SIIQIYO laggee neeyyo minttettiya dabddaabbiyaa kiittiyo wode neessi aybi siyettii? Kiristtaane erissiyo ashkkaray Ximootiyoosi kiitettida PHawuloosappe hegaa mala dabddaabbiyaa ekkiis. He dabddaabbee ha wodiyan Geeshsha Maxaafaa shaaho gidida 2 Ximootiyoosa. Ximootiyoosi I keehi dosiyo laggee ayyo odanawu koyidobaa nabbabanawu woppu giida sohuwa koyidoogee sirissenna. Ximootiyoosi geella hagaadan qoppennan aggenna: ‘PHawuloosi waani deˈiishshaa? Ta oosuwawu maaddiyaabaa I tana zoriyoobi deˈaneeshshaa? Kaseegaappe aaruwan sabbakanawu, tamaarissanawunne harata maaddanawu A zoree tana goˈˈaneeshshaa?’ Nuuni kaallidi beˈanaagaadan, Ximootiyoosi ha maaddiya dabddaabbiyaappe he oyshatu zaaruwaanne hara darobaa demmiis. SHin haˈˈi, ha dabddaabbiyan deˈiya maaddiya zoriyaappe amarida ayfe yohota ane beˈoos.

Ximootiyoosi he dabddaabbiyawu doometta heeraa nabbabiyo wode PHawuloosi ayyo qoppiyoogaa sohuwaara akeekana danddayees. PHawuloosi A, “ta siiqo na7aa” giidi xeesiis. (2 Xim. 1:2) Ximootiyoosi 65 M.L. heeran ha dabddaabbiyaa ekkiyo wode ayyo layttay 30⁠ppe darennan waayi aggana; qassi I meezee deˈiyo Kiristtaane gubaaˈe cima. I PHawuloosaara issippe 10⁠ppe dariya layttawu oottiis, qassi appe darobaa tamaariis.

PHawuloosi ammanettidi metuwaa gencciiddi deˈiyoogaa eriyoogee Ximootiyoosa keehi minttettennan aggenna. PHawuloosi Roomen qasho keettan deˈees, qassi I mata wode hayqqana. (2 Xim. 1:15, 16; 4:6-8) PHawuloosi “Taani ubbaban” genccaas giido gishshawu Ximootiyoosi A xalatettaa akeekana danddayees. (2 Xim. 2:8-13) Ximootiyoosaagaadan, PHawuloosa genccay nuna minttettana danddayees.

Ximootiyoosi baassi Xoossaa haggaazuwan imettida oosuwaa alˈˈobadan xeellanaadan PHawuloosi zoriis. Ximootiyoosi “Xoossay immido imotaa tamaadan pereggana mala” PHawuloosi koyiis. (2 Xim. 1:6, NW) PHawuloosi “imuwaa” giyo qaalawu kharisma giyo Giriiketto qaalaa goˈettiis. He Giriiketto qaalay issi uraassi bessennabaa coo immiyoogaa qonccissees. Ximootiyoosi gubaaˈiyan dumma hanotan haggaazanaadan doorettido wode hegaa mala imotaa ekkiis.—1 Xim. 4:14.

 Ximootiyoosi he imotan ay oottanaadan PHawuloosi minttettidee? I ‘tamaadan peregga,’ giya qonccissuwaa nabbabiyo wode, sooni issitoo issitoo coo boojiya xiifa xalaala gidida tamaa hassayennan aggenna. He xiifay lacottanaadaaninne keehi eexxanaadan pereggana koshshees. Issi qaalaa kochchay ha sohuwan PHawuloosi goˈettido (anazopyreˈo) giyo Giriiketto peeshoy “zaaretti denttettiyoogaa, ooraxissiyoogaa, lacuwawu laammiyoogaa” giyoogaa gidiyo gishshawu, “issi oosuwawu wozanappe denddiyoogaanne mishettiyoogaa bessees” yaagees. Hegaa gishshawu, PHawuloosi Ximootiyoosa, ‘Ne oosuwaa minnada ootta’ giidi zoriis giyoogaa mala. Ha wodiyan nuunikka, hegaadan nu oosuwaa minnidi oottana koshshees.

