OYEHURRA ota obw’otunga ebbaruha erukugarramu amaani kuruga mwa munywani wawe? Omwegeswa Timoseo akatunga ebbaruha nk’egi kuruga mw’omukwenda Paulo eitukumanya hati nk’ekitabu kya Baibuli ekya 2 Timoseo. Hataroho kugurukyagurukya, Timoseo n’ekihika kingi akaserra ekiikaro ekiculiire nukwo asome munywani we ebyakaba amuhandiikire. Timoseo n’asobora kuba yayekagwize ngu ‘Paulo alyata? Aine obuhabuzi bwona obwarukugonza kumpa obusobora kukonyera omu buheereza bwange? Ebbaruha enu erankonyera kutebeza, kwegesa kurungi kandi n’okukonyera abandi?’ Nk’oku turarora, Timoseo akatunga eby’okugarukamu eby’ebikaguzo binu n’ebindi bingi omu bbaruha enu ey’omuhendo. Baitu hati leka tubazeeho obuhabuzi obumu obukuru oburukusangwa omu bbaruha enu.

Timoseo obuyatandikire kusoma ebigambo ebirukubanza eby’ebbaruha enu, aho naaho akaba nasobora kukyetegereza ngu Paulo n’amufaaho kwo mali. Omu mulingo ogw’okugonza, Paulo amweta “omwana wange arukugonzebwa.” (2 Tim. 1:2) Nobukiraaba ngu Timoseo nasobora kuba akaba aine emyaka nka 30 nambere yatungiire ebbaruha enu nk’omu 65 C.E., akaba amazire akasumi naheereza nk’omu gurusi omu kitebe. Akaba akozere na Paulo kumara emyaka erukuhingura omu 10 kandi akaba ayegere bingi.

Timoseo aine kuba yagarukirwemu muno amaani kukimanya ngu Paulo akaba alinzire obwesigwa bwe n’omu mihito ey’akaba narabamu. Paulo akaba ali munyankomo omu Roma kandi akaba ali haihi kwitwa. (2 Tim. 1:15, 16; 4:6-8) Timoseo akarora obumanzi bwa Paulo obuyahandikire ati: ‘Ningumiisiriza byona.’ (2 Tim. 2:8-13) Nka Timoseo, okugumiisiriza kwa Paulo nikusobora kutugarramu amaani.

Paulo akatererra Timoseo kutwara omulimo gwe omu kuheereza Ruhanga nk’ekintu eky’omuhendo muno. Paulo akaba nagonza Timoseo ‘acumemu ekisembo ekya Ruhanga’ ekyali kiri omuli uwe. (2 Tim. 1:6) Paulo akakozesa ekigambo khaʹri·sma kumanyisa “ekisembo.” Ekigambo eki eky’Oruyonani nikimanyisa ekisembo omuntu atungire busa kandi ekitamusemeriire. Timoseo akaba ahairwe ekisembo kinu obuyakomerwe kuheereza omu mulingo ogw’embaganiza omu kitebe.​—1 Tim. 4:14.

 Timoseo akaba asemeriire kukozesa ata ekisembo kinu? Obwakaba nasoma ebigambo binu “okucumamu ekisembo,” n’asobora kuba y’aijukire ngu obumu omurro ogw’omukyoto nigusobora kuleka kwaka hakasigaramu amakara kwonka. Omurro ogu guba nigwetaaga kucumamu nukwo gwongere gwake. Katondogorozi emu n’egamba ngu ekigambo kinu eky’Oruyonani (a·na·zo·py·reʹo) Paulo ekiyakozeseze nikimanyisa “kwongera okwakya omurro,” nahabweki kyali nikimanyisa kwongera kwekamba kukora omulimo n’okusemererwa. Eki nikimanyisa ngu Paulo akaba nagambira Timoseo ati: ‘Wekambe omu kuhikiriza obuheereza bwawe!’ Kasumi kanu, naitwe tusemeriire kukora ekintu nikyo kimu, kukora n’obwekambi kuhikiriza buheereza bwaitu.

