Ke Ke Faʼafai ʼi Te Gaue ʼAe ʼe Foaki Atu!
KOTEA ʼae ʼe ke logoʼi moka ke maʼu he tohi mai hou kaumeʼa ʼe ke ʼofa ai? Neʼe maʼu e te tisipulo ko Timoteo he tohi fakalotomalohi mai te apositolo ko Paulo. ʼE kau te tohi ʼaia ʼi te Tohi-Tapu, pea ʼe ko te tohi ʼo 2 Timoteo. ʼE mahino ia, neʼe fia maʼu fakavilivili e Timoteo he koga meʼa ke ina lau ai te tohi ʼaia mai tona kaumeʼa. Neʼe lagi feʼekeʼaki fenei ia Timoteo: “ ʼE feafeaʼi siʼi Paulo? ʼE ina foaki mai koa he ʼu tokoni ke au fakahoko lelei taku gaue? ʼE ina fakaha mai koa pe ʼe feafeaʼi haku hikihiki taku faifakamafola pea ke lelei age taku tokoni ki ʼihi?” ʼE tou vakaʼi anai ʼi te alatike ʼaeni, neʼe maʼu e Timoteo te ʼu tali ki ʼana fehuʼi ʼaia, pea neʼe lahi te tahi ʼu meʼa maʼuhiga neʼe ina ako. Tou vakaʼi he ʼu tokoni ʼe tuʼu ʼi te tohi ʼaia.
“ ʼE AU ʼUTAKIʼI TE ʼU MEʼA FULI”
ʼI te kamata lau e Timoteo te tohi ʼaia mai ia Paulo, neʼe ina logoʼi atu aipe te ʼofa ʼo Paulo ia ia. ʼE moʼoni, he ʼe ʼi tana tohi ʼaia kia Timoteo, ʼe ui fenei e Paulo ʼo ʼuhiga mo ia ko “taku fanau ʼofaina.” (2 Tim. 1:2) Neʼe maʼu e Timoteo te tohi ʼaia ʼi te teitei taʼu 65 H.T.S. Neʼe lagi taʼu 30 tupu ia Timoteo pea neʼe kua ina iloʼi lelei te gaue ʼa he tagata ʼafeā. Neʼe gaue fakatahi mo Paulo lolotoga taʼu ʼe hogofulu tupu, pea neʼe lahi te ʼu meʼa neʼe ina ako mai ia ia.
ʼI te iloʼi e Timoteo ʼe kei haga ʼutakiʼi agatonu pe e Paulo ʼona mamahi, neʼe lagi lotomalohi ai. Neʼe pilisoniʼi ia Paulo ʼi Loma, pea neʼe ina iloʼi kua ovi mai pe te temi ʼae ka matehi ia ia. (2 Tim. 1:15, 16; 4:6-8) Kae neʼe ina ui fenei: “ ʼE au ʼutakiʼi te ʼu meʼa fuli.” (2 Tim. 2:8-13) Neʼe iloʼi ai e Timoteo neʼe kei lototoʼa pe tona kaumeʼa. ʼE feala ke tou maʼu mo tatou te lotomalohi ʼae neʼe maʼu e Timoteo mai te faʼa kataki ʼa Paulo.
KE KE “FAKAʼAOGAʼI TE MEʼA ʼOFA . . . ʼAKI HE FAʼAFAI OHAGE KO HAU FAKAULO HE AFI”
Neʼe fakalotomalohiʼi e Paulo ia Timoteo ke ina fakamaʼuhigaʼi tana gaue ki te ʼAtua. Neʼe loto e Paulo ke fakaʼaogaʼi e Timoteo “te meʼa ʼofa ʼo te ʼAtua” ʼae neʼe foaki age, ‘ohage ko hana fakaulo he afi.’ (2 Tim. 1:6) ʼE ko te kupu Fakakeleka (kharisma) ʼae neʼe fakaliliu ʼaki te kupu “meʼa ʼofa.” ʼE fakaʼuhiga ki he meʼa ʼofa ʼe foaki noa ki he tahi, pea ʼe feala pe ke ui ʼe mole tuha mo ia. Neʼe foaki kia Timoteo te meʼa ʼofa ʼaia, ʼi te temi ʼae neʼe filifili ai ia ia ki he gaue makehe ʼi te kokelekasio.—1 Tim. 4:14.
