NGANDE watoyoyaokaka naka wɛ ambokondja mukanda ɔmɔtshi w’ekeketshelo oma le ɔngɛnyi ayɛ w’oshika? Timɔte laki ombeki w’Okristo akakondja mukanda wa ngasɔ oma le ɔpɔstɔlɔ Pɔɔlɔ, mukanda wa lo Bible welamɛ ɛlɔ kɛnɛ 2 Timɔte. Aha la taamu Timɔte akalomɔlomɔ dia nyanga dihole dia ki l’oyango wa nde mbadia kɛnɛ kakofundɛ ɔngɛnyi ande wa ngandji ɔsɔ. Ondo Timɔte akatatɛ ndjambola ɔnɛ: ‘Onde Pɔɔlɔ ekɔ ki? Onde nde ambombisha alako amɔtshi wendana l’ɛkɛndɛ ami? Onde mukanda ɔnɛ koka kimanyiyami dia ntondoya l’olimu ami w’Okristo ndo wa nkimanyiya anto akina?’ Oko wayangaso diɛna, Timɔte akakondja ekadimwelo lo ambola asɔ ndo akina lo mukanda w’ohomba ɔsɔ. Koko tayanga ndeka mbidja yimba l’alako amɔtshi w’ohomba wele lo mukanda akɔ.

Etena kakatatɛ Timɔte mbadia ɛtɛkɛta w’etatelo w’oma lo mukanda ɔsɔ, mbala kakɔ ɔtɔi nde akashihodia diɔtɔnganelo dia ma ma diaki lam’asande la Pɔɔlɔ. La ngandji tshɛ Pɔɔlɔ akawelɛ ɔnɛ “ɔnami la ngandji.” (2 Tim. 1:2) Ondo Timɔte aki l’ɛnɔnyi 30 l’ɛmɔtshi etena kakandalongola mukanda ɔsɔ oya lo 65 T.D., laasɔ ko nde amboyalaka ekumanyi k’Okristo kele la diewo. Nde aketeta kaamɛ la Pɔɔlɔ l’edja k’ɛnɔnyi ndekana dikumi ndo nde akeke akambo efula oma le nde.

Weho akɔ tshɛ Timɔte akakeketshama efula dia mboka dia Pɔɔlɔ akakikɛka asui la kɔlamelo tshɛ. Pɔɔlɔ aki lo lokanu la Rɔmɔ kelekama mɔlɔla ndo nde aki suke la ndjakema. (2 Tim. 1:15, 16; 4:6-8) Timɔte akakoke mɛna dia ɔpɔstɔlɔ ɔsɔ aki la dihonga oma l’ɛtɛkɛta wakandate ɔnɛ: ‘Dimi lekɔ lo mbikikɛ akambo tshɛ.’ (2 Tim. 2:8-13) L’ɛnyɛlɔ ka Timɔte, sho koka keketshama oma l’ɛnyɛlɔ ka diambo ka Pɔɔlɔ kendana la ekikelo.

Pɔɔlɔ akakeketsha Timɔte dia mbɔsa ɔkɛndɛ ande l’olimu wa Nzambi la nɛmɔ di’efula. Pɔɔlɔ akalangaka dia Timɔte “mpɛtshahɛtsha oko dja woshasha wa Nzambi” wakandalongola. (2 Tim. 1:6) Pɔɔlɔ akakambe la tshɛkɛta khaʹri·sma lo dikambo dia “woshasha.” Tshɛkɛta ya lo Ngirika shɔ mendanaka ntondotondo la woshasha w’ofele ndo wele onto hasungana nongola, mbuta ate ɛngɔ kahakoki onto nkondja. Timɔte akalongola woshasha ɔsɔ etena kakandasɔnama dia kambɛ etshumanelo lo yoho ya laande.​—1 Tim. 4:14.

Kakɔna kakahombe Timɔte nsala la woshasha ɔsɔ? Etena kakandadia etelo ka ɔnɛ “mpɛtshahɛtsha  oko dja,” ondo nde akakanyiya dikambo dia dja yahɛtshawɔ lo luudu yakoka lo tena dimɔtshi nombalomba oko dja y’akalanga. Akalanga asɔ wakahombe tshutshuyama dia ntondja loombe ndo laaladi l’efula. Diksiɔnɛrɛ dimɔtshi mbitaka ɔnɛ vɛrbɛ ya lo Ngirika (a·na·zo·py·reʹo) yakakambe la Pɔɔlɔ lanɛ nembetshiyaka “mpɛtsha dja, ntshutshuya, nsala dia yɔ nombalomba,” diakɔ diele lo yoho ya didjidji yɔ nembetshiyaka “ngɛnangɛna ndo monga l’ohetoheto l’olimu ɔmɔtshi.” Ekɔ oko Pɔɔlɔ akalakaka Timɔte ɔnɛ: ‘Yasha tshɛ l’ɔkɛndɛ ayɛ!’ Ɛlɔ kɛnɛ, sho pombaka nsala woho akɔ waamɛ, mbuta ate monga l’ohetoheto l’olimu aso.

