FA YU e firi te yu kisi wan brifi fu wan bun mati? Timoteyus ben kisi so wan brifi fu na apostel Paulus. Wi sabi a brifi dati leki a Bijbel buku 2 Timoteyus. A musu fu de so taki di Timoteyus kisi a brifi a no ben man wakti fu go na wan tiri presi pe a ben kan leisi en. Kande Timoteyus ben aksi ensrefi: ’Fa a e go nanga Paulus? Sortu rai a abi gi mi? A kan yepi mi fu si mi diniwroko na a yoisti fasi? A rai fu en o yepi mi fu de wan moro bun leriman èn fu yepi trawan?’ Wi o si taki Timoteyus kisi piki tapu ala den aksi disi na ini a moi brifi di a kisi fu Paulus èn taki a leri tra prenspari sani tu. Ma wi luku fosi sortu bun rai a brifi disi abi gi wi.

Di Timoteyus bigin leisi a brifi, a ben kan si taki Paulus ben lobi en. Paulus ben kari en „wan lobi pikin” (2 Tim. 1:2). Timoteyus kisi a brifi disi na ini a yari 65. A pisi ten dati a ben pasa 30 yari kaba èn a ben de wan owruman wan pisi ten kaba. Moro leki tin yari a ben wroko makandra nanga Paulus èn a ben leri furu fu en.

A musu fu de so taki Timoteyus kisi deki-ati di a yere taki Paulus ben horidoro awinsi fa a ben kisi tesi. Paulus ben de na strafu na ini Rome èn a ben sabi taki den feanti fu en ben o kiri en (2 Tim. 1:15, 16; 4:6-8). Ma toku Paulus no ben gi abra. Timoteyus ben si taki Paulus ben abi deki-ati fu di a ben taki: „Awinsi san e miti mi, mi e horidoro” (2 Tim. 2:8-13). Na moi eksempre fu Paulus ben gi Timoteyus deki-ati èn a kan gi wi deki-ati tu.

Paulus ben wani taki Timoteyus warderi a grani di a ben kisi fu Yehovah. A ben taigi en fu „no wisiwasi san Gado gi [en]” (2 Tim. 1:6). Den wortu „san Gado gi yu” na wan vertaling fu a Griki wortu karisma. A Griki wortu disi abi fu du nanga wan kado di wan sma e kisi aladi a no e frudini en. Timoteyus kisi a kado disi di a kisi a spesrutu grani fu dini na ini a gemeente.​—1 Tim. 4:14.

San Paulus ben wani taki Timoteyus du nanga a kado disi? Fu taki en leti,  Paulus ben taigi Timoteyus: ’Du yu wroko fayafaya!’ Neleki fa wan sma e tan poti udu gi wan faya noso a e tan wai en so taki a no dede, na so Timoteyus ben musu tan du sani fu du en wroko fayafaya. Na ini a ten disi, wi srefi musu du a wroko fu Yehovah fayafaya.

Na ini a brifi Paulus taki wan tra sani di yepi Timoteyus fu du en wroko na ini a gemeente moro bun. Paulus ben taki: „Meki a santa yeye di de na ini wi, yepi yu fu kibri a gudu disi di yu ben kisi” (2 Tim. 1:14). Sortu gudu Timoteyus ben kisi? Na ini vers 13 Paulus e taki fu a „soifri leri” (2 Tim. 1:13). Dati na den tru leri na ini Bijbel. Timoteyus ben musu gi leri na ini a gemeente èn a ben musu gi leri na sma di no ben sabi Yehovah ete (2 Tim. 4:1-5). Boiti dati, a ben de wan owruman di ben musu luku den skapu fu Gado (1 Petr. 5:2). Timoteyus ben o man gi sma leri te a ben frutrow tapu a santa yeye fu Yehovah èn tapu Gado Wortu. Na so a ben o kibri a gudu di a ben kisi.​—2 Tim. 3:14-17.

Na ini a ten disi wi srefi musu gi sma leri (Mat. 28:19, 20). Wi kan sori taki wi e warderi a gudu disi te wi abi a gwenti fu begi èn fu studeri Bijbel (Rom. 12:11, 12; 1 Tim. 4:13, 15, 16). Kande wi e dini tu leki owruman noso wi e du a furuten diniwroko. Efu wi abi so wan grani, wi musu abi sakafasi èn wi musu frutrow tapu Yehovah fu yepi wi nanga wi diniwroko. Te wi e warderi a grani di wi abi èn te wi e frutrow tapu Yehovah fu yepi wi fu tyari a frantwortu fu wi, dan wi e kibri a gudu fu wi.

Boiti taki Timoteyus ben musu du en wroko na ini a gemeente, a ben musu leri tra brada fu du a wroko tu. Dati meki Paulus ben taigi en: ’Fruteri den man di e gi yesi na Gado ala ten, den sani di mi taigi yu, dan den man disi srefi o kon koni nofo fu gi tra sma leri’ (2 Tim. 2:2). Iya, Paulus ben memre Timoteyus fu leri den tra brada ala sani di ensrefi ben leri. Na ini a ten disi a prenspari taki owruman du a sani disi tu. Wan bun owruman no e hori en koni gi ensrefi. Na presi fu dati a e leri trawan fa den kan tyari frantwortu na ini a gemeente. A no e frede taki den o sabi moro en noso taki den o du a wroko moro bun. Ma a e sori den finifini fa den kan du den wroko na ini a gemeente. A wani taki den leri fu teki koni bosroiti èn taki den tron lepi Kresten. Te a e du dati, den brada disi o de wan bigi yepi na ini a gemeente.

Wi de seiker taki Timoteyus ben breiti nanga a brifi di a ben kisi. A musu fu de so taki a leisi a brifi disi furu leisi baka èn taki a ben prakseri fa a ben kan fiti den rai fu Paulus.

Wi srefi wani teki a rai fu Paulus. Fa wi kan du dati? Wi musu du wi diniwroko fayafaya, wi musu kibri a gudu di Yehovah gi wi èn wi musu leri trawan ala san wi sabi. Te wi e du den sani disi, dan wi o man „du [wi] wroko finifini”.​—2 Tim. 4:5.