?Amun kanngannin afuɛ 2020 nun Sasafuɛ Tranwlɛ’n kwlaa nga be fiteli’n, be nun? Sɛ ɔ ti sɔ’n, amun tɛ kosan nga’m be su.

?Wafa sɛ yɛ ɔ fata kɛ e bu be nga Ɲanmiɛn kpali be sieli be ngunmin’n mun-ɔn?

Ɲanmiɛn mɔ be su i kpa’n ti’n, i sɔ’n yo e fɛ. Sanngɛ ɔ fataman kɛ e “manman” be. (Zid. 16, jnd.) Asa ekun’n, ɔ fataman kɛ e usa be wafa nga Ɲanmiɛn fɛli i wawɛ’n mannin be’n, i su ndɛ.—w20 Zanvie, b. 29.

?Ngue yɛ ɔ kle kɛ ɔ ndɛ lo Zoova-ɔ?

Biblu’n kle kɛ kwlaa naan b’a wu ɔ bɔbɔ, ɔ si ɔ. Kpɛkun ɔ tie ɔ srɛlɛ’n. Ɔ si ɔ klun akunndan’n kwlaa. Yɛ ninnge nga a yo be’n, be kwla jɔ i klun annzɛ be kwla yo i ya. (1 Nyo. 28:9; Nya. 27:11) Ɔ yoli maan a fali ɔ wun mɛntɛnnin i. —w20 Fevrie, b. 12.

?Blɛ benin nun yɛ ɔ fata kɛ e ijɔ-ɔ? ?Yɛ blɛ benin nun yɛ ɔ fata kɛ e muan e nuan-ɔn?

Kɛ e kan Zoova i ndɛ e kle sran mun’n, ɔ yo e fɛ. Sɛ aniaan kun su fa atin tɛ wie su’n, ɔ fata kɛ e mɛn i afɔtuɛ. Sɛ ɔ nin i fata’n, asɔnun kpɛnngbɛn’m be kwla man aniaan’m be afɔtuɛ. Sɛ be tannin e jasin fɛ bolɛ junman’n nvle wie nun naan e wun aniaan kun m’ɔ fin lɔ’n, ɔ fataman kɛ e usɛ i aniaan nga be o nvle sɔ nun’n be su ndɛ. Sɛ kusu e tran lika nga b’a tannin e jasin fɛ bolɛ junman’n lɛ’n, ɔ fataman kɛ e kan lɔ ndɛ e kle sran.—w20 Marsi, b. 20-21.

?Ngbaciɛ benin yɛ ɔ o lalo nga Zoɛl ndɛ tre 2 kan be ndɛ’n, ɔ nin nga Sa Nglo Yilɛ ndɛ trɛ 9 kan be ndɛ’n be afiɛn-ɔn?

Zoɛl 2:20–3:1, 2 se kɛ Ɲanmiɛn wá fúan lalo mun kɔ́ mmua. Kpɛkun ninnge nga be sacili be’n, ɔ́ síe be osu. Asa ekun’n ndɛ mma sɔ’n se kɛ, kɛ ɔ ko yo sɔ’n Ɲanmiɛn wá fɛ́ i wawɛ’n mán sran mun. Kɛ Babilɔninfuɛ’m be ko utuli Izraɛli nvle’n, ndɛ sɔ’n i bue kpɛnnin su. Kpɛkun i sin’n, i bue kun ekun kpɛnnin su. Lalo nga Sa Nglo Yilɛ ndɛ trɛ 9:1-11 kan be ndɛ’n yɛle be nga be kpali be sieli be ngunmin’n. Yakpa su’n, be kan jɔlɛ nga Ɲanmiɛn wá dí mɛn tɛ nga’n i ndɛ. Yɛ ndɛ nga be kan’n ti’n, mɛn nunfuɛ’m be wunman be wun fɛ.—w20 Avrili, b. 3-6.

?Andɛ’n, wan yɛ ɔ ti famiɛn ng’ɔ o nglo lɔ’n niɔn?

Yɛle Risi nin be nga be suɛn i bo’n. Be kle Ɲanmiɛn i sufuɛ’m be yalɛ. Yɛle kɛ be tannin be jasin fɛ bolɛ junman’n. Kpɛkun be yo be ninnge tɛtɛ wie mun ekun. Asa ekun’n, be nin famiɛn ng’ɔ o ngua lɔ’n be kpli kwlalɛ’n.—w20 Mɛ, b. 13.

?“Nzuɛn nga Ɲanmiɛn wawɛ’n yo maan klɔ sran yi i nglo’n” be kwlaa yɛ Galasifuɛ Mun 5:22, 23 kan be ndɛ-ɔ?

Cɛcɛ. Ɲanmiɛn wawɛ’n kwla uka e naan y’a yi nzuɛn kaka wie mun ekun be nglo. I wie yɛle sɛsɛ yolɛ’n. (Efɛ. 5:8, 9).—w20 Zuɛn, b. 17.

?Ngue ti yɛ ɔ fataman kɛ e ci like kwlaa nga e yo’n i foto e sie i ɛntɛnɛti su-ɔ?

Ninnge nga e sie be ɛntɛnɛti su’n, be kwla yo maan sran’m be bu i kɛ e tu e wun.—w20 Zuie, b. 6-7.

?Ngue ti yɛ e kwla fa jasin bolɛ junman’n e sunnzun jue tralɛ junman’n niɔn?

Kɛ sran’m bé kɔ́ jue tralɛ’n, blɛ nga be si kɛ sɛ be kɔ’n, bé ɲán jue’n, i nun yɛ be kɔ-ɔ. Annzɛ lika nga be kwla ɲan jue lɛ’n, lɛ yɛ be kɔ-ɔ. Be suan ninnge nga be fa di junman’n, be nun junman dilɛ. Kannzɛ lika’n ti sɛ ti sɛ’n be mian be ɲin be di be junman’n. E kusu kɛ é bó jasin fɛ’n, like kunngba’n yɛ e yo-ɔ.—w20 Sɛptanblu, b. 5.

?Wafa sɛ yɛ e kwla uka like suanfuɛ mun naan b’a klo Zoova-ɔ?

E wla be fanngan naan be kanngan Biblu’n nun cɛn kwlakwla. Kpɛkun be bu su akunndan. Asa’n, e kle be wafa nga be kwla srɛ Ɲanmiɛn’n.—w20 Novanblu, b. 4.

Pɔlu seli kɛ: “Klisi kusu ti’n, sran’m be kwlaa bé ɲán nguan.” ?Wan’m be ndɛ yɛ ɔ kan-ɔn?—1 Kor. 15:22.

Pɔlu w’a seman kɛ bé cɛ́n sran’m be wunmuan’n. Ɔ maan, ɔ su kan be nga be kpali be sieli be ngunmin’n be ndɛ. “Zezi Klisi i dunman nun’n,” Klisifuɛ sɔ’m be ti Ɲanmiɛn liɛ. (1 Kor. 1:2; 15:18)—w20 Desanblu, b. 5-6.

?“Kɛ be ko bo awɛ kasiɛn’n” mɔ “be ɲinma bulɛ kunngba sa kplɛ” be nga be kpali be sieli be ngunmin’n be ko ‘kaci’n,’ junman benin yɛ bé wá dí-ɔ?—1 Kor. 15:51-53.

Klisifuɛ sɔ’m be nin Zezi bé kánkán nvlenvle mun nin blalɛ kpɔnman. (Ngl. 2:26, 27)—w20 Desanblu, b. 12-13.