni shinasiraati. (2 Xim. 1:15, 16; 4:6-8) Phaawuloosi “Baalanka coye cinceemmo” yiino daafira Ximootewoosi isi worba ikkinota wodanchino. (2 Xim. 2:8-13) Phaawuloosi cinca Ximootewoosi gede ninkeno jawaachishshannonke.

Phaawuloosi Ximootewoosi Maganoho soqqamara uyinoonnisi looso naadanno gede amaalinosi. Phaawuloosi Ximootewoosi “giddosi giirate gede ikkite noota Maganu elto” bushshara hasiˈrino. (2 Xim. 1:6) Phaawuloosi “elto” kulate kariisima yaannoha Giriikete qaale horoonsiˈrino. Kuni qaali mittu manchira mulla uyinanniricho kulannoho. Ximootewoosi songote giddo baxxino garinni soqqamara doorrisi woyite tenne elto adhino.—1 Xim. 4:14.

Phaawuloosi Ximootewoosi tenne elto massara jawaachishino? Ximootewoosi ‘giirate gede bushshi’ yitanno hedo nabbawi woyite, mine giidhinannita mito woyite ruqano kashilo ikkitino giira hedinoha ikkara dandaanno. Konne kashilo buwannonna roore iibbanno gede assa hasiissanno. Mitte dikishinerera Phaawuloosi horoonsiˈrinoha  anazopireyo yaannoha Giriikete qaale “wirro bushsha, wala wala yitanno gede assa” yine tirroonni. Tini lawishshu yaatto mitto looso jawaantenna diinaggaambe loosa ikkitinota kultanno. Phaawuloosi Ximootewoosi ‘Loosoho diinaggaawi’ yiinohu gedeeti. Xaa yannara ninkeno hatto assa yaanno diinaggaambe soqqama hasiissannonke.

Ximootewoosi muxxe jaalisi soyinosi sokkanni soqqanshosinni dancha guma afiˈranno gede kaaˈlitannosita wole hedono afiˈrino. Phaawuloosi togo yee borreessino: “Uyinoonniheta dancha eeggo, ledonke noohu Qullaawu Ayyaani widoonni qolte agadhi.” (2 Xim. 1:14) Eeggo uyinoonnisiri maati? Ximootewoosira hiikku muxxe ikkino coyi noosi? Phaawuloosi “hawaqiˈnanni qaale” yaano Qullaawa Borro giddo noo halaale qummi assino. (2 Xim. 1:13) Ximootewoosi Kiristaancho ikkino daafira songote giddono ikko gobbaanni noo mannira halaale sabbakino. (2 Xim. 4:1-5) Qoleno Ximootewoosi Maganu hoshsha allaalanno gede cimeessa assine shoommonnisi. (1 Phe. 5:2) Ximootewoosi Yihowaha Qullaawa ayyaananna Qaalesi addaxxe eeggo uyinoonnisiha yaano rosiisanni noo halaale agadhino.—2 Xim. 3:14-17.

Xaa yannara ninkeno wolootaho halaale rosiinsammora eeggo uyinoonninke. (Mat. 28:19, 20) Jaante huucciˈneenna Maganu Qaale barru baala seekkine xiinxalline tenne dhagge ikkitino eeggo naada dandiineemmo. (Rom. 12:11, 12; 1 Xim. 4:13, 15, 16) Ninkeno songote cimeeyye woy woˈma yanna soqqamaano ikkine soqqamanni heeˈnoommoha ikkara dandaanno. Togoo qoosso noonkeha ikkiro umonke heeshshi assa hasiissannonke. Loosonke umo fushshateno Magano addaxxa hasiissannonke. Hatto assineemmoha ikkiro, Maganu eeggo uyinonke coye naadeemmota leellinsheemmo.

Ximootewoosira uyinoonni loosi isi calla loosannoha diˈˈikkino. Wolootuno konne looso loossino. Phaawuloosi, “Ani rosiisoommohere woloota rosiisa dandiitannoriranna ammanantinorira eeggo uyi” yiinohu iseraati. (2 Xim. 2:2) Phaawuloosi Ximootewoosi rosinore wolootaho rosiisa hasiissannosita deannokki gede kulinosi. Xaa yannara noori songote cimeeyyeno hatto assate sharrama hasiissannonsa. Danchu cimeessi uyinoonnisi looso loosate noosi egenno dimaaxiranno. Hatteentenni wolootuno loosa dandiitanno gede rosiisanno. Wolootu egennotenni woy dandootenni iso roortino daafira disaalanno. Konnira songote cimeessi qara ikkinore calla rosiise diaguranno. Isi qajeelsanni noo roduuwi hedatenna mitto coye murate dandoonsa yaano ayyaanaamittensa lophitanno gede kaaˈla hasiˈranno. Konni garinni qajeelinohu mittu ‘ammanamino’ rodii songo kaaˈlannore lowore assannota leellishanno.

Ximootewoosi Phaawuloosi soyinosita jawaachishshanno sokka naadinoti dihuluullissannote. Isi uyinoonnisi looso danchu garinni loosate kaaˈlitannosita tenne sokkara noo amaale wirro wirro nabbawe hiincinota heda dandiineemmo.

Tini amaale ninke wodani giddono coˈara hasiˈneemmo. Hiittoonni? Eltonke giirate gede bubbanno gede assate, eeggo uyinoonninkere agadhate, hattono anfoommore baala wolootaho rosiisate sharrammeemmo. Konni garinni Phaawuloosi Ximootewoosira kulinonte gede ‘soqqanshonke baala wonshineemmo.’—2 Xim. 4:5.