Tukum Vennak Innsang capar pawl kha ṭha tein na rel maw? Na rel ahcun a tanglei biahalnak hna i a phi kha na phit khawh lai:

Chiti thuhmi hna kha zeitindah kan pehtlaih hna awk a si?

An zumhnak kha kan sunsak tuk ko nain a hleihluat tuk in lungthin kan pe hna lo. Cun midang faak kha kan hrial. (Judas 16) An i ruahchanmi kong he aa tlaiin biahalnak kan tuah hna lo.—w20.01, ca. 29.

Jehovah nih ṭha tein a ka hngal maw?

Jehovah nih na chuah hlan hmanhin aan hngalh tiah Baibal nih a ti. Na thlacamnak kha aan ngaihpiak. Na lungthin le na ruahnak kha a hngalh i na tuahsernak nih amah kha a hnorsuan khawh. (1 Chan. 28:9; Ptb. 27:11) Cun a sinah aan hnuh.—w20.02, ca. 12.

Chim awkah aa tlakmi caan cu zeitikah dah a si?

Jehovah kong kha lunglawm tein kan chim. Mi pakhatkhat kha lam a tlau lai ti kan hngalh ahcun kan chimh. A herh ahcun Khrihfa upa sinah ruahnak cheuhnak hal dingin kan chimh. Kan rian ṭuannak khenkhamnak ram kong kha (midang sinah) a dikthliar in kan chim lo. A biapimi biathli kong kha kan phuang lo.—w20.03, cc. 20-21.

Joel dal 2 i khaubawk le Biathlam dal 9 i khaubawk cu zeitindah an i dan?

Joel 2:20-29 ah Pathian nih khaubawk pawl kha lamhlapi ah ka ṭhial hna lai i an hrawhmi kha kaan pek ṭhan hna lai tiah bia aa kam tiah a ti. Cu hnuah Pathian nih a thlarau a toih hna. Mah kong cu Babilon mi nih Israel mi pawl an hrawh lio le a hnuah a rak tling. Biathlam 9:1-11 ah a langhtermi khaubawk pawl cu tuchan i chiti thuhmi kha an si i annih nih hi vawlei ṭhalo kha an doh i Pathian biaceihnak kong kha an thanh. Mah nih hi vawlei lei ah a ṭangmi pawl kha lungnuam loin a umter hna.—w20.04, cc. 3-6.

Tuchan ah chaklei siangpahrang cu ahodah a si?

Russia le amahlei ah a ṭangmi ram hna kha an si. Annih nih Pathian miphun kha direct in an doh hna, phungchim rian kha an khenkham i Jehovah Tehte pawl an huat hna kha an langhter. Chaklei siangpahrang le thlanglei siangpahrang cu an i engtai.—w20.05, ca. 13.

“Thlarau nih a chuahtermi” ziaza cu Galati 5:22, 23 ah a langhtermi phunkua lawng hi maw a si?

A si lo. Thiang thlarau nih dinnak ti bantuk a ṭhami ziaza hna kha ṭhanchoter awkah a kan bawmh. (Efe. 5:8, 9)—w20.06, ca. 17.

Na kong he aa tlaiin online ah taar ṭih a nunnak a ruang pakhat cu zeidah a si?

Na taarmi nih nangmah le nangmah aa toidormi si loin aa porhlawmi na si kha a langhter.—w20.07, cc. 6-7.

Phungchim rian a ṭuanmi hna nih nga tlaih a thiammi hna sinin zeidah an cawn khawh?

Ngatlaitu hna nih nga an um deuhnak hmun le nga an tam deuh caan ah nga an tlaih. Annih cu aa tlakmi hriamnam hman awkah cawnpiak an si. Thil sining aa thlen ningin ralṭha tein rian an ṭuan. Phungchim rian kan ṭuan tikah cutin kan tuah khawh.—w20.09, ca. 5.

Baibal kan cawnpiakmi hna nih Jehovah an dawt chin nakhnga zeiti lam in dah kan bawmh khawh hna?

Baibal kha nifatin an rel nakhnga le an relmi kong kha an ruah nakhnga tha kan pek khawh hna. Thlacam awkah kan cawnpiak khawh hna.—w20.11, ca. 4.

“Khrih he an i pehtlaihnak thawngin mi vialte cu nunnak ah thawhter” an si lai timi ah ahote dah an i tel lai?—1 Kor. 15:22.

Lamkaltu Paul nih mi vialte cu an tho ṭhan lai tiah a ti lo. Cucaah ‘Khrih Jesuh he an i pehtlaihnak thawngin’ amah ta a simi chiti thuhmi Khrihfa hna kha a chim duhmi hna a si. (1 Kor. 1:2; 15:18)—w20.12, cc. 5-6.

Chiti thuhmi hna nih ‘muko hmanung bik tum caan, mit ṭhep i an i thlen’ dih hnuah zeidah an tuah lai?—1 Kor. 15:51-53.

Annih nih Jesuh hnu kha an zulh lai i miphun vialte kha thir fung in an uk hna lai. (Biat. 2:26, 27)—w20.12, cc. 12-13.