KEREA pěndangu su tempong nakatarimạ sěmbaụ suratẹ̌ nakatoghasẹ̌ si kau bọu sěngkatau hapị mapia? I Timotius nakatarimạ suratẹ̌ kerene bọu i Rasul Paulus, kụ suratẹ̌ ene orasẹ̌ ini nakoạ bukẹ̌ 2 Timotius. I Timotius tantu masahawụ nědeạ tampạ matěnang tadeạu i sie botonge mẹ̌basa suratẹ̌ bọu hapịe ikẹ̌kěndagẹ̌ ene. Aramanung i Timotius nẹ̌pikirẹ̌, ’Kerea habari Paulus? Apa i sie němohẹ sasasa tadeạu makatul᷊ung si siạ měkoạ tugasẹ̌ku? Apa suratẹ̌ ini sarung makatul᷊ung si siạ makoạ limembong mapaelẹ̌ měnginjilẹ̌ dingangu měněntiro, lai mẹ̌tul᷊ung taumata wal᷊inẹ?’ Kere sarung tinganeng i kitẹ, i Timotius nakaěbạ sasimbahu kakiwal᷊one ene dingangu lawọ kakiwal᷊o wal᷊inẹ su suratẹ̌ maarěga ene. Katewe orasẹ̌ ini, mahịe i kitẹ měmanda piram baụ sasasa su surati Paulus kụ botonge makatoghasẹ̌ si kitẹ.

Su tempong i Timotius něnětạ nẹ̌basa tětạu suratẹ̌ ene, i sie tantu langsung nakaěna i Paulus kahěngang-hěngang mapadul᷊i si sie. Paulus nẹ̌sěbạ i Timotius ”anạ ikẹ̌kěndagẹ̌ku”. (2 Tim. 1:2) I Timotius nakatarimạ suratẹ̌ ini ěndịu su taung 65 M. Su tempo ene umure ěndịu nal᷊iu bọu 30 su taunge, kụ i sie lai seng nakoạ penatua piạ lawọ pengalaman. I sie seng nědal᷊ahapị dingangi Paulus nal᷊iu bọu 10 taung, kụ i sie nakaěndung lawọ hal᷊ẹ̌.

I Timotius tantu sěbạe natoghasẹ̌ ual᷊ingu nakasingkạ i Paulus masatia nẹ̌tatahang maning nakahombang haghing kasasigěsạ. Su tempo ene, i Paulus seng nipěnjara su Roma, kụ seng mal᷊ighạ pateng. (2 Tim. 1:15, 16; 4:6-8) I Timotius nakaěna i Paulus bahani ual᷊ingu i Paulus nẹ̌bera, ”Iạ nẹ̌tatahang timatěngo kěbị haghi.” (2 Tim. 2:8-13) Nal᷊ahẹ, kere i Timotius, i kitẹ lai botonge matoghasẹ̌ mạeng mẹ̌tiněna soal u kasasatiang i Paulus.

Paulus němahangsang si Timotius tadeạu sěbạe měngarěga tugasẹ̌ seng nikaěbạe su pelayanan. Paulus mapulu i Timotius ”tatapẹ̌ masěmangatẹ̌ měpakẹ karunia bọu Mawu” seng nighělị si sie. (2 Tim. 1:6) Paulus něpakẹ bawera khaʹri·sma gunang ”karunia”. Bawera Yunani ene mangal᷊ene gaghělị tawẹ bawaehe dingangu tawe layak. Timotius seng nakaěbạ karunia ene su  tempong i sie nipile gunang melayani anạu sěmbaụ su sidang.​—1 Tim. 4:14.

Kerea i Timotius měpakẹ karunia seng nitarimạe? Su tempong i sie nẹ̌basa bawerang i Paulus ”tatapẹ̌ masěmangatẹ̌”, i sie aramanung nẹ̌tiněna soal u putung pẹ̌paketangu taumata su wal᷊e, kụ makoạ tětuhẹ̌. Manga tětuhẹ̌ ene harusẹ̌ tiụkang arau kalabeng tadeạu putung saụ dumělị. Sěmbaụ kamus naul᷊ị, kata kerja Yunani (a·na·zo·py·reʹo) nipakẹ i Paulus ene mangal᷊ene ”saụ pakarělị, saụ dimělị, kalabẹ̌ tadeạu putung dumělị”. Ini mangal᷊ene masěmangatẹ̌ měkoạ piram baụ hal᷊ẹ̌. Hakị u ene, Paulus naul᷊ị si Timotius, ’Pakasěmangatẹ̌e měkoạ tugasu!’ Orasẹ̌ ini, i kitẹ lai harusẹ̌ měkoạ hal᷊ẹ̌ mẹ̌sul᷊ung, ene kai masěmangatẹ̌ su pelayanan.

