UNFA i ta fii te wan mati fii manda wan biifi da i di ta da i taanga? Wë Timoteo bi feni sö wan biifi, nöö apösutu Paulosu hën bi mandëën dëën. Di biifi dë da di Bëibel buku de ta kai 2 Timoteo. A musu u dë sö taa Timoteo bi suku wan piii kamian sö taa a bi sa lesi andi di mati fëën bi kë piki ën. Kandë Timoteo bi ta hakisi hënseei taa: ’Unfa a nango ku Paulosu? A o piki mi soni di sa heepi mi ku di wooko di mi musu du ö? Di soni di a o piki mi aki o heepi mi u mi du di peleikiwooko möön bunu, söseei a o heepi mi u mi sa heepi woto sëmbë a wan möön bunu fasi ö?’ Wë abiti möön woo si taa Timoteo bi feni piki a dee hakisi aki. Söseei woo si taa a bi feni woto soni jeti, a di apaiti biifi di Paulosu bi manda dëën dë. A di woto aki, woo taki u soni di sikifi a di biifi aki di sa heepi u.

Di Timoteo bi bigi lesi di biifi, nöö a bi sa fii wantewante unfa Paulosu bi ta booko hën hedi ku ën tjika. A di biifi, Paulosu bi kai Timoteo wan ’mii di a lobi gaanfa’ (2 Tim. 1:2). Timoteo bi kisi di biifi aki a wan pisiten u di jaa 65 Baka Keesitu. A kan taa Timoteo bi pasa 30 jaa, nöö a bi dë wan gaanwomi u kemeente di bi abi öndöfeni. Möön leki 10 jaa longi a bi ta wooko makandi ku Paulosu, nöö a bi lei sömëni soni nëën.

Timoteo bi musu u wai u jei taa Paulosu bi ta hoi dou hii fa gaan fuka bi ta miti ën. Paulosu bi dë a dunguwosu a Loomë, nöö an bi o tei longi möön, nöö de bi o kii ën (2 Tim. 1:15, 16; 4:6-8). Timoteo bi sa si taa Paulosu bi abi degihati, u di a bi taki taa: „Mi dë tifihedi u tja hii fuka” (2 Tim. 2:8-13). Useei sa feni taanga u di fasi fa Paulosu bi hoi dou, leti kumafa Timoteo bi feni taanga a di soni dë.

Paulosu bi piki Timoteo faa si di wooko di Gadu bi dëën kuma wan gaan gudu. Paulosu bi kë taa Timoteo bi musu ’böö faja da di köni di Gadu bi dëën’ (2 Tim. 1:6). Paulosu bi wooko ku di Giiki wöutu de kai khaʹri·sma, di a bi taki ’köni di Gadu bi da Timoteo’. Di Giiki wöutu aki kë taki wan soni di wan sëmbë ta feni u sösö. Na wooko a wooko dëën. Timoteo bi feni di soni aki, di de bi butëën faa dini di kemeente a wan apaiti fasi.​—1 Tim. 4:14.

Andi Paulosu bi ta piki Timoteo faa du ku di soni aki? Kandë di a bi jei dee wöutu „böö faja dëën”, nöö kandë a bi ta pakisei dee faja dee sëmbë  bi ta mbei a de pisi. So juu di faja bi ta tapa, nöö dee zonka bi ta fika kendikendi. De bi musu böö faja da dee zonka sö taa de bi sa kisi faja. Wan wöutu buku ta taki taa di Giiki wöutu (a·na·zo·py·reʹo) di Paulosu bi kai, kë taki „böö faja dëën be a kisi”. Di soni aki kë taki taa u musu kë „du wan wooko fajafaja”. Ee fuu taki ën, nöö Paulosu bi ta piki Timoteo taa: ’Du di wooko ku hii i hati!’ Useei musu du di soni aki. U musu du di diniwooko fuu ku hii u hati tu.

