WA GU dzipwa kharini wa gu hakha lidangaliya litago khiyo ga phari yago? Thimoti hakhide lidangaliya nya kharato khu ga Pawulo. Ethu ha gu liti kha nga libhuku nya wuvili la Thimoti. Tepo Thimoti a nga hakha lidangaliya a di si yi woni ni tepo nyo khale vbavbatshi gasi gu wona esi pari yaye yi mu lovedego. Adzina Thimoti pimiside gu khuye: ‘Pawulo wugide kharini? Ina a nyi dongiselede wusingalagadzi nyo khaguri maningano ni edzi nyi nga wonago khidzo malungelo yangu? Ina lidangaliya leli li na nyi phasa gu dugeleya thumoni wangu nyo tshumayele ni gu phasa vambe? Kha nga hi na si wonago, Thimoti manide mihlamulo nya siwudziso saye ni simbe omu nya lidangaliya lile nyo hathege. Olu, hi na wona wusingalagadzi nyo khaguri wu gomogo avba nya lidangaliya leli wu nga hi phasago.

Tepo Thimoti a nga pheya gu leri malito nyo pheye avba nya lidangaliya leli, dzegede gu si wona gu khuye Pawulo a di gu mu haladza. Pawulo a di rana Thimoti khuye, “mwanangu nya gigodwa.” (2 Thim. 1:2) Si nga gira gu Thimoti a diri ni 30 myaga tepo a nga hakha lidangaliya leli khu 65 teponi yathu. Ambari olu a nga ba ari muphya, Thimoti a diri lidhota nyo vidzwe. Thimoti a di thumide ni Pawulo khu myaga nya yingi nigu uye hevbude nya singi gwaye.

Guti gu khuye Pawulo a di gu timiseya sigaradzo nya singi khu gu tumbega, si mu tiyiside ngudzu Thimoti. Pawulo a di khotedwe Roma nigu a di hadzi songwa. (2 Thim. 1:15, 16; 4:6-8) Malito ya Pawulo ma gu khayo: “Nya gu timisela satshavbo” ma yeyedzide Thimoti edzi Pawulo a nga ba a tiya khidzo hwambo. (2 Thim. 2:8-13) Gu fana ni Thimoti anethu hi nga tiyiswa khu giyeyedzo gya Pawulo nya gu timiseye.

Pawulo, kutside Thimoti gu ninga lisima thumo waye a nga ba a wu gireya Nungungulu. Uye a mu embede gu khuye “sayisa gwadi, gikhati gyatshavbo giningwa gya Nungungulu u hakhidego.” (2 Thim. 1:6) Lito nya giGreki eli Pawulo a li thumisidego avba li vbindrugedzedwego kha nga “giningwa” lari khilo khárisma. Lito leli nya giGreki la gu thula giningwa nya mahala gi si hi faneyigo. Thimoti, hakhide giningwa gegi tepo a nga hathwa gasi gu thumeya libandla khu ndziya nyo hathege. — 1 Thim. 4:14.

A di yede gu gira ginani Thimoti khu giningwa gegi? ‘Gu sayisa gwadi, gikhati gyatshavbo  giningwa gya Nungungulu’, khu giGreki sa gu thula “gu endzedza kha nga nilo giningwa gya Nungungulu.” Tepo Thimoti a nga leri lito gu “endzedza kha nga nilo” adzina dundrugide nilo owu vathu va khondrisago ma dzindrangani gwawe, owu khu gu gimbiya nya tepo wu khalago magala. Magala yoyo ma di yede gu endzedzedwa gasi ma khondra. Dicionário mweyo yari khiyo verbo nya giGreki anazopyréo yi thumisidwego khu Pawulo ya gu thula “gu endzedza nilo.” Khu mambe maganelelo sa gu thula “gu gira thumo nyo khaguri na wu tsakide.” Khu kharato, avba Pawulo a di gu vbweta gu kutsa Thimoti “gu dzigaradza avba nya thumo a ningidwego.” Anethu, hi yede gu gira sasimweso muhuno, hi dzigaradza thumoni wa Jehovha.

