¿NÉNAJTSÏ pʼikuarherasïni engaksïni amigu ma uékperakua jingoni axachejka karta ma ka engaksïni uinhaperantajka? Apostuli Pablu xásï karta ma axakuspti Timoteuni. Karta ma enga iásï Bibliarhu jakaia ka engachi ísï míteka komu Segundu Karakata para Timoteo. Seguru eska Timoteu uékani japkia jima nirani arhintani kartani nani enga úpiringa agustu arhintani ka míteni ambe enga imeri amigu jémba uékani japka aianguni. Jamberi Timoteu kurhamarhikuarhiendi: “¿Na jaki Pablu? ¿Uékani jakirini konseju ma íntskuni parani sánderu sési úni juchiti ánchikuarhitani? ¿Marhuachiarini i karta parani sánderu sési aianhpini ka jarhuataani máteruechani?”. I ambakiti karta mókuantaspti ini kurhamarhikuechani ka ístu máteruechani. Exeauakachi máru konsejuechani engaksï ini kartarhu jaka ka engaksï kánikua marhuajka.

Enga Timoteu uénapka arhintani kartani, jirejiresï kuenta íntskukuarhespti eska Pablu jukaparharasïrenga imani. Pablu arhispti: “Juchiti uátsï Timoteu, engakini ji xáni uékajka” (2 Tim. 1:2). Timoteu ambakiti orhejtsïkuti máesptia, nájkiruka apenasi ma treintisï jatiripka enga intsïnhapka ini kartani, uéxurhini 65 jimbo. Jukari diesi uéxurhini páxaptia Pablu jingoni marhuani ka uánikua ambe jorhenguarhisptia imeri ambe.

Seguru eska Timoteuni kánikua uinhaperantapka enga Pablu tekaantani japka enga tsʼéjkukuechani jatsiapka. Roma ónhakata jarhaspti ka no ióni jimboksï uandikupirindia (2 Tim. 1:15, 16; 4:6-8). Timoteu úspti exeni na enga xáni balori xarhatani japka Pablu, jimboka karakuspka: “Ji tekaantaxaka iámindu ini ambe” (2 Tim. 2:8-13). Kánikua uinhaperantapti Timoteuni na enga xáni tekaantapka Pablu ka juchantsïntujtsïni uáti uinhaperantani.

Pablu jarhuataspti Timoteuni para exeni eska kánikua jukaparhakueska Tata Diosïni marhuakuni. Ima arhispti Timoteuni: “Arhistachixaka[kini] eskari sánderu interu mintsita jingoni úraaka indeni intsïmperakua Diosïrini engari pʼika” (2 Tim. 1:6). Pablu úraspti arini uandakuani “intsïmperakua” enga griegu jimbo jindeeka khárisma. I uandakua arhikuekasïndi ambe ma engachi intsïmbinhajka, no jukanchaparini ka engachi no andakuarhejka. Timoteu jiáni intsïnhaspti ini intsïmperakuani enga  erakunhapka para ambakiti ánchikuarhita ambe úni kúnguarhikuarhu (1 Tim. 4:14).

¿Ambe úpirini Timoteu ini intsïmperakua jingoni? Pablu arhispti Timoteuni eska mintsita jingoni úpiringa imeri ánchikuarhitani. Ísï komueska enga nema seguirijka jatsikuni chkari para chpiri no patakuarhini, Timoteu jatsispti para úni ambe ma para seguirini tsípikua jingoni aianhpini. Juchajtuchi jatsiska para májkueni jánguarhintani tsípikua jingoni marhuakuni Tata Diosïni.