ʼE feafeaʼi ʼape he fakaʼaogaʼi e Timoteo te meʼa ʼofa ʼaia? ʼI te palalau ʼa Paulo ki te “fakaulo ʼo he afi,” neʼe lagi manatu ai ia Timoteo ki te ʼu afi ʼae neʼe tafu ʼi te ʼu loto fale, pea neʼe feala pe ia ke liliu ko he ʼu mamala. Kae ʼaki te ʼu mamala ʼaia, neʼe feala ke toe fakakohu te afi. ʼE fakamahino ʼi te tikisionalio, ko te kupu Fakakeleka (anazopyreo) ʼae neʼe fakaʼaogaʼi e Paulo, ko tona fakaʼuhiga ke fakaulo, peʼe fakahokohoko, peʼe fakamu he afi. Pea ʼi tona ʼuhiga fakata, ʼe fakaʼuhiga ki he tahi ʼe ina fakahoko tana gaue ʼaki te fiafia mo te faʼafai. Koia, neʼe tokoniʼi e Paulo ia Timoteo ke faʼafai ʼi tana fakahoko te ʼu gaue ʼae neʼe foaki age. ʼE toe fai mai kia tatou te tokoni ʼaia. ʼE tonu ke tou faʼafai ʼi tatatou tauhi ki te ʼAtua.
‘KE KE TAUPAU TE MEʼA MAʼUHIGA ʼAIA’
ʼI te tohi pe ʼaia, neʼe toe tokoni ia Paulo kia Timoteo ke fua lelei tona minisitelio. Neʼe tohi fenei e Paulo: “Ke ke taupau ʼaki te tokoni ʼa te laumalie maʼoniʼoni ʼae ʼe nofo ia tatou, te meʼa maʼuhiga ʼae neʼe foaki atu.” (2 Tim. 1:14) Neʼe kotea te meʼa maʼuhiga ʼae neʼe foaki kia Timoteo? ʼI te vaega ki muʼa atu, neʼe talanoa ia Paulo ki “te ʼu folafola ʼae ʼe lelei” peʼe ko te ʼu moʼoni ʼae neʼe maʼu ʼi te ʼu Tohi Taputapu. (2 Tim. 1:13) Neʼe ʼi ai te ʼu maʼua neʼe tonu ke fakahoko e Timoteo ʼi te kokelekasio. Ohage la, neʼe tonu ke ina akoʼi te moʼoni ki te ʼu tehina mo tuagaʼane pea mo te hahaʼi ʼae neʼe faifakamafola ki ai. (2 Tim. 4:1-5) Pea neʼe toe tagata ʼafeā foki, koia neʼe tonu ai ke tokaga lelei ki te faga ovi ʼa te ʼAtua. (1 Pet. 5:2) Neʼe feala ke taupau e Timoteo te meʼa maʼuhiga ʼae neʼe foaki age, ia te moʼoni ʼae neʼe tonu ke ina akoʼi ki ʼihi, ʼaki tana falala ki te laumalie maʼoniʼoni ʼa Sehova pea mo fakaʼaogaʼi Tana Folafola.—2 Tim. 3:14-17.
