NGA WAMVWA biyeni kuti mweenzinyokwe wakulembela lugwalo lusungwaazya? Mwaapostolo Pawulu wakalembela Timotewo lugwalo luli boobu. Lugwalo oolu mazubaano lujanikana muBbayibbele, ndibbuku lya 2 Timoteyo. Kweelede kuti Timotewo wakayanduula ndawu iwumwide kuti akkale aansi abale lugwalo lwakazwa kumweenzinyina. Amwi Timotewo wakali kulibuzya kuti ‘Kuti Pawulu zili kumweendela kabotu na zintu? Kuli nzyayanda kundibuzya na atala amulimu wangu? Lugwalo oolu lulandigwasya kuti nduuchite kabotu na mulimu wangu akuti ndigwasye bamwi?’ Mbuli mbututabone, Timotewo wakajana nsandulo zyamibuzyo eeyi alubo wakajana zyiiyo zyiingi mulugwalo oolu. Pesi kwalino, atubone zyiiyo ziyandikana loko nzitujana mulugwalo lwa 2 Timoteyo.

Chiindi Timotewo naakabala majwi akali kumasaangunino alugwalo, wakabona kuti Pawulu ulamuyanda nkaambo wakamwiita kuti “omwanaangu uuyandwa.” (2 Tim. 1:2) Pawulu wakalembela Timotewo lugwalo oolu kuma 65 C.E. Aachiindi eechi Timotewo wakali aminyaka yiinda ku30 alubo wakali mwaalu ulaaluzibo. Wakali wabeleka aPawulu kwaminyaka yiinda ku10 alubo wakali wayiya zintu zyiingi loko.

Kweelede kuti Timotewo wakasungwaazigwa loko kumvwa kuti Pawulu wakali kuzumanana kusyomeka nikuba kuti wakali mubuyumu-yumu. Pawulu wakali mujele kuRoma alubo wakali waba afwiifwi kujeegwa. (2 Tim. 1:15, 16; 4:6-8) Majwi aaPawulu akuti “ndilazumanana kuliyumya muzintu zyoonse” akatondeezya Timotewo kuti Pawulu wakali achibindi. (2 Tim. 2:8-13) Mbuli Timotewo, chikozyano chaPawulu chilakonzya kutugwasya kuti andiswe tulisimye.

Pawulu wakasungwaazya Timotewo kuti abone mulimu waLeza ngwaakapegwa mbuli chintu chiyandikana loko. Pawulu wakali kuyanda kuti Timotewo ‘acivwilimye mbuli mulilo cipego ca Leza’ nchaakapegwa. (2 Tim. 1:6) Pawulu wakabelesya bbala lyachiGirikki liti khaʹri·sma kwaamba “chipego.” Bbala eeli lyachiGirikki lyaamba kupegwa chipego mahhala kutakwe chintu nchuwachita chipa kuti weelele kuchipegwa. Timotewo wakapegwa chipo eechi chiindi naakasalwa kuti achite mulimu uuyandikana loko mumbungano.—1 Tim. 4:14.

 Pawulu wakali kusungwaazya Timotewo kuti achiteenzi? Chiindi naakabala majwi aakuti “ucivwilimye mbuli mulilo,” kweelede kuti Timotewo wakayeeya makala anga amba kuzima. Makala aaya nga ayanda kufulidwa kuti ayake lubo. Limwi bbuku lipandulula mabala lyakaamba kuti bbala lyachiGirikki liti a·na·zo·py·reʹo lyaamba kufulida mulilo kuchitila kuti uyake lubo, chaamba kubotelwa akubeleka changuzu mumulimu nguwapegwa. Muliimwi nzila, Pawulu wakali kusungwaazya Timotewo kuti awuchite aamoyo woonse mulimu wakwe. Andiswe mazubaano mbutweelede kuchita, tweelede kuubeleka changuzu mulimu wesu.

