KASI mukujipulika wuli para mwapokera kalata yakukhozga kufuma kwa mubwezi winu? Msambiri Timote wakapokerapo kalata yanthena kufuma kwa Paulosi. Kalata iyi sono ni buku la mu Baibolo la 2 Timote. Timote wakwenera kuti wakapenja malo ghawemi ghambura viwawa kuti waŵazge ivyo mubwezi wake wakamulembera. Panyake Timote wakaghanaghananga kuti: ‘Kwali Paulosi wali wuli? Kasi wakukhumba kunipa ulongozgi uwo unganovwira pakuchita uteŵeti wane? Kasi ulongozgi uwu unovwirenge pa uteŵeti wane kweniso kovwira ŵanji?’ Nga umo tiwonerenge, Timote wakasanga mazgoro gha mafumbo agha kweniso fundo zinyake mu kalata yakuzirwa iyi. Kweni pasono, tiyeni tidumbiskanepo fundo zichoko waka za mu kalata iyi izo zili na ulongozgi wakovwira.

Timote wati wamba waka kuŵazga kalata iyi, mwaluŵiro wakwenera wakamanya kuti Paulosi wakamutemwanga chomene. Paulosi wakamuchema kuti “mwana wane wakutemweka.” (2 Tim. 1:2) Kweni apo Timote wakapokeranga kalata iyi m’ma 65 C.E, wakwenera kuti wakaŵa na vyaka vyakujumpha 30 ndiposo wakaŵa kuti ni mubali mulara wakumanya kale vinandi. Wakaŵa kuti wateŵeterapo kale na Paulosi kwa vyaka vyakujumpha 10 ndipo wakasambirako vinandi.

Timote wakwenera kuti wakakhozgeka chomene kumanya kuti Paulosi wakazizipizganga masuzgo mwakugomezgeka. Panyengo iyi Paulosi wakaŵa kuti ni mukayidi ku Romu ndipo wakaŵa pafupi kukomeka. (2 Tim. 1:15, 16; 4:6-8) Timote wakawona kuti Paulosi wakaŵa wachikanga chifukwa Paulosi wakayowoya kuti: “Nkhulutilira kuzizipizga vinthu vyose.” (2 Tim. 2:8-13) Nga ni Timote, nase tingakhozgeka pakuwona umo Paulosi wakazizipizgira.

Paulosi wakachiska Timote kuti wawonenge uteŵeti uwo wakuchitira Chiuta kuti ngwakuzirwa chomene. Paulosi wakakhumbanga kuti Timote ‘wasonkhezge nga ni moto chawanangwa cha Chiuta’ icho chikaŵa mwa iyo. (2 Tim. 1:6) Paulosi wakagwiliskira ntchito lizgu Lachigiriki lakuti khaʹri·sma pakuyowoya za “chawanangwa.” Lizgu Lachigiriki ili, likuyowoya za chawanangwa icho munthu wapokera nangauli weneranga kupokera yayi, panji chinthu icho munthu wasanga kwambura  vuchi. Timote wakapokera chawanangwa ichi wati wapika mulimo wapadera mu mpingo.—1 Tim. 4:14.

Kasi Paulosi wakachiska Timote kuti wachite vichi na chawanangwa ichi? Apo wakaŵazganga mazgu ghakuti “usonkhezge nga ni moto,” wakwenera kuti wakaghanaghaniranga za moto uwo ŵanthu ŵakupemba mu zinyumba zawo uwo pamanyuma kanandi ukuzgoka waka makara. Kweni kuti makara agha ghalutilire kubuka, munthu wakwenelera kulutilira kusonkhako panji kuti kughafukura. Dikishonare yinyake yikuti verebu Lachigiriki (a·na·zo·py·reʹo) ilo Paulosi wakagwiliskira ntchito likung’anamura kuŵa wakukondwa na wakulimbikira ntchito. Ntheura apa tingati Paulosi wakachiskanga Timote kuti: ‘Uŵikepo mtima pa uteŵeti wako.’ Mazuŵa ghano napo ndimo tikwenera kuchitira, tikwenera kuŵikapo mtima pa uteŵeti withu.

