NE A ou lagonaga ma maua ne koe se tusi fakamalosi mai se taugasoa pele? Ne maua ne te soko Kelisiano ko Timoteo se tusi penā mai te apositolo ko Paulo, ko te tusi telā ko iloa nei ne tatou me ko te tusi i te Tusi Tapu ko te 2 Timoteo. E mautinoa me ne ‵sala a Timoteo ki se koga e se logoa ko te mea ke faitau ne ia a pati mai tena taugasoa. Kāti ne mafaufau a Timoteo: ‘E a mai a Paulo? E mata, e isi ne ana pati fakatonutonu ki a au e uiga ki taku taviniga? E mata, ka maua ne au i te tusi tenei a manatu aoga ki taku galuega talai kae ke fesoasoani atu foki ki nisi tino?’ E pelā mo mea ka lavea ne tatou ne maua ne Timoteo a tali ki fesili konei mo mea e uke atu i te tusi tāua tenei. Kae nei la, ke onoono tatou ki nāi manatu fesoasoani tāua i loto i te tusi tenei.

I te faitauga ne Timoteo a pati kamata o te tusi, ne lavea fakavave ne ia a te fesokotakiga pili ne maua ne ia mo Paulo. Ne taku ne Paulo a ia i se auala alofa me ko taku “tama pele.” (2 Timo. 1:2) E tiga loa ko 30 tupu tausaga o Timoteo i te mauaga ne ia te tusi tenei, kāti i te 65 T.A., ko leva ne fai a ia mo fai se toeaina Kelisiano atamai. Ne ‵kau fakatasi faeloa a ia mo Paulo i se sefulu tupu tausaga kae uke ana mea ne tauloto mai i ei.

I te taimi ne iloa i ei ne Timoteo me fa‵kī ne Paulo mo te fakamaoni a tofotofoga faiga‵ta, kāti ne fakamalosi atu a te mea tenā ki a ia. Ne ‵loka a Paulo i Loma, kae ko pili fua a ia o tamate. (2 Timo. 1:15, 16; 4:6-8) Ne lavea ne Timoteo a te loto malosi o te apositolo, me ne fai mai a ia: “E fa‵ki faeloa au i mea katoa.” (2 Timo. 2:8-13) E pelā mo Timoteo, e mafai foki o maua ne tatou a te malosi mai te fakaakoakoga tafasili i te gali a Paulo e uiga ki tena kufaki.

Ne fakamalosi atu a Paulo ki a Timoteo ke kilo ki tena taviniga mai te Atua e pelā me se mea tāua. Ne manako a Paulo ko Timoteo “ke faka‵ka ne [ia] e pelā me se afi, te meaalofa a te Atua” telā i loto i a ia. (2 Timo. 1:6) Ne fakaaoga ne Paulo a te pati khaʹri·sma ke ‵fuli ki ei te pati “meaalofa.” E fakasino eiloa a te pati Eleni tenei ki se meaalofa ne tuku mai e aunoa mo se ‵togi, telā ne tuku mai i te alofa tauanoa. Ne maua ne Timoteo a te meaalofa tenei i te taimi ne ‵vae kea‵tea a ia, ke tavini atu ki te fakapotopotoga i se auala fakapito.—1 Timo. 4:14.

 Ne a mea ka fai ne Timoteo ki te meaalofa tenei? I tena faitauga ki te tugapati “faka‵ka pelā me se afi,” kāti ne mafaufau a ia ki afi kolā ne fai pelā me ne malala ‵ka. E tau o fue a malala ‵ka konā ko te mea ke ‵ka kae ke ‵vela foki. E fai mai se tikisionale e tasi me i te veape Eleni (a·na·zo·py·reʹo) telā ne fakaaoga ne Paulo e fakauiga ki te “toe fai ke ola, fai ke ala, fue ke ‵ka,” ko tena uiga “e ‵tau o toe fakamalosi aka ke gasuesue o fai se mea.” Tela la, ne fakamalosi atu a Paulo ki a Timoteo: ‘Fai tau taviniga mo tou loto kātoa!’ Kāti e lotomalie foki koe me ‵tau o fai ne tatou te mea tenā i aso nei—fai ‵toe mea e mafai o fai i ‵tou taviniga.

