МАЕ тӥ шӧдӥськоды, куке матысь эштылэсь мылкыдэз ӝутӥсь гожтэтсэ басьтӥськоды? Тимофей нимо христиан мурт сыӵе гожтэтэз апостол Павеллэсь басьтӥз. Со Библилэн оглюкетэз луиз но туннэ Тимофейлы кыкетӥ гожтэт шуыса тодмо. Павеллэсь гожтэтсэ басьтэм бераз Тимофей шыпыт инты утчаз, дыр, отын дуно эшезлэсь гожтэтсэ лыдӟон понна. Со малпаз, вылды: «Мар гожтӥз мыным Павел? Оло, со вераз, кызьы солэн ужъёсыз мыно? Оло, со сётӥз умой визь-кенеш, кудӥз юрттысал мыным аслэсьтым ужъёсме быдэсъяны? Яке со вераз, кызьы умойгес луоз тодытыны но мукетъёссэ дышетыны?» Тимофей та гожтэтысь аслаз юанъёсызлы валэктонъёс но трос пайдаё малпанъёс шедьтӥз. Ойдолэ куд-огъёссэ эскеромы.

Гожтэтлэн нырысетӥ чуръёсысьтыз ик Тимофей шӧдӥз, Павел сое яратэ шуыса. Со Тимофеез «яратоно пие» шуыса нима (2 Тим. 1:2). Павеллэсь гожтэтсэ Тимофей асьме вакытысь 65-тӥ ар котырын басьтӥз. Соку солы 30 ареслэсь тросгес вал, дыр. Со дырлы христиан кенешын со кема дыр ӵоже тӧро вал. Тимофей Павелэн 10 арлэсь кемагес матысь кусыпъёс возе вал ини. Та дыр куспын со Павеллэсь тросэзлы дышетскиз.

Тимофей туж шумпотӥз, луоз, куке тодӥз, Павел шуг-секытъёс дыръя Инмарлы оскымон кыле шуыса. Павел Римын пытсэтын пукиз. Со виыны судъямын вал (2 Тим. 1:15, 16; 4:6—8). Озьы ке но, солэн кылъёсаз юн мылкыдыз шӧдӥськиз. Со гожтӥз: «Мон... ваньзэ чидасько» (2 Тим. 2:8—13). Павеллэн та кылъёсыз Тимофеез юнматӥзы. Озьы ик соос милемыз но юнмато.

Павел Тимофейлэсь мылкыдзэ ӝутӥз Инмарлэсь сётэм ужзэ туж дунъяны. Со куриз аслэсьтыз эшсэ со бордын улӥсь «Инмарлэсь сётэм ӟечлыксэ ӟырдыт» возьыны (2 Тим. 1:6). Татын Павел ха́рисма грек кылэз кутэ, кудӥз возьматэ «дунтэк, яке огшоры гинэ, басьтэм кузьымез, кудзэ адями мар ке каремез понна яке тыршемез понна  уг басьты». Тимофей басьтӥз та кузьымез, куке сое христиан кенешын нимысьтыз ужез быдэсъян понна бырйизы (1 Тим. 4:14).

Мар кароно вал Тимофейлы та кузьымен? Вераны луоз, Павел Тимофейлы визь-кенеш сётӥз: «Тыныд сётэм ужез сюлэмдэ поныса быдэсъя!» Сое ӵошатыны луоз соин, куке кин ке тылскеме пу тыре, яке сое аратыны выре, со медаз кысы шуыса. Озьы ик Тимофейлы но кулэ вал маке но карыны, ужан-тыршонзэ ӟырдыт мылкыдын азьланьтон понна. Милемлы но озьы ик лэсьтоно — ӟырдыт мылкыдын ужано-тыршоно.

