Nyo isomo kilili thiwiwec ma tung’ tung’ m’ubed uwok i Otkur ma Wiw mi oro maeni? Ka eyo, kenen nyo icopo dwoko wang’ penji m’ulubo e:

Wacikara nineno Jukristu ma tipo wiro nenedi?

Wanyutho igi woro pi lapor migi ma ber mi yioyic; re wanenogi ngo nia pigi tek nisagu mukero. Wadodogi ngo nisagu dhanu mange. (Yud. 16) Wapenjogi ngo nia gikegikor iwa lembe iwi genogen migi mi cikwo i polo.​—w20.01, mba. 29.

Ang’o m’unyutho nia andha Yehova ung’eyi?

Bibilia unyutho nia elar eng’eyi ma fodi junyoli ngo. Bende ewinjo rwo peri. Yehova ung’eyo lembe mir adundeni man eng’eyo bende lembe m’ibeparu. Lembe m’ibetimo copo nyayu mutoro kunoke can i ie. (1 Kei. 28:9; Rie. 27:11) Man epeyi en gire i bang’e.​—w20.02, mba. 12.

Lapor ma kani m’unyutho saa m’ukwayu wawec i ie man saa m’ukwayu wabed i ie ling’?

Wabedo kud anyong’a niweco pi Yehova. Waweco tek waneno ng’atu moko ukwanyu yo ma rac. Judong cokiri gicero ngo dhogi niweco tek ukwayere nia gimii juk ni ng’atu moko. Waweco ngo pi ning’eyo (kunoke nikoro) kite ma tic mwa ubetimere ko i ng’om ma jukwero ticne i ie. Wakoro ngo ni jumange pir amung’ m’ukwayu ngo ging’ei.​—w20.03, mba. 20-21.

Bonyo ma juweco pire i Yoel thek 2, ukoc nenedi ku ma juweco pire i Lembanyutha thek 9?

Yoel 2:20-29 uyero nia Mungu bicoro njuru bonyo cen man eng’olo nia ebiculo wang’ gin ma ginyotho. I ng’ei maeno, ebikonjo tipo pare. Lembe maeno upong’o kinde ma juaskari mi Babeli ginyotho ng’om mir Israel man edok epong’o bende i ng’eye. Lembanyutha 9:1-11 ke ukoro pi Jukristu ma juwiro mi rundi mwa eni, ma gibetwong’o pi pokolembe ma Mungu bikelo iwi ng’om maeni ma rac, man lembene ubemielo kum dhanu ceke m’ubediko cing’gi ku ng’omne.​—w20.04, mba. 3-6.

Ng’a ma tie ubimo ma yor ariwa ma malu tin eni?

Russie ku ng’om m’udiko cing’gi kude. Gibesendo dhanu pa Mungu, gikwero tic mi rweyo lembanyong’a man gidagu Jumulembe pa Yehova. Ubimo ma yor ariwa ma malu, ubekiedo kud ubimo ma yor ariwa ma piny.​—w20.05, mba. 13.

Nyo kite ma tung’ tung’ ma jukwanu i Jugalatia 5:22, 23 kende re m’utie “nying’ tipo”?

Ungo. Tipo ma leng’ copo konyowa nicego kite mange ma beco, calu ve bedopwe. (Ef. 5:8, 9)​—w20.06, mba. 17.

Niketho cal peri m’imaku i kusika mi weco ku dhanu i Internet, copo bedo iri kud ariti ma kani?

Gin m’iketho i kusika mi weco ku dhanu i Internet copo nyutho nia itie ng’atu ma doro kunoke ma ting’ere, ento ungo ng’atu ma jwigere.​—w20.07, mba. 6-7.

Wacopo nwang’u ponji ma kani i kum bodho mi judwarnam?

Judwarnam gidwaru dwar i saa man i kaka ma rec nwang’ere lee i ie. Giponjo nitio cuu ku jamtic migi. Man gidwaru dwar asu kadok i saa mi peko. Wan bende wacopo lubo lapor migi i tic mi lembanyong’a.​—w20.09, mba. 5.

Kenyuth yo moko ma wacopo konyo ko juponj Biblia kara mer ma gimaru ko Yehova udok tek

Wa copo ketho cwinygi nia gibed gisom Biblia kubang’ ceng’ man gibed ginyam i gin ma gisomo. Man wacopo ponjogi kara ging’ei nirwo.​—w20.11, mba. 4.

Wec ma nia “i Kristu dhanu ceke binwang’u kwo” uketho i ie jukani?​—1 Kor. 15:22.

Jakwenda Paulo ubino yero ngo nia dhanu ceke bicer. Ebinio weco pi Jukristu ma juwiro ku tipo, “ma judwokogi leng’ . . . [i] Kristu Yesu.” (1 Kor. 1:2; 15:18)​—w20.12, mba. 5-6.

Jukristu ma juwiro ku tipo gibitim’ang’o kinde ma ‘jubilokogi nyapil calu goyowang’ saa ma [agwara ma tokcen biywak]’?​—1 Kor. 15:51-53.

Gibidikiri karacelo ku Kristu pi nitelo wi dhanu kud uluth mi cuma. (Nyu. 2:26, 27)​—w20.12, mba. 12-13.