OPUSHAA naminyi nsaa y’opete mukanda aukunyingisha aufiki kwi kuuku obe? Timote badi mupete mukanda wi bino kwi Mpoolo, mukanda wa mu Bible w’atuwuku lelo uno bu mukanda wa 2 Timote. Kushi mpaka, Timote badi mukimbe mbalo i buwa bwa kubadika bibadi bifunde kuuku aye a p’eshimba. Pangi badi eyipusha’shi: ‘Mpoolo akyebe kwakula kinyi? Akyebe kumpa elango adinkwasha mu mudimo wande su? Uno mukanda aunkwasha bwa kobesha mudimo wande wa bwina Kidishitu na kukwasha bangi su?’ Nka bu byatumono, Timote badi mupete ngaluulo ku ino nkonko na ku ingi mu uno mukanda wi na muulo. Anka bwa binobino, tubandeyi kutaluula angi malango e mu uno mukanda aetukwasha.

Nsaa ibadi Timote mubangye kubadika uno mukanda, bamwene mushindo ubadi Mpoolo amupasukila. Na muloo oso, Mpoolo amwitamina bu “mwan’ande a kifulo kikata.” (2 Tim. 1:2, EEM) Timote badi mupete uno mukanda pabadi na bipwa pangi bikile 30, pangi mu kipwa kya 65 B.B., na tabadi mupwe kwikala mukulu mu kakongye munyingye mu kikudi. Tabadi mupwe kwikala na Mpoolo munda mwa bipwa bi bungi na kulongyela bi bungi kwadi.

Timote badi munyingishibwe ngofu pakumona’shi Mpoolo kwete kunyingila nkalakashi na lulamato loso. Mpoolo badi mu lukano mu Looma na kubadi kushale mafuku apeela bwa’shi bamwipe. (2 Tim. 1:15, 16; 4:6-8) Timote badi mumone’shi Mpoolo munyingy’eshimba mwanda bafundjile’shi: ‘Nanyingamana mu byabya byoso.’ (2 Tim. 2:8-13, EEM) Nka bu Timote, kileshesho kya Mpoolo kya kunyingila nkilombene kwitunyingisha.

Mpoolo badi munyingishe Timote bwadya kumona mudimo w’Efile Mukulu bu wi na muulo ngofu. Mpoolo badi akumiina’shi Timote a ‘shiisakanye kya buntu . . . ky’Efile Mukulu’ kibabadi bamupe. (2 Tim. 1:6, Kilombeeno kipya 2014) Mpoolo badi mufubishe kishima khaʹri·sma bwa kwakwila “kya buntu.” Kino kishima kya mu kina Greke, akilesha kya buntu kishi kitulombene. Timote badi mupete kino kya buntu nsaa ibabadi bamusangule bwa kukwasha kakongye mu mushindo wi pabwao.​—1 Tim. 4:14.

 Timote badya kukita kinyi na kino kya buntu? Nsaa ibadi mubadikye pabitale kishima “kushiisakanya” badi pangi munangushene ku kalo kabelaa mu nshibo akashalaa penda makala aatembe. Bwashi ano makala atushe ndimi na kalo ke bukopo, abitungu kwi ashiisakanya. Ungi mukanda aupatulaa bishima awamba’shi, kishima kya mu kina Greke (a·na·zo·py·reʹo) kibadi Mpoolo mufubishe akilesha “kutembesha dingi, kupupula bwa’shi ndjimi ya kalo itembe,” mbebifubishe mu ngakwilo a mu kifwanyi bwa “kutakula muntu bwa’shi ekale na kisumi kya kukita mudimo kapanda.” Byabya Mpoolo badi akyebe kulungula Timote’shi: ‘Ikala na kisumi ku mudimo oobe!’ Lelo uno twi na lukalo lwa kukita nka byabya​—kwikala na kisumi ku mudimo wetu.

