INO ty tsapanao lafa mahazo taratasy mampahery baka amy namanao? Nahazo taratasy manahaky ani-zay baka amy apostoly Paoly ty Kristiana raiky atao hoe Timoty. Timoty faharoe ty fahaizantsika ani-taratasy io henanizao amy Baiboly ao. Azo antoky fa avy le nila pilasy kalma Timoty mba hamakia ani-raha nivolanini-namany teany iny. Mety ho nieritseritsy Timoty hoe: ‘Ino zay ty nisoratini-Paoly ao? Misy torohevitsy hanampy ahy amy ty andraikitsiko va? Hanampy ahy hanasoa ty fanompoako noho hahay hanampy olo va taratasy toy?’ Ho hitantsika fa nahita ani-valini-fanontanea reo Timoty tanatini-taratasy lafovily iny ao, mbo mandilatsini-zay aza. Fe ndao tse tsika handiniky hevitsy vitsivitsy baka amy taratasy io.

Laha vo nanomboky namaky ani-taratasy iny Timoty, le avy le tsapany hoe nifandramby marìny rozy amy Paoly. Nikaihini-Paoly hoe “anaky teako” ie. (2 Tim. 1:2) Tamy tao 65 tany ho any ro nahazoani-Timoty ani-taratasy io. Mety ho 30 tao mahery ie tamy zay, sady fa anti-panahy fa zatsy. Fa niaraky niasa amy Paoly tanatini-10 tao mahery ie, ka maro ty raha hainy.

Azo antoky fa tena nampahery ani-Timoty ty nahay hoe niaritsy fijalea Paoly, fe tsy nivaliky. Nigadrà ta Roma any Paoly, sady tsy ho ela le hovonoa ie. (2 Tim. 1:15, 16; 4:6-8) Hitani-Timoty hoe be herim-po Paoly satria nivola ie hoe: ‘Miaritsy ty raha iaby aho.’ (2 Tim. 2:8-13) Tena nampahery ani-Timoty ty fiaretani-Paoly, ka afaky hampahery antsika koa.

Nampirisihini-Paoly Timoty mba hieritseritsy hoe vatan-draha ty andraikitsiny amy fanompoa a Ndranahary. Teani-Paoly laha ataoni-Timoty ‘miroaroa manahaky afo io fanomeza niazony baka amy Ndranahary’ zay. (2 Tim. 1:6) Ty safà grika hoe khaʹri·sma ro nampiasani-Paoly amy hoe “fanomeza.” Manondro fanomeza tsy andoava drala, vokatsini-hasoa fanahy safà grika io, zany hoe raha amea olo raiky ndre tsy nilàny noho tsy maeva azy aza. Nahazo ani-fanomeza io Timoty lafa nivoafily hanao fanompoa manoka ho ani-fiangona.​—1 Tim. 4:14.

Tokony hataoni-Timoty akory fanomeza io? Mety nieritseritsy afo sarabo an-trano ao rey Timoty lafa namaky ani-safà hoe “miroaroa manahaky  afo” io. Tsy avy le miroaroa afo rey, fa mila piopiohy mba hisy lelan’afo noho hirehitsy soa. Misy diksionera raiky manazava hoe ty dikani-safà grika (a·na·zo·py·reʹo) nampiasani-Paoly io le hoe “manavao, mamelo ndraiky, mikopaky afo.” Samby ta hivola iaby raha reo hoe “mihamazoto amy asa raiky.” Nanoro hevitsy ani-Timoty zany Paoly teo hoe: ‘Anovo amy fo ty asa nampanaovy anao!’ Tokony hazoto amy asa fanompoa ho zay koa tsika henanizao.

