OYAWOKAKƐ ngetemo, ntsha ombowa onkanda ɔmɔtshi wokeketshɛ me ilongo yɛko yɛ nsɔsɔlɔ? Timɔte kanga loyalaki ombeki w’Okristo wɔ nsɔsɔlɔ awaka onkanda wɔ nghɔsɔ me ɔpɔstɔlɔ Poolo, onkanda welá Bible wetawɔ lɔɔko 2 Timɔte. Ipa l’ehamo Timɔte ahonaka mbala kɛkɔ kɛmɔ etena kɛ vu kɛ nde mbala onkanda wofundelisa ilongo yɛnde yɛ ngandji yɛsɔ. Mbala imɔtshi Timɔte atateyɛka ndjawopola ante: ‘Poolo alekɔ ngo vu? Ɔkɔpande nde mpɛyɛ lemi alako amɔtshi walendana l’edjito wɛmi? Onkanda wɔnɛ nkoka nkotshɛ lemi djɛ ndonga l’olemo wɔmi w’Okristo edjinge nkotshɛ anto ankina?’ Etengo ɔkɔpaso nyɛna, Timɔte awaka nsakiso lá weepó wɛnde wɛsɔ edjinge lá weepó enkina m’onkanda wɔ djonyi wɔsɔ. Koko, tɔkɔpa ndeka ndjila yimba l’alako amɔtshi wa djonyi walekɔ l’onkanda wɔkɔ.

Wina wɔ Timɔte nyotateyɛ mbala etepela w’ewangelo we l’onkanda wɔsɔ, mbala kɛkɔ kɛmɔ nde asipisoyɛka djokanelo djɛ mama djɛ nyoyalaka nyande. La ngandji kenkfumɔ, Poolo owetaka ante ‘wɔnɛmi wɔ ngandji.’ (2 Ti. 1:2) Mbala imɔtshi Timɔte ayalaka l’ɛnɔnyi 30 la ndjakfe wina wɔ nyolongola onkanda wɔsɔ, t’ɔnɔnyi 65 Ɛ.K., lasɔ ko nde, amboshiyɛka ndjala ikokolo y’Okristo yelekɔ la balo. Nde aheetaka nya Poolo l’ila k’ɛnɔnyi ndekana djomi edjinge nde ewaka akambo efula mende.

Timɔte ayalaka ladjɛ nkeketshama efula má ndjewa djɛ Poolo akfulumeyɛki ndjolo la nkɔmano nkfumɔ. Poolo ayalaki lá lokando l’Ɔrɔma, nkolama la mulɔla edjinge ayalaki entshupa la ndjakema. (2 Ti. 1:15, 16; 4:6-8) Timɔte akokaka nyɛna djɛ ɔpɔstɔlɔ wɔsɔ ayalaki l’oloko wolo, m’etepela wɛnde wɛ ndatepela ante: ‘Ndekɔ nkfulumeyɛ akambo ankfumɔ.’ (2 Ti. 2:8-13) Lá ndjɔmbɔmba kɛ Timɔte, iso nkoka nkeketshama má ndjɔmbɔmba kɛ wɔlɔ kɛ Poolo kelendana l’okfulumeyelo.

Poolo akeketshɛka Timɔte djɛ ndjɔsa odjito woyalaki lande l’olemo wɔ Ndjambe la ntshó efula. Poolo akɔpaki djɛ Timɔte ‘mpɛtshapɛtshɛ opapɛyɛ wɔ ndalongola me Ndjambe’ etengo iyɛ. (2 Ti. 1:6) Poolo akambaka l’itepela khaʹri·sma lá nkambo djelendana ‘l’opapɛyɛ.’ Itepela ye lá Ngirika yɛsɔ ndendanaka ntondo ntondo l’opapɛyɛ w’ofele la wɔpɛlama onto ndolongola ntepela ente enkete k’onto ndop’ɛdje djɛ mba. Timɔte awaka opapɛyɛ wɔsɔ wina ndasɔnama djɛ nkambela otshumano lá yopo yetshikitanyi.​—1 Ti. 4:14.

 Kɛkɔnge kɛ Timɔte ndayale ladjɛ nangha l’opapɛyɛ wɔsɔ? Wina nyawale otepela wotepela ente ‘pɛtshapɛtshɛ etengo iyɛ,’ mbala imɔtshi nde akokaka nkanela iyɛ yɔpɛtshɛwɔ lá mvulu yelongalonga etengo iyɛ y’akalanga. Akalanga wasɔ wakokaki ntshumanyema djɛ mposɛ loombe l’eyayɛ efula. Diksiɔnɛrɛ mɔtshi ntepelaka ante, vɛrbɛ ye lá ngirika (a·na·zo·py·reʹo) yekambisa la Poolo lanɛ, nsakisolaka ‘mpɛtshɛ iyɛ, ntshindjeyɛ iyɛ, kana nangha djɛ mposɛ loombe,’ djɛko ndeke lá wopo wɔ djingingi itepela yɛsɔ nsakisolaka ‘nsasanga edjinge ndjala l’osalosalo l’olemo ɔmɔtshi.’ Alekɔ etengo, Poolo alakaka Timɔte ante: ‘Yapɛyɛ tshɛ l’odjito wɔko!’ Lɔɔko kɛnɛ iso ladjɛ nangha wopo wɔk’ɔmɔ, ntepela ente ndjala l’osasalo l’olemo wɔso.