Neʼe toe foaki mai kia tatou he meʼa maʼuhiga, ia te ʼu moʼoni ʼo te Tohi-Tapu, ʼae ʼe tou fakaha ki te hahaʼi ʼi tatatou faifakamafola. (Mat. 28:19, 20) ʼE tou leleiʼia tuʼumaʼu pe anai te meʼa maʼuhiga ʼaia, mo kapau ʼe tou faikole pea mo ako tuʼumaʼu te Folafola ʼa te ʼAtua. (Loma 12:11, 12; 1 Tim. 4:13, 15, 16) Pea ʼe lagi tou tagata ʼafeā peʼe tou kau ʼi te ʼu tehina mo tuagaʼane ʼae ʼe natou ʼi te selevisi makehe temi katoa. Kapau ko ia, ʼe tonu ai ke tou agavaivai heʼe tou maʼu te meʼa maʼuhiga ʼaia, pea ke tou falala katoa ki te ʼAtua. Koia, kapau ʼe tou leleiʼia te meʼa maʼuhiga ʼaia, pea mo tou kumi te tokoni ʼa Sehova moʼo fakahoko ʼatatou maʼua, ʼe tou taupau peʼe puipui anai te meʼa maʼuhiga ʼaia.
“KE KE AKOʼI TE ʼU MEʼA ʼAIA KI HE ʼU TAGATA AGATONU”
Neʼe toe maʼua foki kia Timoteo ke ina akoʼi te tahi ʼu tagata ke natou fai te gaue ʼae neʼe ina fai. Koia ʼae neʼe tohi fenei ai e Paulo: “Ko te ʼu meʼa ʼae neʼe ke logo ki ai mai ia au . . . ke ke akoʼi te ʼu meʼa ʼaia ki he ʼu tagata agatonu, ke natou liliu mo natou ʼo popoto ʼi te akoʼi ʼo te ʼu meʼa ʼaia ki ʼihi age.” (2 Tim. 2:2) Neʼe tonu ai kia Timoteo ke ina ako mai ʼona tehina, pea ke ina toe akoʼi age kia natou te ʼu meʼa ʼae neʼe ina iloʼi. Pea ʼe ko te faʼahi ʼaia ʼe faiga e te ʼu tagata ʼafeā ke natou fai ia ʼaho nei. ʼE mole fufu anai e he tagata ʼafeā he ʼu manatu ʼe ʼaoga anai ki te ʼu tehina moʼo fakahoko he gaue. Kae ʼe ina fakamahino lelei age te gaue, ke natou popoto ʼi tona fakahoko. ʼE mole tuʼania ia naʼa lelei age tanatou fai te gaue ia ia. ʼE mole ina fakaha age pe te faʼahiga fai ʼo te gaue, kae ʼe ina toe akoʼi natou ke natou maʼu te fakasiosio poto. ʼEi, ʼe tokoni anai kia natou ke natou liliu ko he kau Kilisitiano kua fotufotuʼa ʼi te faʼahi fakalaumalie. ʼE feala anai ki “te ʼu tagata agatonu” ʼaia ʼae neʼe ina akoʼi ke lahi age tanatou tokoni ki te kokelekasio.
ʼE mahino ia neʼe maʼuhiga ʼaupito kia Timoteo te tohi ʼaia mai tona kaumeʼa ko Paulo. ʼE hage pe ʼe tou sio kia Timoteo, ʼe ina lau liuliuga te tohi ʼaia pea mo fakakaukauʼi pe ʼe feafeaʼi hana maʼuliʼi te ʼu tokoni ʼae ʼe tuʼu ai.
ʼE tou fia maʼuliʼi mo tatou te ʼu tokoni ʼaia. ʼO feafeaʼi? Tou fakaʼaogaʼi te meʼa ʼofa ʼo te ʼAtua ʼae neʼe foaki mai, ohage ko hatatou fakaulo he afi, mo tou taupau maʼu te meʼa maʼuhiga ʼae neʼe foaki mai, pea mo tou akoʼi ki ʼihi te ʼu meʼa fuli ʼae ʼe tou iloʼi moʼo fakahoko he gaue. Kapau ʼe tou fai feia, ʼe tou “fakahoko katoa [ai tatatou] minisitelio” ohage ko tona fakalotomalohiʼi e Paulo ia Timoteo.—2 Tim. 4:5.