BUIDI wumbelanga boti bama kufila nganda kuidi nkundi’aku wu luzolo? Timoteo mvandi wutambula nkanda wu phila ayoyi kuidi mvuala Polo. Ayi nkanda beni widi wuzabakana bubu mu Kibibila, 2 Timoteo. Bo katambula nkanda beni, Timoteo wuba beni phuila yi kuba va kibuangu va khambulu lusuku muingi kutanga mambu nkundi’andi kansonikina mu nkanda beni. Ḿba Timoteo wuyindula: ‘Buidi Polo kadidi? Nandi bemfila malongi mankuiza kuntsadisa mu kiyeku kiama? Nkanda awuwu, wunkuiza kuntsadisa kubaka ndandu mu kisalu ki kusamuna ayi kusadisa bankaka?’ Dedi bo tuemmuena, Timoteo wubakula mimvutu mi biuvu abiobio ayi minkaka mu nkanda beni katambula. Vayi tuentsikika mayindu mitu mu mua malongi madi mu nkanda beni tulenda bakila ndandu.

Bo Timoteo katona kutanga bikuma bitheti biba mu nkanda beni, nandi wuyiza visa ti mvuala Polo wukunzolanga beni. Mu luzolo, mvuala Polo wutuba ti Timoteo wuba ‘muana wu luzolo.’ (2 Tim. 1:2) Timoteo wutambula nkanda awowo mu mvu 65 T.K. ayi ḿba bo kaba nduka 30 di mimvu. Kheti wuba ditoko, Timoteo wuba nkulutu wu kimvuka wunyozuka mu kiphevi. Nandi wulonguka beni bo kasala na mvuala Polo mu kisalu ki minsioni kuvioka 10 di mimvu.

Kuzaba ti mvuala Polo waba kindama mu zithotolo zioso kaba viokila, kukindisa beni Timoteo. Polo wuba wukangama mu buloko ayi mua thangu to yiba khambu muingi bamvonda. ((2 Tim. 1:15, 16; 4:6-8) Bo mvuala Polo katuba: ‘Yikhidi tatamana kukindama mu mambu moso,’ mamonisa Timoteo ti Polo wuba kibakala. (2 Tim. 2:8-13) Dedi Timoteo, befu mvitu tulenda baka khindusulu mu lukuikumunu lu mvuala Polo.

Mvuala Polo wukindisa Timoteo muingi kavana luvalu kiyeku kadi mu kisalu ki Nzambi. Nandi wukamba Timoteo: ‘Buela lemisa nkhayilu Nzambi kaku vana’. (2 Tim. 1:6) Kikuma Polo kasadila bansekudila “nkhayilu” kidi khaʹri·sma. Kikuma akiokio ki Kiebeleo kintubila matedi nkhayilu mutu kakhambu fuana mu tambula. Timoteo wubaka nkhayilu awowo bo katambula  kiyeku ki kutuama ntuala mu kimvuka.—2 Tim. 4:14.

Khanu mbi Timoteo kavanga mu nkhayilu voti kiyeku kaba? Bo katanga kikuma ‘lemisa nkhayilu wutambula’, nandi ḿba wuyindula mbazu yo batu baba tatikanga mu zinzo yaba mbanga beni makala. Ayi vaba tombulu kulunga makala beni muingi maba beni mbazu. Buku yimueka yintuba ti, kikuma basadila ki Kiebeleo (a·na·zo·py·reʹo) mvuala Polo kasadila kinsundula, “kubue tatika, kubue vemuna, kubuela lulisa mbazu.” Mu bikuma binkaka kinsundula, kuba “wuyangalala bo wumvanga kisalu.” Diawu, khindusulu mvuala Polo kavana Timoteo yiba: ‘Wukivana mu kiyeku kiaku!’ Mawu befu mvitu tufueti vanga—kukivana mu kisalu ki Yave.

