UTIVA njani nawutfola incwadzi lekukhutsatako levela kumngani wakho? UmKhristu lokutsiwa nguThimothi watfola incwadzi lenjalo levela kumphostoli Pawula, lencwadzi siyati ngekutsi ngu-2 KuThimothi. Siyaciniseka kutsi Thimothi bekakulangatelela kutfola indzawo lethulile lapho bekatawufundza khona lencwadzi levela kumngani wakhe. Mhlawumbe Thimothi bekatibuta kutsi: ‘Unjani Pawula? Ngusiphi seluleko lafuna kunginiketa sona mayelana nendlela lokufanele ngitente ngayo tabelo tami? Leseluleko singangisita yini kutsi ngishumayele futsi ngisite nalabanye?’ Njengobe sitawubona, Thimothi watitfola timphendvulo temibuto lebekanayo kanye nalokunye lokunyenti kulencwadzi lebalulekile. Kulesihloko, sitawucoca ngeseluleko lesilusito lesitfolakala kulencwadzi.

Ngesikhatsi Thimothi afundza emavi ekucala alencwadzi, washeshe wabona kutsi Pawula bekamkhatsalela mbamba. Pawula wambita ngekutsi ‘ungumntfwana lotsandzekako.’ (2 Thim. 1:2) Thimothi watfola lencwadzi cishe ngemnyaka wa-65 C.E., kungenteka besekaneminyaka lengu-30 budzala futsi angumKhristu losanesikhatsi. Besekasebente naPawula iminyaka lengetulu kwalengu-10 futsi sekafundze lokunyenti kuye.

Kungenteka Thimothi wakhutsateka kakhulu nakeva kutsi Pawula bekabeketelela tinkinga letinyenti lebekabhekana nato. Pawula bekaboshiwe eRoma futsi besekatawubulawa. (2 Thim. 1:15, 16; 4:6-8) Thimothi wabona kutsi Pawula bekanesibindzi ngobe watsi: “Ngichubeka ngibeketelela tonkhe tintfo.” (2 Thim. 2:8-13) NjengaThimothi, natsi kubeketela kwaPawula kungasicinisa.

Pawula wakhutsata Thimothi kutsi abuke sabelo sakhe lesivela kuNkulunkulu njengalesiligugu. Pawula bekafuna kutsi Thimothi ‘asente sivutse njengemlilo sipho lebekasemukela kuNkulunkulu.’ (2 Thim. 1:6) Pawula wasebentisa ligama lesiGriki lelitsi khaʹri·sma nakakhuluma ‘ngalesipho.’ Leligama lesiGriki lisho sipho lositfole mahhala. Thimothi watfola lesipho ngesikhatsi akhetfwa kutsi  akhonte libandla ngendlela lekhetsekile.—1 Thim. 4:14.

Yini Thimothi lobekufanele ayente ngalesipho? Nakacabanga ngemavi latsi ‘avutse njengemlilo,’ kungenteka bekacabanga ngemlilo loba khona emakhaya lovutsa kuze kusale emalahle. Lomlilo kudzingeka uwukhwetele kuze kuhlale kunelilangabi futsi ushisa. Lesinye sichaza magama sitsi lesento sesiGriki lesashiwo nguPawula lesitsi (a·na·zo·py·reʹo) sisho “kuvusetela nobe kwenta intfo kutsi ibe nemalangabi,” lokusho kuba nemdlandla ngemsebenti lotsite. Ecinisweni Pawula bekatsi kuThimothi: ‘Timisele esabelweni sakho!’ Lamuhla natsi kufanele sente lokufanako, sitimisele etabelweni tetfu.

Kulencwadzi, Pawula washo intfo lebeyitawusita Thimothi kutsi aphumelele emsebentini wakhe. Pawula wabha watsi: “Lelifa lowanikwa lona lilondvolote ngemoya longcwele lohlala kitsi.” (2 Thim. 1:14) Beliyini lelifa? Nguyiphi intfo leligugu Thimothi lebekanikwe yona? Evesini lelingemuva, Pawula wakhuluma ‘ngemavi laphilile’ lokuliciniso lelitfolakala emiBhalweni. (2 Thim. 1:13) Njengemshumayeli longumKhristu, Thimothi bekufanele ashumayele liciniso kubazalwane nabodzadze ebandleni nakulabanye bantfu. (2 Thim. 4:1-5) Ngetulu kwaloko, Thimothi bekangulomdzala welibandla futsi bekufanele eluse umhlambi waNkulunkulu. (1 Phet. 5:2) Thimothi bekangalilondvolota leliciniso, lokuliciniso lebekufanele alifundzise labanye ngekutsi etsembele emoyeni longcwele waJehova naseVini laKhe.—2 Thim. 3:14-17.

Lamuhla, natsi sinikwe liciniso lokufanele silifundzise labanye. (Mat. 28:19, 20) Singakhombisa kutsi siyabonga ngalelifa lesiphiwe lona ngekutsi sichubeke sithantaza futsi sifundze liVi laNkulunkulu onkhe malanga. (Rom. 12:11, 12; 1 Thim. 4:13, 15, 16) Singase sibe naletinye tabelo njengekuba ngulomdzala ebandleni nobe kuba sisebenti sasikhatsi sonkhe. Lifa lelinjalo kufanele lisente sitfobeke futsi setsembele kuNkulunkulu kutsi asisite. Ngako singalilondvolota nobe silivikele ngekutsi setsembele kuJehova kutsi asisite kuze siliphatse kahle.

Tabelo Thimothi lebekatitfola betingatsintsi yena kuphela. Kodvwa betitsintsa nalabanye. Kungako Pawula wakhutsata Thimothi watsi: “Tintfo lowativa kimi . . . tiphatsise emadvodza letsembekile, nawo latakufanela kahle kufundzisa labanye.” (2 Thim. 2:2) Pawula wakhumbuta Thimothi kutsi atifundzise labanye bazalwane letintfo lebekatifundzile. Kubalulekile kutsi bonkhe labadzala emabandleni bente intfo lefanako. Lomdzala welibandla lokahle akakufihli loko lakwatiko ngesabelo lesitsite. Kunaloko, ufundzisa labanye kuze nabo batawukhona kusenta leso sabelo. Akesabi kutsi kungenteka bati lokunyenti nobe basente kancono kunaye leso sabelo. Ngako lomdzala akabafundzisi nje kuphela tintfo letimbalwa letiphatselene naleso sabelo. Ufuna kutsi labo labaceceshako bakhone kwehlulela kahle, babe nekucondza futsi basondzelane kakhulu naNkulunkulu. Loko kutawenta kutsi ‘lamadvodza letsembekile’ lawaceceshile akhone kusita libandla ngetindlela letinyenti.

Siyaciniseka kutsi Thimothi wayijabulela lencwadzi lebeyivela kuPawula. Siyambona ngeliso lengcondvo ayifundza ngalokuphindzaphindziwe futsi acabanga ngekutsi angasisebentisa njani seluleko lesikuyo nakenta tabelo takhe.

Natsi sifuna kusisebentisa leseluleko. Kanjani? Singatimisela kuze sente sipho setfu sivutse njengemlilo, silondvolote lifa letfu futsi sifundzise labanye konkhe lesikwatiko. Nasenta njalo, njengobe Pawula atjela Thimothi, natsi ‘sitawenta kahle umsebenti wetfu.’—2 Thim. 4:5.