PHawuloosi ba dabddaabbiyan Ximootiyoosi ba haggaazuwaa loytti polanawu maaddiya harabaa yootiis. PHawuloosi, “Nu giddon de7iya [g]eeshsha [a]yyaanaa baggaara neeyyo hadaraa immido lo77obaa naaga” yaagiis. (2 Xim. 1:14) He hadaray aybee? Ximootiyoosayyo imettida alˈˈobay aybee? Hagaappe kasetiya payduwan, PHawuloosi “tumu qaalaa,” hegeekka Geeshsha Maxaafan deˈiya tumaabaa qonccissiis. (2 Xim. 1:13) Ximootiyoosi Kiristtaane gidiyo gishshawu, gubaaˈiyan deˈiya ishanttanne michchontta, qassi ba haggaazo moottan deˈiya asaa tumaa tamaarissana koshshees. (2 Xim. 4: 1-5) Qassi, Ximootiyoosi Xoossaa dorssaa wudiyaa heemmanawu sunttettida cima. (1 PHe. 5:2) Ximootiyoosi Yihoowa geeshsha ayyaanaaninne A Qaalan ammanettidi bawu imettida alˈˈobaa, hegeekka I tamaarissana bessiyo tumaa naagana danddayees.—2 Xim. 3:14-17.

Ha wodiyan nuussikka, harata tumaa tamaarissiyo hadaray imettiis. (Maa. 28:19, 20) Ha nuuni tamaarissiyo tumay keehi alˈˈoba gidiyoogaa mule dogana bessenna; hegaa gishshawu, nuuni woosan genccananne Xoossaa Qaalaa ubbatoo xannaˈana koshshees. (Roo. 12:11, 12; 1 Xim. 4:13, 15, 16) Hegaa bollikka, gubaaˈe cima woy ubba wode haggaaziyaagaa gididi oottiyo gujo aawatettay nuussi deˈana danddayees. Hegaa mala alˈˈo aawatettay nuna ziqqi oottiyaageetanne maaduwawu Xoossan ammanettiyaageeta gidanaadan oottana koshshees. Yaaniyo gishshawu, nuuni nu hadaraa nashshiyoogaaninne hegaa naaganawu Yihoowa maaduwan ammanettiyoogan nu hadaraa naagana danddayoos.

Ximootiyoosayyo imettida oosuwaappe issoy I oottiiddi deˈiyo oosuwaa haratikka oottanaadan loohissiyoogaa. PHawuloosi, “Taappe neeni siyido yohota haraata tamaarissanawu danddayiya ammanettida asatuyyo hadaraa imma” giidi Ximootiyoosa zoridoy hegaassa. (2 Xim. 2:2) Ximootiyoosi tamaaridobaa ubbaa hara ishantta tamaarissanaadan PHawuloosi hassayissiis. Ha wodiyan Kiristtaane gubaaˈiyan aawatettay deˈiyo ubbay hegaadan oottanawu baaxetiyoogee keehi koshshiyaaba. Aawatettay deˈiyo loˈˈo uri issi oosuwaa xeelliyaagan bawu deˈiya eraa qosenna. I haratikka he oosuwaa oottanaadan tamaarissees. I eti baappe aaruwaa eroosona woykko he oosuwaa baagaappe loyttidi oottoosona giidi yayyenna. Hegaa gishshawu, aawatettay deˈiyo issi uri issibaa oottiyo amarida ogiyaa xalaalaa tamaarissenna. I loohissiyoogeeti kayma Kiristtaane gididi yuushshi qoppiyaageetanne akeekanchchata gidanaadan maaddanawu koyees. Hegaa mala hanotan, I tamaarissido “ammanettida asati” gubaaˈiyan aagaappekka aaruwaa maaddana danddayoosona.

PHawuloosappe ekkido minttettiya dabddaabbiyaa Ximootiyoosi nashshidoogee qoncce. Nuuni I he maaddiya zoriya zaari zaaridi nabbabidoogaanne ba oosuwaara gayttidaagan he zoriya waati oosuwan peeshshanaakko qoppidoogaa akeekana danddayoos.

Nuunikka ha zoriya oosuwan peeshshanawu koyoos. Waatidi? Nuuni nu imotaa tamaadan peregganawu, nu hadaraa naaganawunne nu eriyo ubbabaa harata tamaarissanawu baaxetana danddayoos. Yaatiyoogan, PHawuloosi Ximootiyoosa akeekissidoogaadan nu “oottiyo ooso ubbaa” polana danddayoos.—2 Xim. 4:5.