MUNOONELA sai vaavo munaakhela anyu ekarta yoolipiha ya mpatthani anyu? Mwiixutti muKristau Timootheyo, aahaakhela ewarakha aalepeliwe awe ni murummwa Paulo yeeyo ninsuwela ahu okhala ewarakha ya 2 Timootheyo. Moohaanyiherya Timootheyo aahiimananiha ophwanya opuro woomaaleleya wira osome ewarakha ele aalepeliwe awe ni mpatthani awe. Woonasa wene Timootheyo anuupuwela so: ‘Kiireke Paulo mukumi? Miruku xeeni oniphavela awe okivaha voohimya sa moota woovara yoothanleliwa aka? Kiireke ewarakha ela enookikhaliherya okhumela saana muteko aka woolaleerya ni waakhaliherya atthu akina?’ Ntoko ninrowa ahu woona, Timootheyo aahiphwanya waakhuliwa wa makoho awo ewarakha ele ya faita aalepeliwe awe. Masi vano nrowe nthokorerye iponto vakhaani soovareleya muteko nimphwanya ahu ewarakha ele.

Vaavo Timootheyo aasoma awe moolumo oopacerya a ewarakha ele ahoona moowaakuveya wira aahikhalana waataana wooloka ni Paulo. Nto Paulo aahimuhimya Timootheyo okhala “mwan’aka omphentexaka”. (2 Tim. 1:2) Timootheyo aakhenle ewarakha ele ya Paulo mwaakha wa 65, nuumala Kristu orwa. Woonasa wene Timootheyo aarina iyaakha 30 ni aari mutokweene aarina sookumanana sinceene. Nave Timootheyo aahiviriha iyaakha saavikana 10 ovaraka vamosa ni Paulo, nto owo ahiixutta itthu sinceene.

Moohaanyiherya, Timootheyo aahilipa vanceene osuwela wira Paulo aanivilela mixankiho moororomeleya. Paulo aatthukweliwe oRoma, nto moohipisa aarowa wiiviwa. (2 Tim. 1:15, 16; 4:6-8) Moohaanyiherya Timootheyo, anoona olipa murima wa Paulo vaavo ahimmye awe so: “Kinnihawa itthu iya sothene”. (2 Tim. 2:8-13) Nimutakihaka Timootheyo, ovilela wa Paulo onoowerya onilipiha hiyo olelo-va.

Paulo aahimutumererya Timootheyo ovaha efaita muteko aarina awe mmutthenkesoni mwa Muluku. Owo aaphavela wira Timootheyo ‘olipiheke eparakha avahiwe awe ni Muluku’. (2 Tim. 1:6) Paulo aahirumeela nuulumo na eKriki noowi khaʹri·sma voohimya sa “eparakha”. Nuulumo nna na eKriki, nintaphulela ovahiwa eparakha mutthu ahaaphwanelela ovahiwa eparakha eyo. Nto Timootheyo aahivahiwa eparakha vaavo aathanliwe awe wira ovareke muteko wa vameekhaaya waavarihana ni muloko.—1 Tim. 4:14.

 Timootheyo iirinhe exeeni eparakha ele aavahiwe awe? Ntoko nisomme ahu, nuulumo noowi “mulipihe” wala mmpattihe mooro, aahimya mooro atthu ampattiha aya owannyeya okathi mukina yoowo onipakeya makhala ooviha. Nto makhala awo ahaana otetheereriwa wira akumiheryeke mooro ni oviha. Disionaario mmosa ohimmye wira nuulumo na eKriki noowi: (a·na·zo·py·reʹo) Paulo orumeelale awe nintaphulela “otthikela opattiha, otetheerela wira mooro ohitttiphe”. Eyo yaathonyerya wira owo “aahaana wiimananiha oluttuweliwa ovara muteko awe”. Moohaanyiherya Paulo aamutumererya Timootheyo wira ‘aahaana wiimananiha ovara oratteene muteko awe!’ Pooti wira nyuwo munnisuwela wira olelo-va nihaana opaka etthu emosaru Timootheyo aapanke awe, eyo piiyo, nihaana oluttuweliwa ovara muteko wa Muluku.

