INO ty tsapa’o naho fa mahazo taratasy mampahery boake amy ty nama’o? Nisy Kristiana raike zay nahazo taratasy mampahery boake amy i apostoly Paoly. Tsy ia zay fa i Timoty, le ty 2 Timoty o taratasy nisorate i Paoly ho aze iohoe. Azo antoke fa tena tsy niligne i Timoty ty hipay toeragne bangigne mba hahafaha’e mamaky soa o taratasy boake amy i nama’e tsy foe’ey iohoe. Le naho fa ho namaky aze reke, le va’e nieretseretse hoe izao: ‘Manao akore koahe i Paoly zay? Hagnomey torohevetse ahy vao reke mba hahafahako mamita soa ty asa anendreagne ahy? Hagnampe ahy hagnasoa ty fanompoako naho hahavita hagnampe ty hafa vao ty taratasy toy?’ Ho treantika ato fa nivoavale tamy i taratasy sarobily niazo’ey o fagnontenea’e rehoe sady mbe nisy torohevetse soa hafa ka ty tao. Andao tika handineke izay.

Naho vaho nanomboke namaky i taratasỳ ty Timoty, le azo antoke fa le avy le nitsapa’e tamy ty rehake amboaloha’e eo fa tena naifitse ty fifandrambesa iareo. Tena tea i Paoly reke, le nitokave’e tihoe ‘anakiso’e.’ (2 Tim. 1:2) Tamy ty taogne 65 tagne ho agne ty nahazoa i Timoty o taratasy iohoe. Va’e fa ni-30 taogne teo ho eo reke tamy izay sady fa androanavi-pagnahy za-draha. Fa tagnate ty 10 taogne mahery ka ty niaraha’e tamy i Paoly, le azo antoke fa maro ty raha nianara’e tama’e.

Tsy maintsy ho nampahery i Timoty ty nahafantatse fa nahavita tsy nivalike ty Paoly ndra tie niatreke raha sarotse maro aza. Ty anto’e, ginadra ta Roma agne ty Paoly tamy io, sady vinono reke tsiela tafara izay. (2 Tim. 1:15, 16; 4:6-8) Trea i Timoty tamy izay fa tena bey herim-po ty Paoly, satria hoe reke: “Miaretse ze kila raha raho.” (2 Tim. 2:8-13) Afake mampahery antika ka ty modely nimey i Paoly noho ireke nahavita niaretse.

Nandrisike i Timoty ty Paoly mba hihevetse i asa nankinegne tama’ey ho sarobily. Tea i Paoly naho atao i Timoty ‘mirebareba manahake o afò i fagnomezan’Andrianagnahare’ nimeigne azey. (2 Tim. 1:6) Ty rehake Grika tihoe khaʹri·sma ty nampiasae i Paoly teto naho fa nirehake tihoe “fagnomezagne” reke. Tihoe khaʹri·sma, le irehafagne fagnomezagne raike meigne ndaty faie tsy fagneva ty homeagne izay o ndaty iohoe, ndra meigne aze maimaim-poagne avao i fagnomezagney. Nahazo ze fagnomezagne zay ty Timoty naho fa tinendre hanao asa manokagne agnivo o fiangonagneo eo.​—1 Tim. 4:14.

Ino moa ty raha tea i Paoly hatao i Timoty tamy i fagnomezagne nimeigne azey? Ino zao ty raha  va’e ho niavy tan-tsay i Timoty ao naho fa namaky i rehake tihoey ‘anò mirebareba manahake o afò i fagnomezagney’? Va’e ho afo fa vae’e avao rey ty ho niavy tan-tsai’e tao. Naho tsy teagne ho mate o afo iohoe, le mila atao ze hampirebareba aze mba hahavy aze tena hagnomey hafanagne. Mirehake ze diksionera raike zay fa ty rehake Grika (a·na·zo·py·reʹo) nampiasae i Paoly iohoe, le midika tihoe “manorogne afo, ndra mandrarake afo.” Izao areke ty hevetse tea o rehake Grika iohoe hambara: Mazoto naho mimane soa ty asa atao. Te handrisike i Timoty areke ty Paoly tie: ‘Imaneo soa i asa nanendreagne azoy!’ Hoe izay ka ty toko’e hataontika amy izao. Mila mazoto naho mimane soa ze asa fanompoagne ampanoegne antikagne tika.

