MAIZOZWA kudini pamunotambira tsamba inobambisa inonga yabva kuno shamwari yakanaka? Mufundi we ciKristu unozwi Timoti, wakatambira tsamba ye mu phostori Pauro, tsamba yatinoziya nyamasi uno ye bhuku re Bhaibheri ya 2 Timoti. Zviri pamhene kuti Timoti wainga uno cidaka-daka ce kutopsvaka mbuto yakanyararisa kuti akwanise kuerenga tsamba ii kuti azwe zviro zvaida kubhuya shamwari yake. Pamweni Timoti wairangarira kuti: ‘Pauro wainga akadini? Uno mupango waari kuda kundibvunza nge zve basa rangu here? Tsamba ii ingadibetsera kuti ndikwanise kubudirira pa basa rangu re ciKristu uye ndibetserewo amweni here?’ Hingana zvaticaona, Timoti wakagumira mhinduro dze mibvinzo idzi uye no zvakawanda mu tsamba ii. Asi, parizvino, ngationei mafundo manganani aticakwanisa kufunda mu tsamba iyona.

Timoti paakatanga kuerenga masoko ekutanga e tsamba ii, iyena waikwanisa kuzwa ushamwari we pamwoyo wainga uripo pakati pake na Pauro. No ushamwari, Pauro wakamudaidza kuti “mwana unodiwa.” (2Ti. 1:2) Pamweni Timoti wainga aano makore anokwana kuita 30 paakatambira tsamba ii, mukati me makore 65 K.A., iyena wainga atori mukuru we ciKristu ano ruziyo. Iyena wakagara na Pauro makore anodarika 10 uye wainga afunda zvakawanda.

Timoti wakabambiswa maningi nge kuziya kuti Pauro wainga ecishingirira matambudzika. Pauro wainga ari mukaraboso ku Roma, eciringisana no rufu. (2Ti. 1:15, 16; 4:6-8) Timoti waikwanisa kuona ushingi wainga na Pauro: “Ndinorumbwa ndecishingirira pa zviro zvese.” (2Ti. 2:8-13) Hingana Timoti, tinokwanisawo kuona simba nge muezaniso unoshamisa we kushingirira ka Pauro.

Pauro wakakohomedzesa Timoti kuti abate no nyara mbiri basa ra Mwari raainga anaro. Pauro wakati Timoti “waidikana kuita hingana muriro uri kubaka no cipo ca Mwari” cainga ciri maari. (2Ti. 1:6) Pauro wakaseenzesa soko rekuti khaʹri·sma kuti abhuye “cipo.” Muci Gedego soko iri rinoreya cipo ce mahara uye cisikasisiri, ciro cinopaswa munhu asikasisiri uye cisikatoiti kuti agare naco. Timoti wakatambira cipo ici paakagadzwa kuti aite basa rinokosha mu ungano.—1Ti. 4:14.

 Timoti wakaitei no cipo ici? Paaierenga soko rekuti “kubaka hingana muriro,” pamweni iyena wakarangarira zvinoitika kana muriro wecibaka pa nyumba, pamweni paya ungakwanisa kuita mututu we marasha. Marasha aya aidikana kuunganidzwa pamwepo kuti abvise muriro unopisa. Mu lexicon umweni wakati, muci Grego soko iri (a·na·zo·py·reʹo) rakaseenzeswa na Pauro rinoreya “kubasirazwe, kukhwindidzira, kuita kuti ubake,” nge masoko amweni zvinoreya “kuitazve mabasa mapsva.” Zvezvirokwazvo, Pauro wainga ecipasa zano Timoti rekuti: ‘Kanda mwoyo wako pa basa!’ Zvirokwazvo kuti munozwisisa kuti nyamasi uno, tinodikana kuitawo zvimwezvo—kupeta masimba ari ese pakuita basa ra Djehovha.