Bo kaba tatamana kutanga nkanda beni wufumina kuidi nkundi’andi, Timoteo wubakula dilongi dinkaka dinkinza dinkuiza kunsadisa kubaka ndandu mu kisalu ki kusamuna. Mvuala Polo wusonika: ‘Lundanga buboti, mu lusadusu lu phevi Yinlongo yidi mu befu, mambu amomo mamboti baku fiatitila.’ (2 Tim. 1:14) Nkhayilu mbi voti kiyeku mbi Timoteo katambula? Mu lutangu 13, mvuala Polo wutuba matedi ‘mambu mamboti,’ mansundula kiedika kidi mu Diambu di Nzambi. (2 Tim. 1:13) Bo kaba nkulutu wu kimvuka, Timoteo wuba kiyeku ki kulonga kiedika kuidi zikhomba mu kimvuka ayi batu bankaka. (2 Tim. 4:1-5) Mvandi Timoteo wutambula kiyeku ki kukengidila mamemi ma Nzambi. (1 Pete. 5:2) Muingi kalunda buboti nkhayilu katambula voti kiedika banlongisa, vaba tombulu Timoteo kufiatila mu phevi yinlongo yi Yave ayi Diambu diandi Kibibila.—2 Tim. 3:14-17.

Bubu befu mvitu tutambula nkhayilu voti kiyeku ki kusamuna. (Matai 28:19, 20) Tulenda tatamana kuvana luvalu kiyeku akiokio tutambula mu kuvanganga minsambu ayi kulongukanga Kibibila kadika kilumbu. (Loma 12:11, 12; 2 Tim. 4:13, 15, 16) Ḿba tutambula biyeku binkaka dedi, kusala mu kisalu ki thangu ka thangu voti kuba nkulutu wu kimvuka. Biyeku bi phila ayoyi, bifueti kutu vanga kukikulula ayi kufiatila mu lusalusu lu Nzambi. Tulenda lunda voti kukieba nkhayilu tutambula, mu kuvana yawu luvalu ayi kufiatila mu lusalusu lu Yave muingi kununga kukieba yawu.

Timoteo mvandi wuba kiyeku ki kukubika bankaka muingi mvawu bavanga mambu nandi kaba vanganga mu kiyeku kiandi. Diawu mvuala Polo kakindisila Timoteo: ‘Mambu amomo wuyuwa kuidi minu . . , longa mawu kuidi batu bakuikama muingi bawu mvawu babaka bu kulongila bankaka.’ (2 Tim. 2:2) Polo wutebula moyo Timoteo ti, kafueti longa bankaka mambu kaba longuka. Buboti beni kadika nkulutu wu kimvuka kuvanga mangolo ma kulonga bankaka. Nkulutu wu kimvuka widi mayindu ma Yave, kasi ko kiphala mu kiyeku katambula ayi kasuekanga ko mambu kazebi kuidi bankaka. Vayi nandi widi wukubama muingi kulongisa bankaka. Ayi nandi kasi ko boma mu kuyindula ti balenda kumvinginina mu kiyeku kadi voti zikhomba kankubika balenda luta vanga kiyeku beni buboti. Vayi nkulutu wu kimvuka widi mayindu ma Yave ayi wukikululanga, tidi beni kusadisa bankaka kubaka nzayilu voti kukonzuka mu kiphevi. Mu phila ayoyi, “babakala bakuikama” bantambula khubumunu, balenda ba bakubama muingi kubuela mioko kimvuka.

Bukiedika, Timoteo wuzola beni nkanda awowo wuba kuidi mvuala Polo. Tulenda yindula Timoteo kutanga ayi kuvutukila malongi mankinza maba mu nkanda beni, mu kuyindula phila kalenda sadila mawu mu kiyeku katambula.

Buidi befu mvitu bubu, tulenda landikinina malongi amomo? Mu kubuela lemisa nkhayilu tutambula, mu kulunda buboti kiyeku beni ayi kulonga bankaka mamoso tuzebi. Mu phila ayoyi, befu tuala landakana dilongi mvuala Polo kavana Timoteo: ‘Vanga kisalu ki kusamuna mu ntima woso.’—2 Tim. 4:5.