Pabadi Timote atungunuka ka kubadika mukanda wa kuuku’aye a p’eshimba, bafikile pa kishima akimukwasha bwa koobesha mu mudimo waye. Mpoolo bafundjile’shi: “Lama [kino] kituudilo kibuuwa pa kikudi kiselele kishale mwatudi.” (2 Tim. 1:14, Esambi dipya 2015) Kituudilo kibadi akilesha kinyi? Kintu kinyi ki na muulo kibabadi bape Timote? Mu verse e kumpala, Mpoolo akwila “mayi ebuwa,” bya binyibinyi bi mu Bifundwe. (2 Tim. 1:13, Esambi dipya 2015) Mwanda Timote badi mulungudi mwina Kidishitu, badi na kya kulongyesha bya binyibinyi mu kakongye mpa na mu teritware aye. (2 Tim. 4:1-5) Na dingi, Timote abadi bamutule bu mukulu, bwa kulama lombe lw’Efile Mukulu. (1 Mp. 5:2) Timote badi na kya kulama kituudilo kyaye​—kwamba’shi bya binyibinyi bibadi alongyesha​—pakukulupila bukwashi bwa kikudi kiselele kya Yehowa na Mwiyi dyaye.​—2 Tim. 3:14-17.

Lelo uno, natwe namu mbetupe bya binyibinyi byatukwete kulongyesha bangi mu bulungudi. (Mat. 28:19, 20) Atulesha lutumbu bwa bino bya binyibinyi bi na muulo, pa kutungunuka na kuteka, na kwikala na kyubishi ki buwa kya kwilongyela Eyi dy’Efile Mukulu. (Lom. 12:11, 12; 1 Tim. 4:13, 15, 16) Dingi, twi kupeta angi mashito bu kufuba bu mukulu mu kakongye sunga mu mudimo wa nsaa yoso. Patukumbasha ino midimo i na muulo, twikale beyishe na tukulupile mu bukwashi bwa Yehowa. Byabya twi balombene kulama kino kituudilo sunga kwikikalwila na kukulupila bukwashi bwa Yehowa bwa’shi twikipasukile kalolo.

Timote badi na kya kulongyesha bangi byabadya kukita mudimo ubadi akitshi. Nyi bwa kinyi Mpoolo badi mumunyingishe’shi: “Byabya bibompushishe na lambukisha . . . webilambukishe namu bangi bantu be kishima, abeûku bya kwibilambukisha namu bangi.” (2 Tim. 2:2, EEM) Mpoolo badi mutentekyeshe Timote bwadya kulongyesha bangi bakwetu balume myanda yoso ibadi mulongye. Lelo uno, bi na muloo bwa’shi mukulu oso mu kakongye etatshishe bwa kukita nka byabya. Mukulu e buwa, tabitungu afwamishe bangi myanda yauku pabitale mudimo wakitshi nya. Anka alongyeshe bangi bwabadya kwikala na ngobesha ya kukita wawa mudimo. T’atshinaa’shi tala beuka bi bungi, sunga’shi bekala na ngobesha i bungi ya kwiukita kumukila. Byabya, mukulu t’ebalongyesha penda myanda ipelepele pabitale wawa mudimo. Akumiina kwibalongyesha bwa’shi bekale na mweneno e buwa bwa wawa mudimo na kapatupatu bwa’shi banyingye mu kikudi. Mu wawa mushindo, akwasha “bantu be na kishima” badi mulongyeshe bya kukwasha kakongye ngofu.

Kushi mpaka, Timote badi musankile uno mukanda wibuwa ubadi Mpoolo mumutumine. Twi kupwandjikisha bibadi abadika ano malango e buwa misango na misango na kunangushena mushindo wi buwa wa kulombasha midimo yaye.

Natwe namu abitungu tutumikile dino elango. Mushindo kinyi? Abitungu tukite mwetu moso bwa kushiisakanya kya buntu ki bu kalo, kulama kituudilo na kulongyesha bangi byoso byatwiuku. Su tubakitshi bino, nka bu bibadi Mpoolo mwibilungule Timote, ‘atulombasha kalolo mudimo [wetu].’​—2 Tim. 4:5, EEM.