ULI waiunvua siani kine wapokelela mukanda wa kukoselezia kufuma kuli kibuza obe aweeme? Musambi Mukristu Timoteo, waapatile mukanda nga ozo kufuma kuli mutumua Paulo. Ozo mukanda, umanikile leenu kuya wali kitabu kya Bibilia kya 2 Timoteo. Kipalile Timoteo waakebele lubilo nkeende iteekameene eevi asome ni kumana keelia kyaali kyakebele kulanda kibuza wakue mutonua. Paange Timoteo waali waiipuzia: ‘Kine bukose bwakue Paulo buli siani? Eba, ali ni masoke a kunkwasia mu miilo yane? Kine ozu mukanda wa kunkwasia mu miilo yane ya kusimikila, kusambilizia buino ni kukwasia bange?’ Nga vituli kumona, Timoteo waapatile byasuko bya bebio biipuzio ni bintu bingeko mu ozu mukanda wa mana. Mu leeli lyasi, tuli kulondoluela masoke a mana ali mu ozo mukanda.

Musita Timoteo lwaatendekele kusoma milandu ya ntendeko ya ozo mukanda, waainikile nangue Paulo waali kibuza wakue wa peepi. Paulo waamukuutile Timoteo mu nzila ya ntono nangue, ‘muana wane mutonua.’ (2 Tim. 1:2) Anzia kine Timoteo waali ni miaka 30 eevi, musita lwaapokeleele ozu mukanda mu muaka wa 65 eevi, Yesu wasyavyelue, abanga wasyali Mukristu kabili mukote wa kilonghaano ali ni kibeelezio. Waali wasyakitile miaka ikilile pa 10 wali mukubomba ni Paulo, kabili waasambiliile bingi.

Kipalile Timoteo waakoseleziiziwe saana kumana nangue Paulo atwaliliile kusipikizia meezio wali wa kisinka. Paulo waali wakakilue mikufu ku Roma, wali peepi ni kwipaiwa. (2 Tim. 1:15, 16; 4:6-8) Timoteo waamwene nangue Paulo waali wasipile paantu waalandile eevi: “Ndinasipikizia kubalua kantu.” (2 Tim. 2:8-13) Nga vikyali kuli Timoteo, kusipikizia kwakue Paulo kunti kwatukoselezia ni fwefue.

Paulo waamusokele Timoteo amone kifulo kyaali nakio mu miilo yakue Leeza, kuya kyali kya mana saana. Paulo waatonene Timoteo ‘asonsezie kyabupe kyaapeelue na Leeza’ kibanga kyali mukati mwakue. (2 Tim. 1:6) Paulo waabombiizie mulandu khaʹri·sma eevi kulondoluela “kyabupe.” Ozo mulandu wa Kigiriki, ulangiliile kyabupe ao bupe busipalilue, ao kintu kampanda kya kwa bule. Timoteo waapokeleele bobo bupe musita lwaasaakwilue eevi abombele kilonghaano mu nzila iibeleele.​—1 Tim. 4:14.

 Timoteo waali wapalile kukita ki palua bobo bupe? Muine mu Kigiriki, bulanzi ‘kusonsezia kyabupe kyaapeelue na Leeza,’ bulandilue nangue, ‘kusonsezia nga mulilo bupe bwakue Leeza.’ Pakaako, musita Timoteo lwaasomene palua bobo bulanzi, paange waatontonkaniizie palua musita mulilo luuli waalukasie makala azekele. Ozo mulilo uli ni makala azekele, upalile kusonseziiwa eevi ufumie libeebe ni kukila kuzeka. Diksionere imo ili yalanda nangue ozo mulandu wa Kigiriki (a·na·zo·py·reʹo) waabombiiziwe na Paulo, ulangiliile “kuleemia kupia, kubuusia kabili, kulunda eevi kufumia libeebe,” mu nzila ya kimpalania, “kusaansamukila miilo kupia.” Kansi, Paulo waali wamukinkizia eevi Timoteo: ‘Bomba na Mute Miilo Yobe Yupeelue!’ Ni leenu tukabiile kukita enka evio, i kulanda nangue kubomba na mute miilo itupeelue.