Lafa nanohy namaky ani-taratasy baka amy namany teany iny Timoty, le nahita raha hafa afaky hanampy azy mba hahita vokatsy amy fanompoany. Nivola Paoly hoe: “Arovo amy alalani-fanahy masy anatintsika ao raha soa nankiny taminao zay.” (2 Tim. 1:14) Ino raha soa nankiny tamy Timoty io? Niresaky mikasiky “safà mahasoa” Paoly amy andininy taloha eo, tsy ino io fa ty fahamarina amy Soratsy Masy ao. (2 Tim. 1:13) Mpitory Timoty ka mila mampianatsy ty fahamarina amin’olo anivoni-fiangona eo ie, no sady mampianatsy ty olo amy faritany eny koa. (2 Tim. 4:1-5) Nivoatendry ho anti-panahy hiarakandro ty aondri-Ndranahary koa Timoty. (1 Pet. 5:2) Tokony harovani-Timoty raha nankiny taminy io, tsy ino zay fa ty fahamarina tsy maintsy ampianariny. Manao ani-zay ie lafa miantehitsy amy fanahy masini-Jehovah noho ty Safàny.​—2 Tim. 3:14-17.

Nanankina fahamarina tokony hampianary ty olo hafa koa tsika henanizao. (Mat. 28:19, 20) Tsy tokony hohalinontsika mihintsy hoe lafovily fahamarina ampianarintsika io, ka mila mivavaky matetiky tsika le mianatsy tsy tampaky ty Safà-Ndranahary. (Rom. 12:11, 12; 1 Tim. 4:13, 15, 16) Mbo mana andraikitsy fanampiny koa tsika laha anti-panahy na mpanompo amy fotoa iaby. Tokony hahavy antsika hiambany noho hiantehitsy amy fanampea-Ndranahary ty andraikitsy lafovily manahaky ani-reo. Afaky hiaro ani-raha nankiny tamintsika reo tsika laha mieritseritsy hoe lafovily raha reo, bakeo miantehitsy amy Jehovah mba hanampy antsika hahavita azy.

Tafilitsy amy andraikitsini-Timoty ty mampiofana olo hafa mba hanao ty asa nataony. Zay ty antony nahavy ani-Paoly nampirisiky azy hoe: “Ze nirenao tamiko ... le atoloro ani-lahilahy azo atokisa reo. Hahay hampianatsy ty hafa koa rozy bakeo.” (2 Tim. 2:2) Nampitiarovini-Paoly Timoty hoe mila ampianariny ani-rahalahy hafa rey ty raha iaby nianarany. Tena mila miezaky manao ani-zay koa ty mpiandraikitsy kidraidraiky anivoni-fiangona kristiana eo henanizao. Ty mpiandraikitsy soa, le tsy mialona ka hoe tanjahiny ho azy raiky avao ty raha hainy mikasiky ani-andraikitsy iny. Vomaiky aza ie mampianatsy ty olo hafa amy zay mba ho afaky hanao ani-asa iny koa. Tsy matahotsy ie hoe mety hahay raha maro mandilatsy azy olo rey, na ho soa marè ty fomba anaovan-drozy ani-raha iny. Fe tsy ty raha tena ilà amy asa iny avao ro ampianarini-mpiandraikitsy. Ta hanampy ani-ze olo ampiofaniny hana fahaiza mandiniky koa ie, zany hoe hanjary Kristiana matotsy. Ho afaky hanampy soa ty fiangona amy zay “lahilahy azo atokisa” nampianariny rey.

Azo antoky fa tena niteani-Timoty taratasy mampahery niazony baka amy Paoly iny. Mora amintsika ty mangalaky sary an-tsay azy, mampimpolimpoly mamaky ani-torohevitsy lafovily rey noho mieritseritsy ty fomba tena soa hanorihany ani-raha rey amy asa nampanaovy azy.

Teantsika koa ty hanoriky soa ani-torohevitsy reo. Amy fomba akory? Azontsika atao ty miezaky marè ka ataontsika miroaroa manahaky afo io ty fanomeza namea antsika, arovantsika ze raha nankiny tamintsika, le ampianarintsika olo hafa ze raha iaby haintsika. Afaky ‘hanatanteraky soa ty fanompoantsika’ tsika amy zay, manahaky nivolanini-Paoly tamy Timoty iny.​—2 Tim. 4:5.