Timoseo obuyagumizeemu nasoma ebbaruha enu kuruga mwa munywani we, akahika ha bigambo ebindi ebyakumukonyire kuba musinguzi omu buheereza bwe. Paulo akahandiika ati: “Ekintu ekirungi ekiwayahuziibwe okirinde omu mwoyo ogurukwera [ogurukwikara] omulitwe.” (2 Tim. 1:14) Ekintu ekyo nikiha? Timoseo baali bamwahwize ki? Omu rukarra orwa 13, Paulo akabazaaho ‘ebigambo ebyomiire,’ ago nugo amananu agayagambiirwe agali omu Byahandiikirwe. (2 Tim. 1:13) Nk’omutebezi Omukristaayo, Timoseo akaba asemeriire kutebeza amananu omu kitebe kandi n’okugatebeza abantu abandi. (2 Tim. 4:1-5) Ekindi, Timoseo akaba akomerwe kuheereza nk’omugurusi omu kitebe nukwo aliise igana lya Ruhanga. (1 Pet. 5:2) Timoseo akaba asemeriire kulinda ekintu ekiyayahuziibwe, ago nugo amananu agakaba asemeriire kwegesa nasigikirra ha mwoyo ogurukwera na ha Kigambo Kya Ruhanga.​—2 Tim. 3:14-17.

Kasumi kanu, naitwe twahuziibwe amananu agatutebeza abantu omu buheereza. (Mat. 28:19, 20) Titusemeriire kwebwa obukuru bw’amananu agatwegesa, nahabweki tusemeriire kusaba obutoosa kandi n’okwikara nitwesomesa Ekigambo Kya Ruhanga. (Bar. 12:11, 12; 1 Tim. 4:13, 15, 16) Nitusobora kuba twine n’obujunanizibwa obundi obw’okuheereza nk’omugurusi omu kitebe rundi tuli omu buheereza obw’akasumi koona. Obujunanizibwa obu obw’omuhendo busemeriire kutuletera kwebundaaza kandi n’okwesiga Yahwe kutukonyera. Nahabweki, nitusobora kulinda ekisembo ekitwayahuziibwe obu nitukitwara nk’eky’omuhendo kandi n’okusaba Yahwe kutukonyera tukikozese kurungi.

Obujunanizibwa bwa Timoseo bwali butakukwataho uwe wenka. Egi niyo nsonga habwaki Paulo yatereriire Timosoeo ati: “Ebi ebiwahuliire namberendi . . . , nibyo oyahuze abantu abokwesiga, abalisobora okwegesa abandi.” (2 Tim. 2:2) Paulo akaijukya Timoseo kwegesa abandi ebintu byona ebyakaba ayegesiibwe. Kikuru muno kasumi kanu buli mugurusi omu kitebe kwekamba kukora ekintu nikyo kimu. Omugurusi ow’ekitebe omurungi taikiriza ihali kumuletera kwesigaliza amagezi againe ha mulingo omulimo gusemeriire kukorwamu. Oihireho, ayegesa abandi nukwo nabo basobole kukora omulimo ogu. Tatiina ngu nibasobora kumanya bingi kumukira rundi kugukora kurungi kumukira. Nahabweki omugurusi obwaba nayegesa taraba haiguru kwonka baitu akonyera abo abarukutendeka kwega kukora encwamu enungi kandi n’okurorra hara nukwo bakule omu by’omwoyo. Omu mulingo ogu, ‘abantu abesigwa’ abayegeseze nibaija kuba kukonyera muno omu kitebe.

Hataroho kugurukyagurukya, Timoseo akagonza muno ebbaruha enu enungi kuruga hali Paulo. Nitusobora kuteramu akasisani Timoseo nasoma ebbaruha enu emirundi nyingi kwetegereza obuhabuzi obuyahairwe kandi nayecumitirizaaho omulingo asobora kubuteeka omu nkora omu buheereza bwe.

Naitwe kirungi tuteeke omu nkora obuhabuzi obu. Omu mulingo ki? Twekambe kucumamu ekisembo, kulinda amananu agatwayahuziibwe, kandi n’okwegesa abandi ebintu byona ebitumanyire. Obuturakora eki, nitwija kusobora kuhikiriza kurungi obuheereza bwaitu nk’oku yagambiire Timoseo.​—2 Tim. 4:5.