Kae koi faitau a ia ki te tusi mai tena taugasoa pele, ne faitau ne Timoteo te suā tugapati telā ka aoga ki tena galuega talai. Ne tusi atu a Paulo; “Ke puipui te mea tāua tenei e auala i te agaga tapu, telā e nofo i loto i a tatou.” (2 Timo. 1:14) Se a te mea tāua tenā? Se a te mea ne tuku atu ki a Timoteo? I te fuaiupu mai mua, ne fakasino atu a Paulo ki “pati aoga,” ko te munatonu e maua i loto i te Tusi Tapu. (2 Timo. 1:13) E pelā me se tino talai Kelisiano, e ‵tau o talai atu ne Timoteo a te munatonu ki tino i loto fakapotopotoga mo tino mai tua. (2 Timo. 4:1-5) E se gata i ei, ko oti foki ne ‵tofi a Timoteo e pelā me se toeaina ke tausi atu ki te lafu mamoe a te Atua. (1 Pe. 5:2) E mafai o puipui ne Timoteo a te mea tenei—ko te munatonu telā e ‵tau o akoako atu ne ia—mai te fakalagolago ki te agaga tapu o Ieova mo Tena Muna.—2 Timo. 3:14-17.

I aso nei, ne tuku mai foki ki a tatou a te munatonu telā e talai ne tatou i te galuega talai. (Mata. 28:19, 20) E tau o loto fakafetai faeloa tatou ki te munatonu tāua tenei, mai te tumau i te ‵talo faeloa, mo te fakamasani o fai a sukesukega ki te Muna a te Atua. (Loma 12:11, 12; 1 Timo. 4:13, 15, 16) Kāti e maua foki ne tatou se tofiga fakaopoopo e pelā me se toeaina i te fakapotopotoga, io me tavini atu i te taviniga tumau. A tauliaga tāua penā, e ‵tau o fai ei ke loto mau‵lalo tatou kae ke fakalagolago faeloa ki te Atua. Tela la, e ‵tau mo tatou o puipui faka‵lei a mea konā ne tuku mai ki a tatou, mai te fakalagolago katoatoa ki a Ieova.

A te taviniga ne tuku atu ki a Timoteo ne seki tuku atu fua ki a ia tokotasi. Ne aofia foki a nisi tino i ei. Tenā te pogai ne fakamalosi atu a Paulo ki a Timoteo: “Mea kolā ne lagona ne koe mai i a au . . . , tuku atu . . .  ki tāgata fakamaoni, kolā ka fetaui ‵lei o akoako a nisi tino.” (2 Timo. 2:2) Ao, e ‵tau o tauloto ne Timoteo a mea e uke mai i ana taina Kelisiano kae ke akoako foki latou. Se mea tāua foki ke taumafai a ovasia katoa i fakapotopotoga Kelisiano o fai penā. A te ovasia ‵lei e se taofi ne ia mo te loto masei a mea e iloa ne ia e uiga ki te faiga o se galuega. I lō te fai penā, e akoako ne ia a nisi tino ke iloa ne latou o fai te galuega. E se manavase a ia i te mea ma ‵lei atu latou i a ia, māfai ko iloa ne latou a mea e uke ki te faiga o se galuega. Tela la, e se akoako fua ne te ovasia a mea masani ke fai ei te galuega. E taumafai a ia o akoako a latou ke iloa ne latou o fai a faka‵tauga ‵lei kae ke ‵loto te lotou malamalama—ke ma‵tua latou i te feitu faka-te-agaga. I te auala tenā, ka maua i ei ne te fakapotopotoga a mea aoga e uke e auala i “tāgata fakamaoni” kolā ne akoako ne ia.

E mautinoa me ne fakatāua malosi ne Timoteo a te tusi fakamalosi ne maua ne ia mai i a Paulo. E mafai o fakaataata ne tatou a ia e faitau fakafia ki manatu tāua i te tusi tenā, kae mafaufau ‵loto ki te ‵toe auala ‵lei ke fakagalue ne ia i tena taviniga.

E ma‵nako foki tatou o fakagalue a pati fakatonutonu konei. E pefea la? E taumafai tatou ke faka‵ka pelā me se afi te meaalofa ne tuku mai ki a tatou, ke puipui te munatonu, kae ke fakaasi atu ki nisi tino a ‵tou mea e iloa mo ‵tou atamai. I te auala tenā, ka mafai ei o “fakataunu katoatoa [‵tou] galuega” e pelā mo pati a Paulo ne fai ki a Timoteo.—2 Timo. 4:5.