Тани эшшо одӥг визь-кенеш, кудзэ Павел аслаз эшезлы сётӥз: «Асьме пушкын улӥсь Святой Духлэн кужыменыз тыныд оскыса сётэм ӟечлыкез уть» (2 Тим. 1:14). Нош мар Тимофейлы оскемын вал? Азьвыл кылбурын Павел вера «визьмо дышетон» сярысь, Священной Гожтэмъёсысь зэмлык сярысь (2 Тим. 1:13). Христиан мурт луыса Тимофейлы кулэ вал та зэмлыклы кенешысь вын-агайёсты но сузэр-апайёсты дышетыны, со сяна, сое мукетъёслы но тодытыны (2 Тим. 4:1—5). Тимофей озьы ик тӧро луыса ужаз-тыршиз но Иеговалэн ыжъёсыз сярысь сюлмаськиз (1 Пётр 5:2). Утён понна ваньзэ, мар солы оскемын вал (яке зэмлыкез, кудӥзлы со дышетӥз), солы кулэ вал Иеговалэн святой духезлы но солэн Кылызлы оскиськыны (2 Тим. 3:14—17).

Милемлы но зэмлык оскемын. Та зэмлыклы ми мукетъёссэ но дышетӥськомы (Матф. 28:19, 20). Милемлы вунэтоно ӧвӧл, макем со дуно луэ. Нош со понна Иеговалы дугдылытэк вӧсяськоно но солэсь Кылзэ ялан дышетоно (Рим. 12:11, 12; 1 Тим. 4:13, 15, 16). Ми пӧлын вань соос но, кинъёслы кенешын нимысьтыз ужъёс оскемын: кин ке но тӧро луэ, нош кин ке но вань дырзэ сётыса ужа-тырше. Куке ми малпаськомы, кыӵе уж милемлы оскемын, со мылкыдмес ӝутэ зӥбыт-востэм луыны но тодамы возьыны: Иеговатэк та ужез быдэстыны ум быгатэ. Ми оскем ужез дунъямысь медам дугдэ шуыса, ойдолэ котьку но Иегова вылэ оскиськомы!

Тимофейлы кулэ вал мукет агайёсты но дышетыны солы, мае со ачиз тодӥз но лэсьтыны быгатӥз. Соин ик Павел солэсь мылкыдзэ ӝутӥз: «Ваньзэ, мае тон мынам дышетонысьтым кылӥд, оскиськымон адямиослы тодыты, соос мукетъёссэ дышетыны мед быгатозы» (2 Тим. 2:2). Павел Тимофейлы тодаз вайытӥз, макем кулэ басьтэм тодон-валанэз мукет агайёслы но вераны. Туннэ христиан кенешысь котькуд тӧролы та визь-кенешлэсь кылзӥськыны кулэ. Умой тӧро тодон-валанзэ мукетъёслэсь ватыса уз возьы. Со интые, тодэмзэ со мукетъёсызлы но вералоз, соос но оскем ужзэс быгатыса мед быдэсъялозы шуыса. Со уз сюлмаськы, куке кин ке солэсь тросгес тодоз яке ужзэ умойгес быдэсъялоз. Солэн ужпумез — та ужлы мукетъёссэ дышетыны гинэ ӧвӧл, нош юрттыны соослы оскем ужзэс пыр-поч но валаса быдэсъяны, яке юрттыны соослы быдэ вуэм христианъёс луыны. Солы луыса «оскиськымон адямиос» кенешын тросгес лэсьтыны быгатозы.

Вераны луоз, Тимофей туж дунъяз Павеллэсь шуныт кылъёссэ. Со одӥг пол гинэ ӧз лыдӟы, дыр, эшезлэсь дуно визь-кенешъёссэ но малпаськиз, кызьы умойгес луоз соосты уже кутыны.

Милям но потэ та гожтэтысь кылъёслэсь кылзӥськеммы. Ми тыршомы милемлы сётэм ужез сюлэммес поныса быдэсъяны, утьыны сое, мар милемлы оскемын, но мукетъёссэ дышетыны ваньмызлы, мае ми тодӥськомы но быгатӥськомы. Озьы ми Павеллэсь визь-кенешсэ уже кутомы, кудзэ со Тимофейлы сётӥз: «Оскем ужез тыршыса быдэсъя» (2 Тим. 4:5).