Su ral᷊ungu surate, i Paulus naul᷊ị hal᷊ẹ̌ bal᷊inẹ sarung makatul᷊ung si Timotius tadeạu berhasil su pelayanan. Paulus němohẹ, ”Dingangu rohkẹ̌ masusi kụ piạ si kitẹ, diagạe arětạ seng nipakitěngal᷊ẹ̌ si kitẹ.” (2 Tim. 1:14) Hal᷊ẹ̌ apa seng nipakitěngal᷊ẹ̌ si Timotius? Su ayatẹ̌ kal᷊imona, i Paulus nělahẹ soal u ”těntiro nihino”, ene kai katěngadẹ̌ su ral᷊ungu Binohẹ Susi. (2 Tim. 1:13) Ual᷊ingu i Timotius kai pelayan Kristen, i sie harusẹ̌ měněntiro katěngadẹ̌ su anạu sěmbaụ su sidang dingangu su taumata wal᷊inẹ su tampạ i sie měnginjilẹ̌. (2 Tim. 4:1-5) Bọu ene lai, i Timotius seng nihengkẹ nakoạ penatua gunang měngahạ manga dombang Mawu. (1 Ptr. 5:2) I Timotius botonge makariagạ apa seng nipakitěngal᷊ẹ̌ si sie, ene kai katěngadẹ̌, mạeng i sie měngumbala su rohkẹ̌ masusi bọu i Yehuwa dingangu Hengetang’E.​—2 Tim. 3:14-17.

Orasẹ̌ ini, i kitẹ lai seng nighělịkangu katěngadẹ̌ kụ harusẹ̌ těntirong i kitẹ su taumata wal᷊inẹ. (Mat. 28:19, 20) I kitẹ botonge tatapẹ̌ měngarěga manga katěngadẹ̌ ene mạeng i kitẹ turusẹ̌ mẹ̌doa dingangu marading měngěndung Hengetangu Mawu. (Rm. 12:11, 12; 1 Tim. 4:13, 15, 16) I kitẹ aramanung lai nakaěbạ tugasẹ̌ nakoạ penatua arau pelayan sepenuh waktu. Su tempong nakaěbạ tugasẹ̌ ene, i kitẹ harusẹ̌ masanạ naung dingangu turusẹ̌ měngumbala su Mawu. Hakị u ene, i kitẹ botonge měndiagạ katěngadẹ̌ seng nipakitěngal᷊ẹ̌ si kitẹ, mạeng i kitẹ měngarěga ene dingangu makitul᷊ung si Yehuwa gunang měndiagạ ene.

Bageang bal᷊inẹ bọu tugasẹ̌ nitarimạ i Timotius ene kai melatih taumata wal᷊inẹ gunang měkoạ hal᷊ẹ̌ seng kẹ̌koatenge. Hakị u ene, i Paulus němahangsang si Timotius, ”Soal u manga hal᷊ẹ̌ seng nikaringihu bọu iạ, . . . pakitěngal᷊ẹ̌ko ene su taumata apang botonge kapěngumbalaěng, kụ samurine sarung makakoạ měněntiro taumata wal᷊inẹ.” (2 Tim. 2:2) Nal᷊ahẹ, i Paulus naul᷊ị i Timotius harusẹ̌ měněntiro apa seng niěndungange su saudara wal᷊inẹ. Ene penting gunang koatengu kěbị penatua su sidang orasẹ̌ ini. Penatua mapia tawe měmuni apa seng nikasingkạe soal u sěmbaụ tugasẹ̌. Katewe, i sie měněntiro taumata wal᷊inẹ tadeạu i sire lai botonge měkoạ hal᷊ẹ̌ ene. I sie tawe matakụ mạeng taumata wal᷊inẹ piạ kasingkạ limembong mal᷊awọ bọu i sie arau limembong mapaelẹ̌ měkoạ sěmbaụ hal᷊ẹ̌ sul᷊ungu i sie. Hakị u ene, penatua mapia tawe kětạeng měněntiro hal᷊ẹ̌ dasarẹ̌ bọu sěmbaụ tugasẹ̌. I sie mapulu mẹ̌tul᷊ung taumata apang nilatih tadeạu piạ pemahaman mapaelẹ̌, ene mangal᷊ene makoạ taumata matělang su rohani. Mạeng i sie měkoạ ene, taumata apang nitěntirone sarung makakoạ mẹ̌tul᷊ung limembong mal᷊awọ su sidang.

I Timotius tantu sěbạe mal᷊uasẹ̌ nakatarimạ suratẹ̌ bọu i Paulus. I sie tantu pirang sul᷊ẹ nẹ̌basa sasasa maarěga su suratẹ̌ ene dingangu nẹ̌tiněna kerea i sie botonge tumol᷊e sasasa ene su tempong měkoạ tugase.

I kitẹ lai tantu mapulu měkoạ sasasa seng nighělị i Paulus. Kerea carane? I kitẹ botonge mẹ̌tawakal᷊i tatapẹ̌ masěmangatẹ̌ su pelayanan, turusẹ̌ měndiagạ apa seng nipakitěngal᷊ẹ̌ si kitẹ, dingangu měněntiro su taumata wal᷊inẹ kěbị apa seng nikasingkạ i kitẹ. Mạeng i kitẹ měkoạ ene, kere niul᷊ị i Paulus si Timotius, i kitẹ lai botonge ’měkoạ pakapia pelayanan kẹ̌koateng [i kitẹ]’.​—2 Tim. 4:5.