Avba nya lidangaliya leli, Pawulo ganede simbe si nga hadzi phasa Thimoti gu dugeleya thumoni waye. Pawulo lovide khuye: “Vegisa sihevbudzo nya sadi u ningidwego, u phasedzedwa khu Liphuvbo nya Guage li vbahidego myonyoni gwathu.” (2 Thim. 1:14) Sihevbudzo muni a nga ba a yede gu vegisa Thimoti? Ga livhesi 13, Pawulo ganede khu “mahungu nya yadi”, a gu lisine li gomogo omu nya Milowo. (2 Thim. 1:13) Kha nga mutshumayeli, Thimoti a di yede gu hevbudza lisine ndrani ni vbavbandze nya libandla. (2 Thim. 4:1-5) Gu diga isoso, Thimoti a di emisidwe gasi gu khathaleya dzinvuta dza Nungungulu. (1 Ped. 5:2) Gasi gu vegisa sihevbudzo nya sadi, mwendro lisine a nga ba a li hevbude, Thimoti a di yede gu tumba liphuvbo nya guage la Jehovha ni Lito Laye. — 2 Thim. 3:14-17.

Anethu muhuno, hi ningidwe lisine lolo gasi hi hevbudza vambe. (Mat. 28:19, 20) Kha hi yeli gu divala gu khethu lisine eli hi hevbudzago, khya lisima ngudzu. Khu kharato, hi yede gu simama hi gombeya ni gu hevbula Lito la Nungungulu matshigu yatshavbo. (Rom. 12:11, 12; 1 Thim. 4:13, 15, 16) Adzina hi ningidwe malungelo nyo khaguri, nya nga gu thuma ga thumo nya tepo yatshavbo mwendro gu thuma kha nga lidhota. Malungelo yaya ma yede gu hi gira hi khala vathu nya gu dzinogise hi bwe hi dzumeya gu khethu hi ngu vbweta giphaso gya Nungungulu. Hi nga sayisa mwendro gu vegisa sihevbudzo nya sadi hi hakhidego khu gu hi si ninga lisima hi bwe hi tumba giphaso gya Jehovha.

Wumbe thumo a nga ba ari nawo Thimoti gu diri gu trenari vambe gasi va gira thumo owu a nga ba a gira. Khu kharato, Pawulo kutside Thimoti gu khuye: “Esi u nga hevbulago gwangu . . . , hevbudza vathu va tumbegidego va na gu kodzago gu hevbudza navo vambe.” (2 Thim. 2:2) Pawulo, dundrugiside Thimoti gu khuye a di yede gu hevbudza vambe satshavbo esi a nga ba a si hevbula. Esi khiso ma yedego gu gira yatshavbo madhota mabandlani muhuno. Lidhota li vidzidwego, kha lipwi lidiwo gu hevbudza vambe nigu kha li sihasihi esi li sitigo khu thumo wowo. Gu diga isoso, ilo la gu trenari vambe gasi anavo va gira thumo wowo. Ilo kha li thavi gu khilo li na padwa khu vandriyathu va gu ni makodzelo nyo gire thumo gu vbindra ilo. Lidhota li vidzidwego gambe, kha li hevbudzi silo nya litshina basi maningano ni thumo wowo. Ilo la gu vbweta gu phasa vambe gu va si kodza gu gira thumo wule ni gu va dandra khu liphuvboni. Khu kharato, ‘vama va tumbegidego’ va hakhago trenamento va nga phasa ngudzu libandla.

Kha si kanakanisi gu khiso Thimoti a li gode ngudzu lidangaliya a li hakhidego ga Pawulo. Nga dundrugeya Thimoti na gu leri wusingalagadzi a ningidwego khu Pawulo a bwe a dundrugeya khedzi a nga wu thumisago khidzo thumoni waye.

Anethu ha gu vbweta gu landrisa wusingalagadzi wowu. Khu ndziya muni? Khu gu endzedza kha nga nilo giningwa hi hakhidego, hi sayisa esi hi ningidwego hi bwe hi hevbudza vambe esi hi sitigo. Ha gu gira isoso, hi na landrisa wusingalagadzi wa Pawulo owu a ningidego Thimoti nyo ‘vbedzise thumo wathu.’ — 2 Thim. 4:5.