Musita lwaatwaliliile kusoma mukanda kufuma kuli kibuza wakue mutonua, Timoteo waasaangile milandu inge ya kumukwasia kubomba buino miilo yakue. Paulo waaleembele eevi: “Suunga bobu bukonto buweeme kupitila mupasi utakatiifu, wikeele mukati keetu.” (2 Tim. 1:14, NWT) Bobo bukonto bwaali kiki? Mu mulongo utangiile, Paulo waalondoluele palua “milandu ili yakuula,” i kulanda, kisinka kili kyasaangua mu Maleembo. (2 Tim. 1:13, NWT) Paantu waali mubombi Mukristu, Timoteo waali wapalile kusambilizia kisinka mu kilonghaano ni ku bantu ba mu kazonga kakue. (2 Tim. 4:1-5) Kabili, Timoteo waali wabiikilue kuya wali mukote eevi kusuunga libumba lyakue Leeza. (1 Pet. 5:2) Eevi aviinde kusuunga bukonto bwakue, i kulanda nangue, kisinka kyaali wapalile kusambilizia, Timoteo waali wapalile kuswapila mupasi ni Mulandu wakue Yehova.​—2 Tim. 3:14-17.

Leenu, ni fwefue tupeelue kisinka kituli twasambilizia bange. (Mat. 28:19, 20) Kunti twalangilila nangue tuli twatasia palua bobo bukonto bwa mana kupitila kutwalilila kupepa ni kukuzia mibeele iweeme ya kusambilila Mulandu Wakue Leeza. (Bar. 12:11, 12; 1 Tim. 4:13, 15, 16) Ao, paange tuli twabomba kabili twali bakote ba kilonghaano, ao kubomba mu miilo ya kusimikila ya nsita yonse. Kubomba miilo ezio ya mana, kupalile kutulengia twikeefie ni kumuswapila Leeza eevi atukwasie. Kansi, kunti twaviinda kusuunga bukonto bwetu kupitila kubumona kuya bwali bwa mana, ni kumuswapila Yehova eevi atukwasie kubusuunga.

Imo pakati ka miilo yakue Timoteo, yaali kubeelezia bange bakite miilo yaali wakita. Keekio i kyalengele Paulo amukinkizie Timoteo eevi: ‘Beelia biwangunvuile nasambilizia . . . ni weewe sambilizia bantu ba kisinka ni beene bakaye basambiliziako bange.’ (2 Tim. 2:2) Paulo waamulangulusiizie Timoteo asambilizie balupua bange bintu byonse byaasambiliile. Ni kintu kya mana loonu kila kangalila ao mukote wa mu kilonghaano ekwinde kukita enka evio. Kangalila ao mukote wa mu kilonghaano aweeme, teezi kunvua bunkua ni kufiika beelia byamanine palua miilo kampanda. Inzi, ali wasambilizia bange eevi ni beene bakaviinde kukita ezio miilo. Teezi kutiina nangue bange kunti bamana bingi ao kubomba buino miilo kumukila weene. Pakaako, mukote teezi kusambiliziasie bintu bya pamuulu-muulu palua miilo kampanda. Ali watona kukwasia olia wali mukubeelezia akuzie buviinde bwa kwinika ni bwa kukwata bupinguzi buweeme, i kulanda, aaluke Mukristu akulile kimupasi. Kine mukote wakita evio, “bantu ba kisinka” baasambiliziiziwe na weene, bakaviinda kukwasia kilonghaano mu nzila ikata.

Kakiine, Timoteo waasaansamukiile ozo mukanda kufuma kuli Paulo. Kunti twamona mu maano, Timoteo wali mukubueluluka lingi mu azo masoke a mana ni kutontonkania vya kuabombia mu miilo yakue.

Ni fwefue, tutonene kubombia ozo musoko. Kunti twaubombia siani? Tupalile kwikwinda kusonsezia nga mulilo bupe bwetu, kusuunga bukonto bwetu, ni kubabuilako bange bufundi bwetu ni bintu bitumanine. Kine twakita evio, tuli kuviinda ‘kufikilizia miilo [yeetu] mu kupuililika,’ nga vyaalandile Paulo. ​—2 Tim. 4:5, NWT.