Chiindi naakayinkilila kunembo kubala lugwalo lwakazwa kumweenzinyina Timotewo, wakabona amwi majwi akamugwasya kuti azwidilile mumulimu wakwe. Pawulu wakalemba kuti: “Kocibamba kabotu cintu eeci ciyandisi cibikkidwe mumaanza aako kwiinda mumuuya uusalala uuli mulindiswe.” (2 Tim. 1:14) Niinzi chintu chiyandikana nchaakapegwa Timotewo? Muvesi 13 Pawulu wakaamba kuti ‘majwi mabotu’ chaamba kasimpe kajanikana muMagwalo. (2 Tim. 1:13) Mbuli mukambawusi Timotewo wakeelede kuyiisya kasimpe mumbungano aanze. (2 Tim. 4:1-5) Alubo Timotewo wakeelede kweembela butanga nkaambo wakali mwaalu. (1 Pet. 5:2) Kuti Timotewo achibambe kabotu chintu eechi chiyandisi [kasimpe nkakeelede kuyiisya], wakeelede kusyoma Jehova akugwasigwa aamuuya uusalala.—2 Tim. 3:14-17.

Andiswe mazubaano twakapegwa chintu chiyandikana chaamba kasimpe nkituyiisya bamwi. (Mt. 28:19, 20) Nkinkaako tulakonzya kutondeezya kuti tukabona kakayandikana kasimpe aaka kwiinda mukuzumanana kukomba akubala Jwi lyaLeza chiindi choonse. (Rom. 12:11, 12; 1 Tim. 4:13, 15, 16) Alubo bamwi besu bali azimwi zilongezyo ziswaanizya kuba baalu naakuti kuba mumulimu wachiindi choonse. Kuti katuli amilimu eeyi iiyandikana, tweelede kulibombya akubona kuti tuyanda kugwasigwa aJehova kuti twiichite. Nkinkaako tulakonzya kwiibamba kabotu kwiinda mukwiibona kayiyandikana akusyoma Jehova kuti atugwasye kwiichita.

Mulimu waTimotewo wakali kuswaanizya kuyiisya bamwi kuchita nzyaakali kuchita. Eezi nzizyo zyakapa kuti Pawulu asungwaazye Timotewo kuti: “Izintu nzyookamvwa kulindime . . . , kozibikka mumaanza aabantu basyomeka, kutegwa abalo beelele ncobeni ikuyiisya bamwi.” (2 Tim. 2:2) Timotewo wakeelede kuyiisya bamwi zintu nzyaakayiya kuzwa kuli bamwi. Kulayandikana kuti balangizi bali mumbungano ambabo bachite mbubo. Mulangizi ulikabotu tabasisili pe bamwi luzibo ndwalaalo. Pesi ulabayiisya kuchitila kuti bawubeleke kabotu mulimu. Taleki pe kubayiisya kayeeya kuti bazooba aluzibo kwiinda nguwe mpawo bamutolele mulimu wakwe. Pesi ulabayiisya zintu zyoonse ziyandikana atala amulimu ooyo. Alubo ulabagwasya kuti bakonzye kusala kabotu, babe aluzibo akuti basime mubukombi. Kuti wachita oobo ‘bantu basyomeka’ mbanga wayiisya bayoochita milimu mipati akugwasya mbungano.

Kweelede kuti Timotewo wakasungwaazigwa loko alugwalo ndwaakalembelwa aPawulu. Alubo kweelede kuti Timotewo wakali kukkala kalubala lugwalo oolu akuyeeyesesya kuti nga ulaabelesya biyeni malayilile ali mulindulo mumulimu wakwe.

Andiswe tuyanda kwaabelesya malayilile aaya. Nga tulaabelesya biyeni? Kwiinda mukubeleka changuzu kuti tuchivwilimye mbuli mulilo chipo nchitwakapegwa, mukuchibamba kabotu chintu chiyandikana chibikkidwe mumaanza eesu akuyiisya bamwi zintu ziyandikana nzitwakayiisigwa. Kuti twachita oobo mbuli Pawulu mbaakabuzya Timotewo, ‘tuyoowuzuzikizya chakumaninina mulimu wesu’.—2 Tim. 4:5.