Di Timoteo bi ta lesi di biifi go dou, hën a bi si taa Paulosu bi taki wan woto soni di bi o heepi ën faa sa du di diniwooko fëën a wan möön bunu fasi. Paulosu bi taki taa: ’Di gaan bumbuu soni di Masa Gadu futoou i te a butëën a i maun naandë, womi, i musu köni ku ën gaanfa e. I musu ta tjubi ën ku di heepi u di jeje u Gadu di i si ta libi a u hati aki, be an kaba a sösö’ (2 Tim. 1:14) Andi Gadu bi da Timoteo? Wë te u luku di vers a fesi, nöö Paulosu bi taki taa a dë „dee lei” dee dë a di Wöutu u Gadu (2 Tim. 1:13). U di Timoteo bi dë wan sëmbë di ta lei wotowan soni, mbei a bi musu lei dee sëmbë u di kemeente, ku dee sëmbë dee a bi ta miti a di peleikiwooko tuu, soni u di tuutuu lei (2 Tim. 4:1-5). Boiti di dë, Timoteo bi dë wan gaanwomi, nöö a bi musu heepi dee sikapu u Gadu (1 Pet. 5:2). Timoteo bi o sa tjubi di soni di Gadu bi dëën, nasö a bi o sa tjubi dee tuutuu lei, te a bi o ta da pasi taa di Wöutu u Jehovah, ku di santa jeje fëën heepi ën.​—2 Tim. 3:14-17.

Wë Gadu da u di seei soni tu. A da u di wooko fuu konda soni u di tuutuu lei da sëmbë (Mat. 28:19, 20). Nöiti u musu fëëkëtë unfa dee soni dee u ta konda da wotowan dë apaiti tjika. Fëën mbei u musu ta begi hii juu, söseei hii juu u musu ta lei soni a di Wöutu u Gadu (Lom. 12:11, 12; 1 Tim. 4:13, 15, 16). Kandë u dë gaanwomi u kemeente, nasö kandë u ta du di hii-ten diniwooko. Ee sö, nöö dee lö gaandi dë musu mbei u abi sakafasi, söseei de musu mbei u ta suku heepi a Gadu hii juu. U sa tjubi di gudu di Jehovah da u, te u ta tei ën u bigi, söseei te u ta suku heepi a Jehovah, u di u kë taa a musu heepi u fuu tjubi di gudu di a da u a wan bunu fasi.

Timoteo bi musu toona lei woto sëmbë di wooko di a bi ta du. Fëën mbei Paulosu bi piki Timoteo taa: „Mi bi lei i . . .  sömëni soni, nöö i musu toona tei dee soni dë ta lei bumbuu sëmbë dee ta abi köni tjika u toona lei oto sëmbë tu” (2 Tim. 2:2). Paulosu bi mëni Timoteo taa a bi musu lei dee woto baaa hii dee soni dee a bi lei. A dë fanöudu taa hiniwan gaanwomi u wan kemeente du di soni aki tu. Wan bunu gaanwomi an ta hoi dee soni dee a sabi da hënseei. Ma a ta lei wotowan dee soni dë, sö taa deseei sa du di wooko di a ta du. An ta fëëë taa de o ko sabi möön soni möön hën, nasö taa de o sa du di wooko möön bunu. Fëën mbei wan gaanwomi an o ta lei wotowan wantu soni nöö. A musu heepi dee sëmbë dee a ta lei soni, u de fusutan wan soni bumbuu, söseei u de ko dë gaangaan sëmbë a di biibi. A sö wan fasi dee woto baaa dee a ta lei soni o sa heepi dee sëmbë u di kemeente a wan möön bunu fasi.

An dë u taki taa Timoteo bi tei di biifi di Paulosu bi manda dëën, u bigi. U sa pakisei fa a bi o ta lesi di biifi aki sömëni pasi, söseei fa a bi o ta pakisei fundu u di fasi fa a bi sa wooko ku dee soni di Paulosu bi piki ën, a di diniwooko fëën.

Useei kë wooko ku dee soni di Paulosu taki a di biifi. Unfa u sa du di soni aki? Wë u musu mbei möiti u böö faja da di köni di Gadu da u, u musu tjubi di gudu di Gadu da u, söseei u musu lei wotowan hii soni di u sabi. A sö wan fasi, woo sa du hii soni di Gadu buta da u fuu du a di wooko.​—2 Tim. 4:5.