Wina wɔ nyotetemala mbala onkanda wɔ me ilongo yɛnde yɛ ngandji yɛsɔ, Timɔte akomaka l’itepela inkina yekokisa ndokotshɛ djɛnde ndonga l’olemo wɔnde. Poolo afunaka ante: ‘Womba nkete djɛ ntshó dj’iyɔkɔpɛyɛ má lotshimbo lɔ nyuma k’ekina kelekɔ leso.’ (2 Ti. 1:14) Nkete djɛkɔnge djɛsɔ? Nkete djɛkɔnge djɛ ntshó dj’iyapɛyɛ Timɔte djɛsɔ? Lá vɛrse djemá djiko, Poolo atepelaka nkambo djɛ ‘etepela wɛ djɔ’ ntepela ente, akambo wa nsɔsɔlɔ welá Afunelo. (2 Ti. 1:13) Etengo nyayalaka osambisha w’Okristo, Timɔte alakanyɛki anto we l’otshumano kana we l’andja w’otshumano akambo wa nsɔsɔlɔ. (2 Ti. 4:1-5) Lonkina, Timɔte asɔnamaka etengo ikokolo, djɛ namaka ɛnkɔkɔ wɛ Ndjambe. (1 Pɛ. 5:2) Timɔte ayalaka la djɛ mbomba akambo wa ntshó w’iyolakanyɛ wasɔ, ntepela ente akambo wa nsɔsɔlɔ w’indayale ladjɛ ndakanyɛ anto lá ndawɛkɛ lá nyuma k’ekina kɛ Yehova edjinge Otepela wɔnde.​—2 Ti. 3:14-17.

Lɔɔko kɛnɛ, edjinge iso watɔpɛyɛka akambo wa nsɔsɔlɔ w’olakanyɛso anto ankina. (Mat. 28:19, 20) Iso nkokaka nkindjɛ ndjala la djedjɛ l’akambo wa ntshó w’iyatɔpɛyɛ wasɔ lá nkindjɛka ndɔmbaka edjinge ndjala la nonghanyi kɛ wɔlɔ kɛ nkindjɛka ndjekaka Otepela wɔ Ndjambe. (Ɔrɔ. 12:11, 12; 1 Ti. 4:13, 15, 16) Nkoka ndjala ko tolekɔ l’edjito enkina, ndjɔmbɔmba nkamba etengo ikokolo kana nkamba l’olemo wɔ djena nkfumɔ. Kɛnɛ k’iyatɔpɛyɛ kɛsɔ la djɛ ntotshinda djiso ndjala l’okitshakitshɛ edjinge ndaawɛkɛ te Ndjambe. Djɛkondeke iso nkoka mbomba kana nkokeyɛ kɛnɛ k’iyatɔpɛyɛ kɛsɔ edjinge ndaawɛkɛ te Yehova djɛ nde ntokotshɛ dj’ipa iso ntshutshɛ.

Odjito onkina woyalisa la Timɔte nde, nkfumba anto ankina dj’iwɔ nkambaka olemo w’indakambaka. Djɛkondeke, Poolo akembɛka Timɔte ante: ‘Akambo wangoke me lemi . . ., pɛyɛwɔ le ampame yelekɔ la nkɔmano, ko edjinge iwɔ, wangoyala l’akoka ankfumɔ walɔmbama, djɛ ndakanyɛ anto ankina.’ (2 Ti. 2:2) Lá nsɔsɔlɔ, Timɔte ekaka akambo me Akristo ankina edjinge nde ayalaka ladjɛ ndakanyɛ anto ankina. Alekɔ djonyi efula djɛ anami ankfumɔ wel’antenyi k’otshumano w’Akristo lɔɔko kɛnɛ, ndjila welo djɛ nangha wopo wɔk’ɔmɔ. Onami wɔ nsɔsɔlɔ apawombe akambo w’ewande walendana l’odjito ɔmɔtshi, koko nde ndakanyɛka anto ankina l’okoma w’iwɔ ndjala l’akoka wa nkamba olemo wɔkɔ. Nde, apoke wɔma ante iwɔ nkoka ndeewa akambo ndoleka kana ndoyala l’akoka waleka wande. Djɛkondeke onami apakome ngo lá ndakanyɛ tokakambo tolendana l’olemo ɔmɔtshi. Nde nkɔpaka nkotshɛ wanɛ wɔsɔnande dj’iwɔ ndjala l’ekanedji kɛ wɔlɔ edjinge la ntɔnɔ ntepela ente nfula lá nyuma. Má nangha nghɔsɔ, otshumano mbaka wapɔ efula me ‘ampame yelekɔ la nkɔmano’ y’okfumbande.

Ipa l’ehamo Timɔte ɔsaki onkanda wokeketshɛ w’ime Poolo wɔsɔ l’odjito efula. Iso nkoka nkanela mbala kɛkɔ kɛmɔ wopo wɔ Timɔte nyowalaka onkanda wɔsɔ mbala la mbala edjinge ndananghaka la wolo djɛ nkamba l’alako wakɔ djɛnde nkotshɛ edjito wɛnde.

Edjinge iso nkoka nkamba l’alako wasɔ. Ngetemo? Iso nkoka nangha la wolo djɛ mpɛtshapɛtshɛ opapɛyɛ wɔso etengo iyɛ, djɛ mbomba kɛnɛ k’iyatɔpɛyɛ edjinge ndakanyɛ anto ankina akambo w’ewaso. Lá nangha nghɔsɔ, etengo Poolo ndashimela Timɔte, iso nkoka ‘nkotshɛ olemo wɔso wɔlɔ.’​—2 Ti. 4:5.