Ecienderera mberi no kuerenga tsamba ye shamwari unodiwa, Timoti akagumira soko rimweni raizomubetsera kuti abudirire mu basa rake. Pauro wakatara eciti: “Cengetedza zve wakacengeteswa ucibetserhwa no mwiya mucena, uwo uri kugara matiri.” (2Ti. 1:14) Zvinyi zvaainga acengeteswa? Zvinyi zvaainga apaswa Timoti kuti acengetedze? Mu vherisikuro yadarika, Pauro wakareketa nge zve “masoko anopasa uthongo,” cokwadi cinorekethwa mu matarhwa. (2Ti. 1:13) Hingana museenzi we ciKristu, Timoti waidikana kuparidzira cokwadi kunza no mukati me ungano. (2Ti. 4:1-5) Kupinda izvi, Timoti wainga agadzwa hinga mukuru kuti aushe mabira a Mwari. (1Pe. 5:2) Timoti waikwanisa kucengetedza rugondo rake—cokwadi caaidikana kufundisa—ecigonda no mwiya mucena wa Djehovha no Soko Rake.—2Ti. 3:14-17.

Nyamasi uno, isusu takacengeteswawo cokwadi catinobvunza amweni mu basa re kuparidzira. (Mt. 28:19, 20) Tinokwanisa kucengetedza zviya zvatakacengeteswa zvinoshamisa, tecishingirira mu munamato uye tecisakurira musambo we kugara tecifunda Soko ra Mwari. (Aro. 12:11, 12; 1Ti. 4:13, 15, 16) Tingakwanisa kugara no basa re kutunhudzira rekuseenza hingana mukuru kana kuti mubati anoseezera we nguwa yakadzara. Kugondwa kakadai kunodikana kuita kuti tidzidodose, zvecitibetsera kuti tione kuti tinobetserhwa na Mwari. Ngokudaro, tinokwanisa kucengetedza basa riya rakatakapaswa, teciribata no nyara mbiri uye tecibetserhwa no rubetso ra Djehovha kuti tiriite.

Basa rakapaswa Timoti rainga risiripi rake ega. Amweni aibatanidzwawo. Ndiyo ndaa Pauro wakakumbira Timoti kuti: “Zviro zvawakazwa kandiri . . . , zvipase anarume akagondeka, cinyi, cokwadi, awona acanyatsokwanisawo kufundisa amweni.” (2Ti. 2:2) Honde, Timoti waikwanisa kufunda zvakawanda kubva ku hama dzake uye kuapasawo zvaiinga anazvo. Zvirokwazvo kuti aonereri ese e nharaunda nyamasi uno anopetawo masimba kuti adaro. Muonereri we nharaunda wakanaka aaigi zviya zvaanoziya nge zve maiizirhwe e basa. Nge dii rimweni, iyena unofundisa amweni kuti akwanise kuitawo basa ngo mwazvo. Iyena aatyi ngokuti unozooneka kuti unoziya maningi kana kuti uri kuda kudzionesa kuti uno ruziyo rakakura. Ngokudaro, muonereri we nharaunda aafundisi basi nge zve ruziyo rekutanga re basa. Iyena uri kuda kubetsera aya aanofundisa kuti akudze ruziyo re kunyasa kuita basa—akure ku mwiya. Nge gwanza iri, “anarume akagondeka” aanonga afundisa, acanyasa kutsigira ungano.

Zviripamhene kuti, Timoti wakabata no nyara mbiri tsamba yaakatambira yecibva kuna Pauro. Tinokwanisa kurangarira eciphinda aphindazve kuerenga mazano anobetsera uye ecirangarira kuti angaseenzesa kudini mu basa rake.

Tinodawo kubata no nyara mbiri mazano aya. Ngei? Tinokwanisa kupeta masimba kuti timutsire ruziyo redu hingana muriro, kucengetedza zviya zvatakacengeteswa, uye kupasawo amweni ruziyo ratinaro. Nge mushobo umwewo, hingana zvakaona Pauro kuna Timoti, ticakwanisa “kuita zvakanyasa kudzara basa redu re kuparidzira.”—2Ti. 4:5.