¿BIN yaʼiyel ya awaʼiy kʼalal jtul awamigo ya stikunbat tʼujbil karta te ya yakʼbat smukʼul awoʼtane? Te jpuk-kʼop Pablo jich la stikunbey jun karta te Timoteoe, jaʼ jun karta te och jilel ta Biblia te ya jnaʼbeytik sba jich bitʼil Schebal Karta ta stojol Timoteo. Te Timoteo yoʼtanuk ya skʼan ya xbajtix ta jun lugar te banti lamalnax kʼinal yuʼun ya skʼopon te karta swenta jich ya snaʼ te bin albot tal yuʼun te yamigoe. Ayniwan jich la sjojkʼoybey sba te Timoteoe: «¿Lekbal ay te Pabloe? ¿Aybal la stikunbon tal jun konsejo yuʼun ya jpasxan ta lek-a te kaʼtele? ¿Yabal skoltayon te karta ini swenta ya jlekubtesxan te bin-utʼil ya jchol te skʼop Dios sok ta skoltayel te yantike?». Te tʼujbil karta ini la yakʼbey sujtib te jojkʼoyeletik-abi sok yantikxan. Kilbeytik skʼoplal cheʼoxeb konsejo te ay ta karta-abi.

Te kʼalal jajch ta skʼoponel te karta te Timoteoe, oranax la sta ta ilel te kʼax lek ilbil yuʼun te Pabloe. Sok yutsil yoʼtan jich la yalbey «jnichʼan te cʼuxat ta coʼtan» (2 Tim. 1:2). Ta jaʼbil 65 bael la yichʼ akʼbeyel te karta ini te Timoteoe, kʼaxemniwan ta 30 yaʼbilal-a sok bayal ya snaʼix spasel-a te yaʼtel jich bitʼil ansiano. Melel kʼaxem ta lajuneb jaʼbil la sjokin ta aʼtel te Pabloe sok bayal bin la snop ta stojol.

Ta melel la sta smukʼul yoʼtan te Timoteo te kʼalal la snaʼ te jun yoʼtan yak ta stsʼikel swokol te Pabloe. Ay ta chukel ta Roma-a te Pabloe sok nopol ya yichʼix milel-a (2 Tim. 1:15, 16; 4:6-8). Te Timoteo la sta ta ilel te maba yak ta xiwel-a te Pabloe, melel jich tsʼibaybot: «Spisil ya xcuhch cuʼun» (2 Tim. 2:8-13). Te bitʼil juʼ yuʼun stsʼikel swokol te Pabloe, akʼbot bayal smukʼul yoʼtan te Timoteoe, jaʼnix jich te joʼotik ya xjuʼ ya yakʼbotik smukʼul koʼtantik.

Te Pablo la yakʼbey snaʼ te Timoteo te mukʼuk skʼoplal ya yil te aʼtelil akʼbil yuʼun te Diose. Jich la yalbey: «Ya calbat te ya me awacʼ tihluc xan te mahtanil yuʼun Dios te awichʼoj» (2 Tim. 1:6). Te Pablo la stuuntes te kʼopil khárisma te ay ta griego kʼop te ya skʼan ya yal «mahtanil». Te bin smakojbey skʼoplal te kʼopil-abi, jaʼ te ay bin ya kichʼtik akʼbeyel ta majtanil sok te maba tulan aʼtejotik yuʼun ya kichʼtik akʼbeyel. Te Timoteo la yichʼ akʼbeyel te majtanil ini te kʼalal la yichʼ tsael yuʼun ya spas jun aʼtelil ta kongregasion te mukʼ skʼoplale (1 Tim. 4:14).

 ¿Bin ya skʼan ya spas te Timoteo sok te majtanil-abi? Te kʼalal la skʼopon te kʼopetik: «ya me awacʼ tihluc xan», jaʼniwan tal ta yoʼtan te kʼajkʼ ya yichʼ nupʼel ta yutil na te kʼunkʼun ya xkʼatpʼuj ta akʼal. Ya skʼan ya yakʼbeyxan siʼul swenta ya xtilxan-a. Jun diksionario jich ya yal ta swenta te kʼopil griego (anazōpyréō) te la stuuntes te Pabloe ya skʼan ya yal «schaʼtilesel o yakʼbeyelxan yip». Te bin la skʼan la yal te Pablo sok ini, jaʼ te la yalbey te Timoteo te akʼa yakʼbeyxan yipal ta spasel te aʼtelil, te sokuk sbujtsʼ yoʼtan ya spase. Jich kʼoem te yak ta yalbeyel te Timoteoe: «Pasa sok spisil awoʼtan te awaʼtele». Ta kʼajkʼal ini, jaʼnix jich ya skʼan ya jpastik-euk te joʼotike, jaʼ te ya jpastik tulan te ya x-abatinotik ta stojol Dios sok sbujtsʼ koʼtantik.

