Anɛ o kane munyuhi nɛ a ngɛ jeha nɛ ɔ Hwɔɔmi Mɔ ɔ mi ɔ saminya lo? Ke jã a, lɛɛ hyɛ kaa o ma nyɛ ma ha sane bimi nɛ ɔmɛ a heto lo:

Kɛ e sa kaa waa pee wa ní ngɛ Kristofohi nɛ a pɔ mɛ nu ɔ a he ha kɛɛ?

E sa nɛ waa kase a hemi kɛ yemi ɔ, se e sɛ nɛ wa je a yi tsɔ. E sa nɛ waa yu wa he ngɛ nihi nɛ a “gbeɔ ni kpahi a yi mi” ɔ a he. (Jud 16) E sɛ nɛ wa bi mɛ a hɛ kɛ nɔ fɔmi ɔ he sane.​—w20.01, bf. 29.

Mɛni ha nɛ o ná nɔ mi mami kaa Yehowa le mo?

Baiblo ɔ tsɔɔ kaa Yehowa le mo po loko a fɔ mo. E buɔ o sɔlemihi tsuo tue. E le níhi nɛ ngɛ o tsui mi, nɛ e le o susumihi hulɔ. O ní peepee saa bɔ nɛ Yehowa nuɔ he ha a he. (1 Kron. 28:9; Abɛ 27:11) E gbla mo kɛ ba e ngɔ.​—w20.02, bf. 12.

Mɛni nɔ hyɛmi níhi nɛ tsɔɔ be nɛ e sa kaa o pee dii kɛ be nɛ e sa kaa o tu munyu?

Waa kɛ bua jɔmi tuɔ Yehowa he munyu. E sa nɛ waa tu munyu ke wa na kaa nɔ ko ngɛ nɔ́ ko pee nɛ ma ha nɛ e pee yayami nɛ hɛdɔ ngɛ he. E sa nɛ asafo mi nikɔtɔmahi nɛ a tu munyu kɛ wo nihi ga ngɛ be nɛ sa mi. E sa nɛ waa pee dii ke nihi ngɛ hlae nɛ waa tsɔɔ mɛ blɔ nɔ nɛ nyɛmimɛ nɛ a tsi a nya ngɛ ma kpahi a nɔ ɔ guɔ kɛ tsuɔ fiɛɛmi ní tsumi ɔ. E sɛ nɛ wa je laami sane komɛ nɛ kɔɔ asafo ɔ he ɔ kpo.​—w20.03, bf. 20-21.

Mɛni slɔɔto nɛ ngɛ baalɛhi nɛ a tu a he munyu ngɛ Yoel yi 2 kɛ baalɛhi nɛ a tu a he munyu ngɛ Kpo Jemi yi 9 ɔ a kpɛti?

Yoel 2:20-29 ɔ tsɔɔ kaa Mawu je baalɛ ɔmɛ kɛ ho lokoo ya nɛ e wo si kaa e ma ha mɛ ní nɛ baalɛ ɔmɛ puɛɔ ekohu. Pee se ɔ, Mawu plɛ e mumi ɔ kɛ pue a nɔ. Gbami nɛ ɔ fã ko ba mi benɛ Babilonia ta buli ɔmɛ ya tua Israel bi ɔmɛ ɔ, nɛ e fã ko hu ba mi pee se. Kpo Jemi 9:1-11 ɔ tsɔɔ kaa baalɛ ɔmɛ daa si kɛ ha Yehowa sɔmɔli nɛ a pɔ mɛ nu nɛ a kɛ kã jajeɔ Mawu kojomi ɔ kɛ siɔ je yaya nɛ ɔ. Lɔ ɔ haa nɛ nihi nɛ a fĩɔ je yaya nɛ ɔ se ɔ a he jɔɛ mɛ.​—w20.04, bf. 3-6.

Mɛnɔ ji omleyi je matsɛ ɔ mwɔnɛ ɔ?

Russia kɛ mahi nɛ a piɛɛ e he ɔ. A ye Mawu we bi a nɔ, nɛ a tsi a fiɛɛmi ní tsumi ɔ nya. Nɔ́ nɛ a pee nɛ ɔ tsɔɔ kaa a nyɛ Yehowa we bi. Omleyi je matsɛ ɔ kɛ woyi je matsɛ ɔ ngɛ hwue.​—w20.05, bf. 13.

Anɛ suhi kakaaka nɛɛ nɛ a wo ta ngɛ Galatia Bi 5:22, 23 ɔ pɛ lɛ peeɔ “mumi ɔ yiblii ɔ” lo?

Dɛbi. Mumi klɔuklɔu ɔ ma nyɛ maa ye bua wɔ nɛ wa ná su kpakpa kpa komɛ kaa dami sane yemi. (Efe. 5:8, 9)​—w20.06, bf. 17.

Mɛni oslaa nɛ ngɛ he kaa o kɛ o foni ko maa fɔ Intanɛti nɔ huɛ bɔmi hehi a nɔ?

Ke o kɛ nɔ́ ko fɔ Intanɛti nɔ huɛ bɔmi hehi a nɔ ɔ, e haa nɛ nihi susuɔ kaa o ngɛ fĩae, se pi kaa o baa o he si.​—w20.07, bf. 6-7.

Mɛni nɛ fiɛɛli ma nyɛ maa kase kɛ je wo hɛli nɛ a he be a ngɔ?

A tsuɔ ní ngɛ be kɛ he nɛ a ma nyɛ maa na lohi ngɛ. A tsɔseɔ mɛ konɛ a le níhi nɛ e sa nɛ a kɛ tsu ní. A kɛ kã tsuɔ ní ke si fɔfɔɛ ɔ tsake po. Wɔ hu wa ma nyɛ maa pee jã ngɛ wa fiɛɛmi ní tsumi ɔ mi.​—w20.09, bf. 5.

Mɛni wa ma nyɛ maa pee kɛ ye bua wa Baiblo kaseli konɛ suɔmi nɛ a ngɛ kɛ ha Yehowa a mi nɛ wa?

Moo wo Baiblo kaselɔ ɔ he wami nɛ e kane Baiblo ɔ daa ligbi nɛ e pue e yi mi tɛ ngɛ nɔ́ nɛ e kane ɔ he. Moo tsɔɔ lɛ bɔ nɛ a sɔleɔ ha.​—w20.11, bf. 4.

Mɛnɔmɛ nɛ a piɛɛ “nihi tsuo [nɛ a] maa ba wami mi ngɛ Kristo mi” ɔ a he?​—1 Kor. 15:22.

Bɔfo Paulo de we ke a ma tle adesahi tsuo si kɛ ba wami mi. Kristofohi nɛ a pɔ mɛ nu nɛ ‘a tsu a he nɛ a kɛ Kristo Yesu pee kake’ ɔ a he munyu nɛ e ngɛ tue. (1 Kor. 1:2; 15:18)​—w20.12, bf. 5-6.

Mɛni nɛ nihi nɛ a pɔ mɛ nu ɔ maa pee ke a ‘tsake mɛ kaa a fiaa hɛ ngmɛ ɔ, ngɛ nyagbe titimati ɔ nɔ’?​—1 Kor. 15:51-53.

A maa piɛɛ Kristo he nɛ a kɛ dade tso maa hyɛ je ma amɛ a nɔ. (Kpoj. 2:26, 27)​—w20.12, bf. 12-13