INO mulimvwa buti ciindi nimwatambula lugwalo lukulwaizya kuzwa kumulongwe mubotu? Sikwiiya Munakristo Timoteyo wakatambula lugwalo luli boobu kuzwa kumwaapostolo Paulo, ilugwalo lino luzyibidwe kuti ndibbuku lyamu Bbaibbele lya 2 Timoteyo. Cakutadooneka, Timoteyo wakaliyandide kapati kujana busena buumwine kutegwa abale akumvwa ncaakamulembela mulongwe wakwe. Ambweni Timoteyo wakali kuyeeya kuti: ‘Ino Paulo upona buti? Sena kuli lulayo ndwayanda kundaambila kujatikizya mbondeelede kuubona mulimo wangu? Sena lulayo oolu inga lwandigwasya kuba mwiiyi ucibwene kukambauka alimwi akugwasya bamwi?’ Mbubwenya mbotutiibone, Timoteyo wakabujana bwiinguzi kumibuzyo eeyi alimwi aimwi buyo mulugwalo oolu luyandika kapati. Pele lino atulange-lange twaambo tuyandika kapati itujanika mulugwalo oolu.

Ciindi Timoteyo naakatalika kubala majwi aakusaanguna mulugwalo oolu, mpoonya-mpoonya wakazyiba mbocakali ciyumu cilongwe ncaakajisi a Paulo. Caluyando, Paulo wakamwiita kuti “omwanaangu uuyandwa.” (2Tim. 1:2) Nokuba kuti ciindi Timoteyo naakatambula lugwalo oolu wakajisi myaka iinda ku 30, cakuma 65 C.E., wakali kale Munakristo alimwi amwaalu uusimide. Wakali kubeleka a Paulo kwamyaka iinda ku 10 alimwi zinji nzyaakayiide.

Kweelede kuti Timoteyo wakakulwaizyigwa kapati ciindi naakamvwa kuti Paulo wakali kuliyumya mumasunko cakusyomeka. Paulo wakali muntolongo ku Roma, alimwi wakali afwaafwi kujaigwa. (2Tim. 1:15, 16; 4:6-8) Timoteyo wakakulwaizyigwa kubona kuti Paulo wakali sicamba ciindi naakaamba kuti: “Ndilazumanana kuliyumya muzintu zyoonse.” (2Tim. 2:8-13) Mbubwenya mbuli Timoteyo, andiswe tulakonzya kwiiya cikozyanyo cibotu ca Paulo cakuliyumya.

Paulo wakakulwaizya Timoteyo kuti mulimo wa Leza kaubona kuti ulayandika kapati. Wakali kuyanda kuti Timoteyo ‘acivwilimye mbuli mulilo cipego ca Leza’ ncaakapegwa. (2Tim. 1:6) Paulo wakabelesya bbala lya Chigiriki lyakuti khaʹri·sma, ikupandulula “cipego.” Bbala lya Chigiriki eeli lipandulula cipego muntu ncaapegwa buyo kakunyina kubbadela alimwi citamweeleli. Timoteyo wakapegwa cipego eeci ciindi naakasalwa kubelekela mbungano munzila yaalubazu.—1Tim. 4:14.

 Ino Paulo wakamukulwaizya kucita nzi Timoteyo? Ciindi naakali kubala majwi aakuti “ucivwilimye mbuli mulilo,” kweelede kuti wakayeeya kujatikizya mililo yamumaanda yalo zimwi ziindi iyakali kuba buyo masizi aatayaki. Masizi aaya akeelede kuvwupaulwa buya kutegwa ayake kapati. Ibbuku limwi lipandulula mabala, lyaamba bbala lya Chigiriki lyakuti (a·na·zo·py·reʹo) ndyaakabelesya Paulo kuti lipandulula “kubukulusya alimwi akuvwupaula,” munzila imwi, kupandulula kuti “kukkomana akusungwaala kucita mulimo umwi.” Mubwini, Paulo wakali kwaambila Timoteyo kuti: ‘Kolitakata kubeleka!’ Andiswe, mazuba aano mbotweelede kucita, nkokuti, ikuba basungu mumulimo wesu.