Etena kakandatetemalaka mbadia mukanda w’oma le ɔngɛnyi ande wa ngandji ɔsɔ, Timɔte akakome lo etelo kekina kakakoke mbokimanyiya dia nde ntondoya l’olimu ande. Pɔɔlɔ akafunde ate: “Lama diangɔ dia nɛmɔ sɔ diakawakosha lo tshimbo ya nyuma k’ekila kele le so.” (2 Tim. 1:14) Diangɔ diakɔna sɔ? Naa diangɔ diakawasha Timɔte sɔ? Lo divɛsa diele la diko, Pɔɔlɔ akatɛkɛta dikambo dia “ɛtɛkɛta w’eshika,” mbuta ate akambo wa mɛtɛ wa l’Afundelo. (2 Tim. 1:13) Oko wakinde osambisha w’Okristo, Timɔte aketshaka anto wa l’etshumanelo ndo wa l’andja w’etshumanelo akambo wa mɛtɛ. (2 Tim. 4:1-5) Ndo nto, Timɔte akasɔnama oko ekumanyi dia namaka ɛkɔkɔ wa Nzambi. (1 Pe. 5:2) Timɔte akahombe nama akambo wa nɛmɔ asɔ wakawawetsha, mbita ate akambo wa mɛtɛ wakandahombe mbetsha anto lo ndjaɛkɛ le nyuma k’ekila ka Jehowa ndo Ɔtɛkɛta ande.​—2 Tim. 3:14-17.

Ɛlɔ kɛnɛ, sho lawɔ wakatosha akambo wa mɛtɛ wetshaso anto akina. (Mat. 28:19, 20) Sho koka ntetemala monga la lowando l’ɔtɛ w’akambo wa diambo wakawatosha asɔ lo ntetemala nɔmba ndo monga la mbekelo ka dimɛna ka mbekaka Ɔtɛkɛta wa Nzambi. (Rɔmɔ 12:11, 12; 1 Tim. 4:13, 15, 16) Mbeyaka monga ko tekɔ l’ɔkɛndɛ okina, ɛnyɛlɔ nkamba oko ekumanyi kana nkamba l’olimu wa lo tena tshɛ. Kɛnɛ kakawatosha kɛsɔ pombaka totshutshuya dia monga l’okitshakitsha ndo ndjaɛkɛ le Nzambi. Diakɔ diele, sho kokaka nama kana nkokɛ kɛnɛ kakawatosha ndo ndjaɛkɛ le Jehowa dia tokimanyiya diaha kishisha.

Ɔkɛndɛ okina waki la Timɔte aki wa ndowanya anto akina dia vɔ nkamba olimu wakandakambaka. Diakɔ diele Pɔɔlɔ akakeketsha Timɔte ate: “Akambo wakayoke oma le mi . . . , kimɔwɔ le apami wele la kɔlamelo, ko vɔ lawɔ wayonga l’akoka tshɛ wahombama dia mbetsha anto akina.” (2 Tim. 2:2) Lo mɛtɛ, Timɔte akeke akambo oma le Akristo akina ndo nde akahombe mbetsha anto akina. Ekɔ ohomba efula dia omendji tshɛ wa l’atei w’etshumanelo k’Akristo ɛlɔ kɛnɛ mbidja welo dia nsala woho akɔ waamɛ. Omendji w’oshika halame akambo weyande wendana l’ɔkɛndɛ ɔmɔtshi. Koko, nde mbetshaka anto akina l’oyango wa vɔ monga l’akoka wa nkamba olimu akɔ. Nde hoke wɔma ɔnɛ vɔ koka ndjooleka mbeya akambo kana ndjonga l’akoka wooleki. Diakɔ diele, omendji hetsha tsho towuiwui tendana l’ɔkɛndɛ ɔmɔtshi. Nde nangaka nkimanyiya wanɛ walowanyande dia vɔ monga l’ekanelo k’ɔlɔlɔ ndo la shɛnɔdi, mbita ate mpama lo nyuma. Lo nsala ngasɔ, etshumanelo ndekaka nkondja wahɔ oma le “apami wele la kɔlamelo” walowanyande.

Aha la taamu Timɔte akɔsaka mukanda w’ekeketshelo w’oma le Pɔɔlɔ ɔsɔ la nɛmɔ. Sho koka nkanyiya esadi eto woho wakadiaka Timɔte mukanda akɔ mbala la mbala, ndo woho wakandasalaka la wolo dia nkamba l’alako akɔ dia nkotsha ɛkɛndɛ ande.

Sho lawɔ kokaka nkamba l’alako asɔ. Lo ngande? Sho kokaka nsala la wolo dia mpɛtshahɛtsha woshasha aso oko dja, dia nama kɛnɛ kakawatosha ndo dia mbetsha anto akina awui tshɛ weyaso. Lo nsala ngasɔ, oko wakatɛ Pɔɔlɔ Timɔte, sho koka ‘nkotsha olimu aso dimɛna.’​—2 Tim. 4:5.