Mu kalata yake, Paulosi wakalembamo chinthu chinyakeso icho chikamovwira Timote kuti wachitenge makora uteŵeti wake. Paulosi wakalemba kuti: “Mzimu utuŵa uwo ukukhala mwa ise ukovwire kusungilira usambazi uwu.” (2 Tim. 1:14) Kasi ni usambazi wuli uwo Timote wakapika? Mu mavesi gha pamanyuma, Paulosi wakayowoyanga za “mazgu ghaunenesko” agho ghakusangika mu Malemba. (2 Tim. 1:13) Pakuŵa Mkhristu, Timote wakeneranga kusambizga unenesko ku ŵabali na ŵadumbu mu mpingo kweniso ŵanthu mu chigaŵa cha kwake. (2 Tim. 4:1-5) Kweniso Timote wakaŵa kuti wimikika kuŵa mulara mu mpingo kuti waliskenge mskambo wa Chiuta. (1 Pet. 5:2) Timote wakeneranga kugomezga mzimu utuŵa wa Yehova na mazgu ghake kuti wasungilire usambazi uwo wakapika, uwo ukaŵa unenesko uwo wakeneranga kusambizga.—2 Tim. 3:14-17.

Mazuŵa ghano nase tapika unenesko uwo tikusambizga ŵanji. (Mat. 28:19, 20) Tingalutilira kuwona unenesko uwu kuti ngwakuzirwa para tikulutilira kulomba na kusambira Mazgu gha Chiuta nyengo zose. (Rom. 12:11, 12; 1 Tim. 4:13, 15, 16) Tingaŵaso na milimo yakusazgikira mu mpingo. Nyengo zinyake tingaŵa kuti ndise mulara mu mpingo panji mupayiniya wanyengozose. Milimo yakuzirwa yanthena iyi yikwenera kutovwira kuŵa ŵakujiyuyura, kweniso kugomezga chomene Yehova kuti watovwire. Ntheura tingasungilira unenesko uwu, para tikuwuwona kuti ngwakuzirwa kweniso para tikugomezga Yehova kuti watovwire.

Uteŵeti uwo Timote wakapokera ukaŵa wake pera yayi. Wakenerangaso kusambizgako ŵanji. Lekani Paulosi wakaphalira Timote kuti: “Vinthu ivyo nkhakuphalira  . . , uvipeleke ku ŵanthu ŵakugomezgeka, awo ŵaŵengeso ŵakwenelera kusambizga ŵanyawo.” (2 Tim. 2:2) Nadi, Timote wakeneranga kusambizga ŵabali ŵanyake vinthu vyose ivyo wakasambira. Ntheura ntchakuzirwa chomene kuti awo ŵali na maudindo mu mpingo Wachikhristu mazuŵa ghano, ŵachitenge mwakuyana waka. Mulaŵiliri muwemi wakubisa yayi ivyo wakumanya vyakukhwaskana na ntchito yinyake. M’malo mwake, wakusambizga ŵanji kuti nawo ŵamanye umo ŵangagwilira ntchito iyo. Wakopa yayi kuti ŵanji ŵangamanya vinandi na kuchita makora ntchito iyo kujumpha iyo. Ntheura wakuŵasambizga mwapachanyapachanya waka yayi. Kweni wakuŵawovwira kuti ŵapulikiskenge vinthu kweniso kuti ŵakure mwauzimu. Para vyaŵa nthena, ŵanalume ŵakugomezgeka awo waŵasambizga ŵangawovwira chomene mpingo.

Tikukayika yayi kuti Timote wakawonga chomene kalata iyo wakapokera kufuma kwa Paulosi. Wakwenera kuti wakaŵazganga kalata iyi mwakuwerezgawerezga na kughanaghanira umo wangagwiliskira ntchito ulongozgi wa mu kalata iyi pakuchita uteŵeti wake.

Naseso tikwenera kulondezga ulongozgi uwu. Kasi tingawulondezga wuli? Tikwenera kulimbikira kusonkhezga nga ni moto chawanangwa chithu na kuchisungilira kweniso kusambizga ŵanji vyose ivyo tikumanya. Usange tichitenge nthena, nase ‘tifiskenge uteŵeti withu mwakukwana’ nga umo Paulosi wakayowoyera kwa Timote.—2 Tim. 4:5.