Timoteu seguirispti arhintani Pablueri kartani ka exentaspti ambe enga jarhuatapiringa para sési nikuni aianhpikuarhu. Pablu karakuspti: “Ini ambakiti ambe engari patsaranhaka, patsa sési Espiritu Santuni jimbo enga irekani jaka juchari mintsitecharhu” (2 Tim. 1:14). ¿Nákispi ima ambakiti ambe enga Timoteu patsaranhapka? Máteru bersikulu jimbo Pablu uandaspti ‘pímbinharhati uandakuecheri’, enga jindeeka jurhimbikua ambe enga Tata Diosïri Karakatarhu jaka (2 Tim. 1:13). Komu Timoteu Tata Diosïri marhuari máepka, jatsispti para jurhimbikua ambe jorhendaani kúnguarhikuarhu anapuechani ka ístu máteru kʼuiripuechani (2 Tim. 4:1-5). Ístu, orhejtsïkuti únhaspti para Tata Diosïri karichichani orhekupaani (1 Ped. 5:2). Jeobaeri espiritu santuni jimbo ka imeri Karakata jimbo, Timoteu úpirindi kuájchakuni imani ambakiti ambe enga intsïnhapka ka i ambe jindeespti jurhimbikua ambe enga jatsipka para jorhentpini. (2 Tim. 3:14-17).

Juchajtuchi intsïnhaska ambakiti ambe: jurhimbikua ambe engachi jorhendaajka máteru kʼuiripuechani (Mat. 28:19, 20). Nóchi méni jatsiska para mirikurhini na enga xáni jukaparhakueka jurhimbikua ambe engachi jorhentpijka. Parachi ísï úni, jatsiskachi para méntku kómarhini jarhani Tata Diosïni ka someni arhintani Bibliani (Rom. 12:11, 12; 1 Tim. 4:13, 15, 16). Chájtsï ístu jamberi orhejtsïkutika ojtsï tiempu kompletueri marhuani jarhani. Ini ambe jatsini, jatsipirindi parajtsïni jarhuatani kaxumbitiini ka parachi mintsikani Tata Diosïni. Ísï jimbo, uákachi kuájchakuni ini ambakiti ambe engachi intsïnhaka, engachi jukaparharaska ka engachi jurajkuska eskajtsïni Jeoba jarhuataaka.

Ánchikuarhita ma Timoteueri, jindeespti máteruechani jorhendaani. Jimbosï Pablu arhipti: “Ambe engarini kurhajchaka jíndeni jorhentpini [...], jorhendaa máteru kʼuiripuechani engaksï mintsinharhikueka, ka engaksï uáka jorhendaani máteruechantu” (2 Tim. 2:2). Pablu miátantaxapti Timoteuni eska jatsispka para jorhendaani máteruechani iámindu ambe enga ima jorhenguarhipka. Ini jurhiatikuechani jimbo, kánikua jukaparhakuesti eskaksï ambakiti orhejtsïkuticha jánguarhintaaka májkueni ambe úni kúnguarhikuarhu ka nóksï imechajku pakatakuarhini ambe engaksï xáni mítekia. Sánderu sési, jorhendaasïndiksï máteruechani paraksï imechajtu sési úni imecheri ánchikuarhitani. Nóksï chésïndi eskaksï máteruecha sánderu sési uáka ánchikuarhita ma eska imecha, ísï jimbo nóksï imani ambejku jorhentpisïndi enga uétarhijka míteni para ánchikuarhita ma úni. Uékasïndiksï eska imecha engaksï jorhendaajka jorhenguarhiaka sési úni ambe ma ka eskaksï niáraaka ambakiti kristianueni engaksï eratsekua jukariuaka. Ísïksï i erachicha “engaksï mintsinharhikueka” uátiksï sánderu sési marhuani kúnguarhikuarhu.

Seguruchi jarhaska eska Timoteu kánikua jukaparharaspka imani kartani enga Pablu axakupka. A no eskachi eranhaskasïnga someni arhiantani jarhani ambakiti konsejuechani enga amigu jémba íntsaapka ka eratsentani jarhani néna úpirini ísï úni.

Juchajtuchi uékasïnga ísï úni eskaksï i konsejuecha na arhijka. ¿Nénachi uá ísï úni? Engachi jánguarhintaska seguirini mintsita jingoni úni juchari ánchikuarhitani, engachi kuájchakuska ambakiti ambe engachi intsïnhaka ka engachi jorhendauaka máteruechani ambe engachi xáni míteka. Ísï jimbo, májkueni eska Pablu na arhipka Timoteuni, uákachi kʼamakʼamasï úni juchari ánchikuarhitani (2 Tim. 4:5).