Te kʼalal yak ta skʼoponelxan-a te kartae, la sta tʼujbil kʼopetik tey-a te koltayotxan ta spasel ta lek te yaʼtele. Jich albot yuʼun te Pablo: «Ta scuenta te Chʼul Espíritu te nahinem ta coʼtantic, canantaya te bin lec aʼbotate» (2 Tim. 1:14). ¿Bin-a te bin lek akʼbot skanantay te Timoteoe? Te Pablo la yalbey skʼoplal «lequil cʼop» ta yan bersikulo te jaʼ ya skʼan ya yal te smelelil kʼop te ay ta sJun Dios (2 Tim. 1:13). Te bitʼil jaʼ j-abat yuʼun Dios te Timoteoe, ya skʼan ya yakʼ ta nopel te smelelil kʼop ta stojol te ants winiketik soknix ta kongregasion (2 Tim. 4:1-5). Jaʼnix jich la yichʼ akʼbeyel yaʼtel ta ansiano yuʼun ya skanantay te tuminchijetik yuʼun te Diose (1 Ped. 5:2). ¿Bin-utʼil ya xjuʼ ya skanantay te bin lek la yichʼ akʼbeyel te jaʼ te smelelil kʼop te ya yakʼ ta nopele? Jaʼnax ta swenta te koltayel yuʼun te schʼul espiritu te Jehová sok te sKʼope (2 Tim. 3:14-17).

Jaʼnix jich te joʼotike ay bin lek kichʼojtik akʼbeyel, jaʼ te ya kakʼbeytik snop te yantik te smelelil kʼope (Mat. 28:19, 20). Mame xchʼay ta koʼtantik te mukʼ skʼoplal te smelelil kʼop te ya kakʼtik ta nopele. Swenta jich ya kiltik-abi, ya skʼan te spisil-ora ya jkʼopontik te Dios sok te ya jnoptik spisil-ora te sKʼope (Rom. 12:11, 12; 1 Tim. 4:13, 15, 16). Jaʼnix jich ayniwan awichʼoj awaʼtel ta ansiano ta kongregasion o ya x-abatinat ta tiempo kompleto. Te bitʼil kichʼojtik akʼbeyel te bin leke, ya skʼan ya skoltayotik yuʼun pekʼeluk koʼtantik sok te ya smukʼulin koʼtantik te Diose. Ya xjuʼ kuʼuntik skanantayel te bin lek akʼbilotik jaʼnax teme ay skʼoplal ta koʼtantik sok teme ya jkʼanbeytik koltayel te Jehovae.

Ta spisil te aʼtelil yichʼoj akʼbeyel te Timoteoe, tey ochem skʼoplal-euk-a te snojptesel te yantike. Jaʼ yuʼun jich albot yuʼun te Pabloe: «Te bintic awaʼiyej cuʼun [...] ha me xawaʼbe snop winiquetic te jun yoʼtanic, te ya xhuʼ ya yaʼbeyic snop yantic» (2 Tim. 2:2). Te Pablo la sjultesbey ta yoʼtan te Timoteo te ya skʼan ya yakʼbey snop yantik-euk spisil te bintik snopojixe. Jaʼnix jich ta ora ini mukʼ skʼoplal te yakuk spasik tulan te ansianoetik yuʼun ya snojptesik yantik ta kongregasion. Jtul lekil ansiano maba ya skʼej ta yoʼtan te bin-utʼil ta pasel jun aʼtelil. Ya yakʼbey snop te yantik swenta ya snaʼik spasel-euk te aʼtelile. Maba ya xiʼ teme ya yichʼ pejkʼanbeyel skʼoplal ta skaj te jaʼ ya snaʼxan spasel ta lek te aʼtelil te yane. Jaʼ yuʼun maba yanax stsa te bintik ya yakʼbey snop swenta ya spas jun aʼtelil. Jaʼ ya skʼanik te yakuk snaʼik ta lek stsajtayel sbaik sok te ay spʼijil yoʼtanik te machʼatik ya snojptesike. Jichme bayal ya xkoltaywanik ta kongregasion te winiketik ini te jun yoʼtanike.

Ta melel, bayal skʼoplal ta yoʼtan te Timoteo te karta tikunbot yuʼun te Pabloe. Bayalniwan buelta la skʼopon te lekil konsejoetik akʼbot yuʼun te yamigo sok la snopilan ta yoʼtan te bin-utʼil ya spas ta skuxlejal.

Jaʼnix jich te joʼotike ya jkʼan ya jtʼuntik te konsejoetik-abi. ¿Bin-utʼil ya jpastik? Jaʼ te ya jpastik tulan te ya kakʼtik tilukxan te majtanil kichʼojtik akʼbeyele, te ya jkanantaytik te bintik lek akʼbilotik sok te ya kakʼbeytik snop te yantik spisil te bin ya jnaʼtik spasele. Teme jich ya jpastike, yame xjuʼ kuʼuntik sjuʼtesel spisil te aʼtelil akʼbilotik jich bitʼil la yichʼ albeyel te Timoteo yuʼun te Pabloe (2 Tim. 4:5).