Nahatrea rehake hafa ka ty Timoty naho fa namaky i taratasy boake amy i nama’e tsy foe’eỳ. Nagnampe aze hagnatanterake soa ty fanompoa’e o rehake iohoe. Hoe ty Paoly: “Arovo amy ty alala i fagnahy masigne agnatentikagne aoy, ze raha soa nankinegne tama’o zay.” (2 Tim. 1:14) Ino o raha soa nankinegne tamy i Timotio? Nirehake miomba ty hamarenagne trea amy ty Soratse Masigne ao ndra ty “rehake mahasoa” ty Paoly amy ty andine’e aloha io. (2 Tim. 1:13) Tsy maintsy nampianatse ty hamarenagne tagnivo o fiangonagneo eo naho ty ndaty tamy i tonday ey ty Timoty amy ty maha Kristiana aze. (2 Tim. 4:1-5) Tinendre ho androanavi-pagnahy ka reke mba hikarakara o agnondry i Jehovah-o. (1 Pet. 5:2) Niaro i raha nankinegne tama’ey ndra ty hamarenagne ty Timoty naho fa niantehetse tamy ty fagnahy masigne naho ty Saontsin’Andrianagnahare isake tie nampianatse.​—2 Tim. 3:14-17.

Misy asa nankinegne amantika ty amy izao, le ty hampianatse ty hafa ty hamarenagne. (Mat. 28:19, 20) Tsy toko’e ho halignoventika fa tena sarobily io. Akore ty hampisehoantika izay? Mila mivavake mateteke naho mianatse tsy tapake ty Saontsin’Andrianagnahare tika. (Rom. 12:11, 12; 1 Tim. 4:13, 15, 16) Va’e homeagne tombotsoa fagnampe’e zao tika. Ohatse, va’e ho tendregne ho androanavi-pagnahy ndra mpanompo marain-tsy hariva. Tena sarobily i fanendreagne antika rey, faie tsy toko’e hahavy antika hirehareha naho hatoky tegna rey. Miaro i raha sarobily nankinegne amantikagne rey areke tika, naho miambane sady miantehetse amy i Jehovah naho fa manao i asa nanendreagne antikagne rey.

Tsy toko’e ho tana i Timoty ho aze raike avao i raha nankinegne tama’ey fa mila zara’e amy ty ndaty hafa ka. Izay ty nahavy i Paoly nandrisike aze tie: “Ze raha nirei’o tamako ..., le atoloro o lahilahy azo itokisagne reo, i aze hahay hampianatse ty hafa ka naho fa avy eo rey.” (2 Tim. 2:2) Naniahy i Timoty ty Paoly teo fa mila zarae’e amy ty ndaty hafa ze raha nianara’e boake amy ty hafa. Tena mila mikezake ka ty mpiandraikitse agnivo o fiangonagneo eo mba hanao hoe izay. Tsy managne toe-tsaigne soa ty mpiandraikitse raike naho ohatse tana’e ho aze raike avao ty traikefa anagna’e miomba ty asa raike. Toko’e hanoro ndra hampiofagne ty hafa reke, amy izay afake mahavita i asa ignehoe ty ndaty hafa. Tsy toko’e hieretseretse reke tie: ‘Naho izaho mampiofagne ndaty miomba ty asa toy, le manjare ireke ty hisongadigne fa tsy izaho sasa.’ Tsy tihoe ampianare’e avao miomba ty fanoagne i asay ka i ndaty ampiofagne’ey fa mila ampea’e mba hanagne fahaiagne magnambake ka amy izay reke lasa Kristiana matotse. Ho afake hagnampe o fiangonagneo soa o ‘lahilahy azo atokisagne nampiofagne’eo’ amy izay.

Azo antoke fa tena nifale ty Timoty naho fa namaky o taratasy boake amy i Paoly iohoe. Azo antoke ka fa nivakie’e mateteke io. Fa nagnino? Mba hahafaha’e hahatrea ty fomba azo’e ampiharagne ty torohevetse fanjaka nisorate i Paoly ao amy ty asa nanendreagne aze.

Teantika ka ty hampihatse o torohevetse fanjaka rehoe. Amy ty fomba akore? Toko’e himaneantika soa ty asa nankinegne tamantika. Mila arovantikagne ka i hamarenagne nankinegne tamantikagney, le mila zaraentikagne amy ty hafa ze raha haintikagne. Naho itika manao ireo, le ho afake ‘hamita soa ty fanompoantika’, arake i nirehafe i Paoly tamy i Timotỳ.​—2 Tim. 4:5.