Mulugwalo lwakwe, Paulo wakaamba cintu cimwi icakali kukonzya kumugwasya Timoteyo kuzwidilila mumulimo wakwe. Paulo wakalemba kuti: “Kocibamba kabotu cintu eeci ciyandisi cibikkidwe mumaanza aako kwiinda mumuuya uusalala uuli mulindiswe.” (2Tim. 1:14) Ino ncintu nzi eeco? Ino ncintu nzi ciyandisi Timoteyo ncaakapegwa? Mukapango kali musyule, Paulo wakaamba kuti “majwi mabotu,” ikasimpe kajanika mu Magwalo. (2Tim. 1:13) Mbwaanga Timoteyo wakali mubelesi Munakristo, nkokuti wakeelede kuyiisya kasimpe kubakwesu abacizyi mumbungano alimwi akubantu bamucilawo cakwe. (2Tim. 4:1-5) Kuyungizya waawo, Timoteyo wakasalwa kuba mwaalu kutegwa keembela “butanga bwa Leza.” (1Pet. 5:2) Timoteyo wakacikwabilila cintu cakwe, nkokuti kasimpe nkaakeelede kuyiisya, kwiinda mukusyoma muuya uusalala wa Jehova alimwi a Jwi lyakwe.—2Tim. 3:14-17.

Mazuba aano, andiswe twakapegwa kasimpe nkotweelede kuyiisya bamwi. (Mt. 28:19, 20) Tulakonzya kuzumanana kutondezya kulumba kucintu ciyandisi ncitwakapegwa kwiinda mukuzumanana kupaila alimwi akuba cilengwa cibotu cakubala Jwi lya Leza abuzuba. (Rom. 12:11, 12; 1Tim. 4:13, 15, 16) Ambweni inga katujisi coolwe cimbi cakubeleka katuli baalu mumbungano naa mumulimo waciindi coonse. Cintu ciyandisi mbuli ceeci, ceelede kutupa kulicesya akubona kuti tatukonzyi kuzwidilila kakunyina kugwasyigwa a Leza. Aboobo tulakonzya kucikwabilila cintu ciyandisi kwiinda mukucibikkila maano alimwi akusyoma Jehova kutegwa atugwasye kucibamba kabotu.

Mulimo umbi Timoteyo ngwaakajisi wakali wakuyiisya bamwi kucita mulimo ngwaakali kucita. Nkakaambo kaako Paulo wakamwaambila kuti: “Izintu nzyookamvwa kulindime . . . kozibikka mumaanza aabantu basyomeka, kutegwa abalo beelele ncobeni ikuyiisya bamwi.” (2Tim. 2:2) Paulo wakayeezya Timoteyo kuyiisya bakwesu bamwi zintu zyoonse nzyaakaiya. Eeci ncobeelede kucita abalo balangizi mumbungano ya Bunakristo mazuba aano. Mulangizi uucibwene tafwi munyono kuyiisya bamwi makani ngazyi kujatikizya mulimo umwi. Muciindi caboobo, ulabayiisya abamwi kutegwa bauzyibe kabotu mulimo. Kunyina nalibilika kuti ambweni inga bamwiinda naa kuucita kabotu mulimo ooyo kwiinda nguwe. Aboobo, mulangizi tayiisyi bamwi mulimo caatala-tala buyo. Uyanda kuti aabo mbayiisya babe aluzyibo, nkokuti kusima kumuuya. Munzila eeyi, ‘muntu uusyomeka’ ooyo iwayiisyigwa ulakonzya kwiigwasya mbungano munzila zinji.

Cakutadooneka, Timoteyo wakalumba kapati kulugwalo ndwaakatambula kuzwa kuli Paulo. Tulakonzya kweezyeezya Timoteyo kabala lugwalo oolu cakwiinduluka-induluka alimwi akuyeeya kujatikizya mbwakonzya kulubelesya kabotu lulayo mumulimo wakwe.

Andiswe tuyanda kulubelesya lulayo oolu. Munzila nzi? Tulakonzya kubeleka canguzu kutegwa tucivwilimye mbuli mulilo cipego, kucibamba kabotu cintu cesu ciyandisi, alimwi akuyiisya bamwi zintu zyoonse nzyotuzyi. Kuti twacita oobu, mbubwenya Paulo mbwaakaambila Timoteyo, tulakonzya ‘kuuzuzikizya cakumaninina mulimo wesu.’—2Tim. 4:5.