Vaavo aavikaniha awe osoma ewarakha ele aalepeliwe awe ni mpatthani awe, Timootheyo aahiphwanya nuulumo nikina naarowa omukhaliherya okhumela saana muteko awe woolaleerya. Paulo aamulepenle so Timootheyo: “Musukeke maxuttiho èkekhai n’ikuru s’eroho yowarya enkhala mwa hiyo”. (2 Tim. 1:14) Etthu xeeni ela yeekeekhai? Niire so, etthu xeeni Timootheyo aaroromeliwe awe? Eversiikulu ehinatthi eversiikulu 14 Paulo onnilavula sa “molumo èkekhai” yaawo yaari Soolempwa. (2 Tim. 1:13) Okhala wira aari muKristau, Timootheyo aahaana olaleya ekeekhai okhale mmulokoni wala atthu akina. (2 Tim. 4:1-5) Nave Timootheyo aahithanliwa wira okhale mutokweene maana owo ahaana okukhula ipwittipwitthi sa Muluku. (1 Ped. 5:2) Nto Timootheyo aahaana osuka ele aaroromeliwe awe, niire so ekeekhai ni owiixuttiha atthu akina ekeekhai eyo. Ororomelaka okhaliheriwa ni munepa woowaarya wa Yehova ni Nuulumo nawe.—2 Tim. 3:14-17.

Nave olelo-va, hiyo noororomeliwa ekeekhai wira niwiixuttiheke atthu akina (Math. 28:19, 20) Nnoowerya wooniherya wira ninnixukhurela eparakha ela nivahiwe ahu niimananihaka ovekela ni wiimananiha omusoma Biibiliya khula nihiku. (aRom. 12:11, 12; 1 Tim. 4:13, 15, 16) Nave pooti wira hiyo noovahiwa iparakha sikina mmulokoni, nnarumeela ntoko mutokweene aahiiso ovara muteko wa Muluku wa okathi wotheene. Akhala wira noovahiwa iparakha ntoko iyo nihaana okhala atthu oowiiyeviha ni omuroromela Muluku ni murima wotheene wira onoonikhaliherya. Nto nnoowerya osuka eparakha nivahiwe ahu nimuroromelaka Yehova wira onoonikhaliherya okhapelela wala ovara saana eparakha eyo.

Iparakha Timootheyo aavahiwe awe saahela muhina owiixuttiha atthu akina wira avareke etthu emosaru Timootheyo aavara awe. Tivonto Paulo aamutumerenrye awe Timootheyo wira: “Ikekhai sikìwalyanyu . . . , mwalèle atthu òroromeleya, wira yala esuweleke owixuttiha-tho atthu akina”. (2 Tim. 2:2) Tthiri Paulo aahimuupuxerya Timootheyo wira itthu aamwiixuttinhe awe aahaana owiixuttiha anna akina. Nto axitokweene otheene mmulokoni olelo-va, ahaana wiimananiha owiixuttiha atthu akina mmulokoni. Mutokweene ooreera murima ni ooloka, owo khoniimananiha ovitha itthu sinisuwela awe, ohiya-vo owo onniimananiha owiixuttiha atthu akina wira atthu awo nave aweryeke ovara etthu onivara awe. Nave khonoovelela uupuwelaka wira atthu awo anoosuwelaka itthu sinceene onvikana yena. Tthiri mutokweene owo khoniwiixuttiha itthu saamukhaani paahi sa moota onivariwa aya muteko owo, masi ohaana owiixuttiha itthu sotheene sa moota woovara muteko owo. Maana mutokweene owo oniphavela omukhaliherya ole onimwiixuttiha awe okhalana ankhili ni osuwela wira innuweke momunepani. Mwa enamuna eyo, awo annikhala “atthu òroromeleya” maana itthu yiixuttihiwa aya sinimwaakhaliherya ovara itthu sinceene mmulokoni.

Moohaanyiherya, Timootheyo aanivaha efaita yinceene ewarakha ele aavahiwe awe ni Paulo. Ninnikupali wira aamakela osoma miruku aavahiwe awe ni anuupuwelela moota woovarihela muteko wira ovareke saana yoothanleliwa awe.

Hiyo nave nihaana ovarihela muteko miruku siniphwanyaneya ewarakha ele. Moota xeeni? Niluttuweliwaka vanceene ovara muteko niroromeliwe ahu ni owiixuttiha atthu akina itthu ninsuwela ahu. Niira siiso, ntoko Paulo aamulenle awe Timootheyo nnoowerya onvarela “Muluku muteko womalela”.—2 Tim. 4:5.