ЧООК эжиңерден чагаа алгаш, чүнү миннир-дир силер? Тимофей ындыг чагааны Павелден алган. Ол чагаа Ыдыктыг Бижилгениң бир кезээ апарып, Тимофейге ийиги чагаа деп атты алган. Тимофей оожум черни тып алгаш, эжинден чагааны номчуксап турган чадавас. «Павел меңээ чүнү бижээн ирги? Ол бодунуң кайы-хире чоруп турарын бижээн ирги бе азы хуралда хүлээлгелеримге хамаарыштыр эки сүме берген бе? Чок болза Павел суртаалга болгаш улусту алыс шынга өөредиринге хамаарышкан айтыышкыннарны берген бе?» деп, ол бодап турган чадавас. Тимофей ол айтырыгларның харыызын болгаш өске-даа үнелиг бодалдарны ол чагаадан алган. Оларның чамдыызын сайгарыптаалыңар.

Павелдиң «ханы ынак оглум» деп бижээн сөстеринден Тимофей аңаа эргим мен деп чүүлдү миннинген (2 Тим. 1:2). Тимофей ол чагааны б. э. 65 хире чылда алган. Ынчан ол 30 хире хар ашкан, хуралдың дуржулгалыг удуртукчузу турган. Тимофей Павел-биле 10 чыл ажыг эдеришкеш, дыка хөй чүүлге өөренип алган.

Павел шенелделерге шынчы артып турар боорга, Тимофей дыка өөрээн. Павелди Римниң кара-бажыңынга өлүрүп шиидер дээш, хоругдап каан турган (2 Тим. 1:15, 16; 4:6—8). Ынчалза-даа Павел шиитпирлиг хөөнүн чидирбейн, «чүнү-даа шыдажып чор мен» деп бижээн (2 Тим. 2:8—13). Павелдиң бо сөстери ам-даа күштүг бооп артпышаан. Ол сөстер Тимофейниң хей-аъдын көдүрүп турганы ышкаш, бистиң база хей-аъдывысты көдүрүп турар.

Павел Тимофейни Бурганның аңаа дааскан ажылын бедик үнелээринче оттурган. «Бургандан алганың ачы-буянныг белектиң одун өжүрбейн көр» деп, ол бодунуң өңнүүнден дилээн (2 Тим. 1:6). Павел мында ха́рисма деп грек сөстү ажыглаан, ол дээрге «кижиниң бодунуң ажыл-херээ-биле чедип алыры болдунмас, Бурганның авыралы-биле бердинген белек-тир». Тимофей ол белекти, кажан ону христиан хуралдың тускай бараалгалынга шилип алырга, алган (1 Тим. 4:14).

 Тимофей Бургандан алган белээн канчаар ажыглаар ужурлуг турган? Тимофей «одуң өжүрбейн көр» деп сөстерни номчааш, бажыңында одагның чылыг көстерин сактып келген чадавас. Одагга чалбыыштар тыптып, бажың чылыг болзун дизе, көстерни оон-даа кыптыктырары херек. Бир словарьдан алырга, Павелдиң аназопире́о деп ажыглаан сөзүн грек дылдан очулдурарга, «кыпсыр, катап тывылдырар, чалбыышталдырар» дээн уткалыг. Өскээр чугаалаарга, Павел Тимофейге: «Даандырган ажылыңга бүгү бодуңну бер!» деп оттурган. Бараалгалга кыптыгары бистен база негеттинип турар.

Оон ыңай Павел Тимофейге мындыг сүмени берген: «Сеңээ идегээн бүгү буянны бисче сиңнигип кире берген Ыдыктыг Сүлдениң күжү-биле кадагала» (2 Тим. 1:14). Тимофейге чүнү бүзүреткенил? Мурнунда шүлүктен алырга, Павел Тимофейге Ыдыктыг Бижилгеде бижиттинген «шынныг өөредигниң» сөстериниң дугайында сагындырган (2 Тим. 1:13). Тимофей хуралдың удуртукчузу турган, ынчангаш Иегованың хойларының дугайында база сагыш салып турган (1 Пет. 5:2). Ол чыышта акы-угбаларга алыс шынның дугайында өөредип база өскелерге ооң дугайында суртаалдаар ужурлуг турган (2 Тим. 4:1—5). Тимофей аңаа бүзүреткен алыс шынны кадагалаарда, Бурганның ыдыктыг сүлдезинге болгаш Ооң Сөзүнге ынаныр ужурлуг турган (2 Тим. 3:14—17).

Бөгүн биске база алыс шынны бүзүреткен, бис ол алыс шынны өскелерге өөредип турар бис (Мф. 28:19, 20). Ол алыс шын кайы хире үнелиг деп утпас болзувусса эки. Ынчангаш Иеговага үргүлчү мөргүп, Ооң Сөзүн ханы шинчилээр ужурлуг бис (Рим. 12:11, 12; 1 Тим. 4:13, 15, 16). Бистиң чамдыывыс удуртукчу бооп бараалгап чоруур, а бир өскелери долу бараалгап турар. Биске ол хире улуг алдар-хүндүнү көргүскени боттарывысты томаартырынче оттурар ужурлуг. База Иегованың дузазы чокка ону кылып шыдавас бис деп утпаалыңар. Биске бүзүредип каан алыс шынга ынакшылывыс өжүп кагбас кылдыр, Бурганның дузазын үргүлчү хүлээп чоруулуңар!

Оон аңгыда, Павел Тимофейни «менден дыңнаан өөредиглериңни өскелерни өөредип шыдаар шынчы улуска идегеп берип каг» деп оттурган (2 Тим. 2:2). Ынчаарга Тимофей бодунуң билиглерин болгаш дуржулгазын өскелер-биле үлежир ужурлуг турган. Бо сүмени амгы үеде хуралдың удуртукчу бүрүзү кичээнгейге алыр ужурлуг. Эки удуртукчу бодунуң билиглерин харам чокка өскелер-биле үлежип, дуржулгазын дамчыдар боор. «Өске акылар менден артык болу бээйне» деп, ол сагышсыравас. Ооң сорулгазы — акыларны анаа-ла ажыл-херек кылырынга өөредири эвес, а хүлээлгелеринге харыысалгалыг хамаарылгалыг бооп, чедишкен христианнар апаарынга дузалаары-дыр. Ынчан, ол өөредигни эрткен «шынчы улус» хуралга ажык-үнезин көргүзе бээр.

Кандыг-даа чигзиниг чок, Тимофей Павелден алган чагаазын үнелеп, ону катап-катап номчуп, ында бердинген сүмелерниң дугайында ханы боданып чораан.

Бис база ол чагааның сөстеринге кичээнгейлиг бооп, «ачы-буянның одун өжүрбейн», биске идегээн бүгү буянны кадагалап, өскелер-биле үлежип, дуржулгавысты дамчыдар болзувусса эки. Ынчан Павелдиң Тимофейге бижээни дег, «бараан болуушкунувусту эчизинге чедир» күүседип шыдаптар бис (2 Тим. 4:5).