Aliiha humaaru san sun Garüdia Awisahatu lánina irumu le? Ariha huméi anhein gayara lubéi hóunabuni álügüdahani burí le:

Ida luba wóuseruniña kristiánugu anuadirúaaña?

Gebegiti hafiñen woun, lau sun lira móuserun wamutiña lau aban igaburi espechaliti. Móuserun wamutiña lau saragu uéiriguni (Hud. 16). Madügüntiwa álügüdahani houn libügürü hemenigi (w20.01, páhina 29).

Ka uagu chouru wabalin teni lan Heowá lun kada aban wádangiñe?

Afuranguagüdatu Bíbülia ariha lumutiwa lan Heowá íbini lubaragiñe wagüriahóun. Ani aganba lumuti giñe furíei le wadügübei lun. Subudi lumuti giñe le tídanbei wanigi luma le wasaminarubei. Ligíati, gániti le wadügübei luma ligaburi lasandiragun Heowá lungua (1 Kro. 28:9; Ari. 27:11). Achawaha laadina Heowá luouguoun (w20.02, páhina 12).

Ka dan lunbei wayanuha ani ka dan lunbei werederun maniñu?

Gúndaatiwa dan le wayanuhan luagu Heowá. Ani lunti wariñagun somu katei dan le warihin léiguada lan somu íbiri lidoun figóu wéiriti. Rútiña giñe wéiyaaña lidan afiñeni eweridihani houn íbirigu dan le mégeiwa lan. Málügüdahantiwa luáguti ida liña lan lapurichihóun lidan burí ageiraü le ñein lubéi máhawa lan lun wapurichiha. Mayanuhantiwa giñe luagu katei le moun lumuti lun lasubudirún (w20.03, páhina 20 luma 21).

Ida liña ámuñegueinarügü hamá chagagaru ha lídanbaña kapítulu 2 tidan liliburun Hoeli hawéi ha lídanbaña kapítulu 9 tidan líburu Arufudúni?

Ariñawagúati tidan liliburun Hoeli 2:20-29 aba lan lanügüniña Bungiu chagagaru dise ani füramaseti laransehani wuribani le hadügübei. Lárigiñe lira, aba lóunahani lani sífiri. Gúnfuliti dimurei burí le dan lárigiñe dan le hebelurunbei Babilóniana Herusaléun. Ayanuhatu líburu Arufudúni 9:1-11 hawagu kristiánugu anuadirúaaña ha lídanbaña wadaani ha ítarabaña kamá hamuga chagagaru lau hapurichihani lasiadiruniña Bungiu wuribatiña ha ubouagubaña ani adügati uganu le lun madariragun hamá houngua ha ídehabaña luma ubóu le (w20.04, páhina 3 darí 6).

Ka san lurúeitebei nórute uguñe weyu?

Rusia hama ha lúmagiñebaña. Ananihaali houn lumutuniña Bungiu lau lamahadun lun apurichihani luma lau iyereegu hamá Gefentiña lun. Awuribuhaali lurúeite nórute luma lurúeite suru (w20.05, páhina 13).

Nefu “igaburi le líchugubei [s]ífiri” lidan Galasiana 5:22, 23, ligíarügüñein san ligaburi sífiri?

Uá. Íderagua lumutiwa sífiri sandu lun gagaburi wamá ámuya igaburi le buiti kei burí irichaü (Efe. 5:8, 9) (w20.06, páhina 17).

Ka uagu dencha lubéi wabürühan, wamudeiragüdün iyawaü o bidéu lidan páhina le ñein lubéi hadügǘwa umadagu?

Le burí wamudeiragüdübei lidoun páhina lánina hadügǘn umadagu gayaraabei ladügün lun hasaminarun gürigia wabulofuhaña lan lubaragiñe hamuga warufudun ǘnabuguni (w20.07, páhina 6 luma 7).

Ka gayaraabei wafurendeirun hámagiñe óuchahatiña ha buítiña?

Óuchahatiña ha buítiña nadagimeintiña lidan oura luma fulasu le ñein lubéi másiña lan hadariruba lan úduraü, ani subudi hamuti hayusurunu umegeguni lánina óuchahani buidu, arufudatiña ganigi lidan furumiñeguarügü sügǘ le gádanbaliña. Gayaraati giñe wadügüni ligiaméme lidan wani ministeriu (w20.09, páhina 5).

Ida luba wíderaguniña aturiahatiña Bíbülia lúntima línsiñedun Heowá houn?

Gayaraati wínchahaniña lun haliihanu Bíbülia sagü weyu, wíderaguniña lun hararamagun asaminara luagu le haliihabei luma lun warufudahan houn ida luba lan hafurieidun (w20.11, páhina 4).

Kátaña meha uágubaña layanuhan Pábulu dan le lariñagubei “ítara luba giñe gabagariya hamá súngubei [...] ladüga lánigu hamá Kristu”? (1 Ko. 15:22).

Mama meha lariñaguña apostolu Pábulu háguyuguba lan sun gürigia. Layanuhaña meha hawagu kristiánugu anuadirúaaña “ha lídanhañabaña aban luma Hesukrístu” (1 Ko. 1:2; 15:18) (w20.12, páhina 5 luma 6).

Kaba hadüga kristiánugu anuadirúaaña danme le hasansirun “lidan aban léfegechun luma lámurudun aguu, danme le laganbúniwa tumalali fidu”? (1 Ko. 15:51-53).

Híderagubei Hesusu adundehaña lumutuniña Heowá lau badun le lauti gürabu (Aruf. 2:26, 27) (w20.12, páhina 12 luma 13).