COME che te te senti quando te ricevi una carta de un amigo che te ami tanto? El dissìpolo Timòteo el ga ricevesto una carta del apòstolo Paolo. Questa carta la ze el libro bìblico de 2 Timòteo. Sicuro che quando Timòteo la ga ricevesto, lu l’era premoso de léderla. Fursi el gàpie pensà: ‘Sarà che l’è tuto a posto con Paolo? Sarà che el me ga dato qualche consìlio par far meio el me laoro a Geovà? Sarà che la ndarà giutarme a predicar e a insegnar meio?’ Noantri vederemo che, in questa carta, ghen’è le risposte a queste domande e la ndarà parlar sora tante altre robe importante. Vedemo adesso arquanti consili che la ne dà.

Timòteo el ga ricevesto la carta de Paolo quando el gavea de pi de 30 ani e l’era intorno del ano 65. Timòteo l’era gióveno, ma l’era belche un ansiano speriente parché el gavea laorà con Paolo par de pi de 10 ani. Quando Timòteo el ga scominsià a leder la carta, lu l’era sicuro che Paolo lo amea tanto parché Paolo el ga scrito che lu l’era un “fiol amà”. — 2 Tim. 1:2.

Paolo l’era preso in Roma e suito el saria morto. (2 Tim. 1:15, 16; 4:6-8) Nela so carta, el ga scrito che lu l’era drio infrontar tute le brute robe. Sicuro che Timòteo el ga bio pi coraio dopo che el ga savesto de questo. (2 Tim. 2:8-13) Cossita come Timòteo, anca noantri semo incoraiadi par el bel esémpio de Paolo.

Paolo el ga dito par Timòteo seitar a dar valor ala designassion che el gavea ricevesto de Geovà. Paolo anca el ga dito che Timòteo el gavea ricevesto un ‘don’ e che lu el gavea de ‘assarlo vivo, come che se fusse un fogo’. (2 Tim. 1:6) La parola greca che Paolo el ga doperà qua par “don” la ze khárisma. Questa parola la vol dir una abilità che se riceve, ma che no se mèrita. Timòteo el ga ricevesto questa abilità quando che lu l’è stato designà par un laoro spessial nela congregassion. — 1 Tim. 4:14.

 Cossa che Timòteo el gavea de far con questo don o abilità? Quando el ga ledesto la spression ‘assar pi vivo come a un fogo’, fursi l’è vegnesto nela so testa el fogo che dopo el deventa bronse. Ma ghe tochea far qualcossa par mantégnerle vive e che le fesse ancora de pi caldo. Un dissionàrio el parla che, el verbo greco che Paolo el ga doperà anazopyréo, el vol dir “impissar nantra volta, far pi forte e far le fiame restar pi grande”, o sia, “esser premoso par far un laoro”. Alora, Paolo el ga incoraià Timòteo a far el meio che el podea nela so designassion. Ancoi, anca noantri ghemo de far el nostro meio nel laoro a Geovà.

Paolo el ga dato nantro bel consìlio nela so carta a Timòteo. Paolo el ga scrito: “Col aiuto del spìrito santo che ghen’è in noantri, te ghè de proteger el ben pressioso che l’è stato dato a ti.” (2 Tim. 1:14) Cossa che Timòteo el ga ricevesto? Nel versìcolo vanti, Paolo el ga parlà sora “parole sane”, che vol dir la verità dela Bìblia. (2 Tim. 1:13) Alora, Timòteo el gavea de insegnar la verità nela congregassion e anca par le altre persone. (2 Tim. 4:1-5) Timòteo el ga bio anca la responsabilità de tender dele piégore de Dio. (1 Pie. 5:2) Se Timòteo el seitesse a fidarse nel spìrito santo e nela Parola de Dio, el saria bon de proteger la verità che el gavea de insegnar ai altri. — 2 Tim. 3:14-17.

Anca noantri ghemo el privilègio de parlar de Geovà ai altri. (Mat. 28:19, 20) Se noantri seitemo far orassion e leder la Bìblia, saremo boni de sempre dar valor a questo privilègio. (Rom. 12:11, 12; 1 Tim. 4:13, 15, 16) Fursi noantri podemo far de pi par Geovà par meso del laoro de pioniero o esser un ansiano. Ma noantri ghemo de esser ùmili e ricordarse che, sol col aiuto de Geovà, saremo boni de far qualcossa. Noantri ndaremo proteger el privilègio che ghemo de parlar de Geovà ai altri se ghe demo valor a questo privilègio e se se fidemo in Geovà par ténderlo.

Paolo anca el ga dito a Timòteo: “Insegna questi òmini fedeli quel che te ghè scoltà de mi e che tante testimònie le ga confirmà, cossita anca lori i sarà pareciadi par insegnar ai altri.” (2 Tim. 2:2) Alora, Timòteo el gavea de insegnar anca i altri a far el laoro che lu el fea. I ansiani ancoi i ga de far sforso par far el medèsimo nele congregassion. Un bon ansiano el resta contento quando i altri i ze boni de far el medèsimo laoro che lu e no’l mete via quel che lu el sa par lu, ma el vol giutar ai altri. Lu no’l resta disgustà se i altri i sa de pi che lu o se i sa far un laoro meio che lu. Un bon ansiano el fà sforso par insegnar ai altri tuto quel che lu el sa. Par esémpio, el giuta i altri a gaver bele qualità. Cossita, queste persone le pol giutar anca ai altri nela congregassion.

Noantri semo boni de imaginar Timòteo drio leder la carta che el gavea ricevesto de Paolo una volta drio man. Sicuro che lu l’è restà tanto contento cola carta de Paolo e el ga pensà tanto in come meter in pràtica quele parole!

Noantri anca volemo far quel che Paolo el ga dito. Come? Ghemo de far el nostro meio nel laoro a Geovà, ghemo de proteger la verità che lu el ne ga dato e parlar ai altri sora ela. Cossita, saremo boni de far quel che Paolo el ga dito a Timòteo: “Fà ben el to ministero.” — 2 Tim. 4:5.