¿Wen pejcʌbilix baʼ chaʼan jiñi temaj tac maxto bʌ wen jalic loqʼuem ti Lac Tsictesʌbentel? Qʼuele mi mucʼʌch i mejlel a jacʼ ili cʼajtiya tac:

¿Bajcheʼ yilal yom lac melbal tiʼ tojlel yajcʌbiloʼ bʌ?

Mucʼʌch laj qʼuel ti ñuc i ñopoñelob jiñi yajcʌbiloʼ bʌ, pero wen jach chuqui mi lac mel tiʼ tojlelob. Maʼañic mi lac pejcañob ti «tʼojol bʌ tʼan» (Jud. 16). Maʼañic mi laj cʼajtibeñob bajcheʼ tsaʼ yajcʌntiyob chaʼan miʼ majlelob ti panchan (w20.01, i yopol 29).

¿Chucoch mucʼʌch lac ñaʼtan chaʼan Jehová mucʼʌch i qʼuelonla ti jujuntiquil?

Jiñi Biblia miʼ yʌl chaʼan Jehová tsiʼ qʼueleyonla cheʼ yaʼto añonla tiʼ ñʌcʼ lac ñaʼ i mi ñʌchʼtan pejtelel jiñi oración muʼ bʌ lac melben. Cheʼ jaʼel, yujil chuqui an ti lac pusicʼal yicʼot chuqui woli lac pensalin. Cheʼ jaʼel, jiñi muʼ bʌ lac mel miʼ mejlel i yʌqʼuen i tijicñʌyel o i chʼijyemlel Jehová (1 Cr. 28:9; Pr. 27:11). Jehová jiñʌch tsaʼ bʌ i pʌyʌyonla tiʼ tojlel (w20.02, i yopol 12).

¿Jalaqui yom mi lac chaʼlen tʼan yicʼot jalaqui maʼañic yom mi lac chaʼlen tʼan?

Tijicñayonla cheʼ bʌ mi la cʌcʼ ti cʌñol Jehová. Cheʼ jaʼel, yom mi lac pejcan juntiquil muʼ bʌ caj i mel mach bʌ tojic. Jiñi ancianojob miʼ ticʼob jiñi hermanojob cheʼ bʌ i cʼʌjñibalob i chaʼan. Maʼañic mi laj cʼajtin yicʼot maʼañic mi lac sub bajcheʼ miʼ mejlel jiñi subtʼan yaʼ baqui mʌctʌbil. Maʼañic mi la cʌl mach bʌ yomic miʼ ñaʼtʌntel (w20.03, i yopol 20 yicʼot 21).

¿Chuqui qʼuexel tac chaʼan jiñi cabʌl sajcʼ muʼ bʌ lac taj ti Joel capítulo 2 yicʼot muʼ bʌ lac taj ti Apocalipsis capítulo 9?

Joel 2:20-27; 2:28, 29 (TNM) miʼ yʌl chaʼan Dios ñajt miʼ pʌy majlel jiñi sajcʼ tac yicʼot chaʼan mi caj i chaʼ tojʼesan pejtelel tsaʼ bʌ i ticʼla jiñi cabʌl sajcʼ. Cheʼ jiñi, miʼ yʌqʼuen i yespíritu majqui jach bʌ quixtañu. Ili tsaʼ tsʼʌctiyi cheʼ bʌ jiñi babiloniojob tsiʼ jisayob Jerusalén i ti jiñi Pentecostés cheʼ ti jabil 33. Apocalipsis 9:1-11 miʼ taj ti tʼan jiñi yajcʌbiloʼ bʌ i chaʼan Jehová ili ora, muʼ bʌ i subob yicʼot i chʼejlel chuqui mi caj i mel Dios tiʼ contra ili jontol bʌ pañimil, i muʼ bʌ coltañob ili pañimil maʼañic miʼ mulañob (w20.04, i yopol 3 cʼʌlʌl ti 6).

¿Majqui jiñi rey ti norte ili ora?

Rusia yicʼot jiñi muʼ bʌ i coltañob. An i ticʼlayob i tejclum Dios come an i mʌctayob jiñi subtʼan yicʼot miʼ tsʼaʼleñob i testigojob Jehová. Jiñi rey ti norte an i contraji jiñi rey ti sur (w20.05, i yopol 13).

¿Muʼ ba i taj ti tʼan Gálatas 5:22, 23 (TNM) pejtelel jiñi melbal tac ochem bʌ tiʼ «wut muʼ bʌ i yʌcʼ jiñi espíritu»?

Maʼañic. Jiñi chʼujul bʌ espíritu miʼ coltañonla jaʼel lac pʌs yambʌ melbal tac, bajcheʼ jiñi i melol chuqui toj (Ef. 5:8, 9) (w20.06, i yopol 17).

¿Chuqui i wocolel cheʼ bʌ mi lac letsan ti Internet foto tac, video tac yicʼot tʼan tac chaʼan mi la cʌl ti lac tojlel?

Jiñi muʼ bʌ lac letsan ti Internet miʼ mejlel i yʌcʼ ti ñaʼtʌntel chaʼan ñuc mi laj qʼuel lac bʌ i chaʼan maʼañic lac pecʼlel (w20.07, i yopol 6 yicʼot 7).

¿Chuqui miʼ mejlel laj cʌn tiʼ tojlel jiñi wem bʌ xchuc chʌyob?

Jiñi wem bʌ xchuc chʌyob miʼ majlelob ti subtʼan yaʼ baqui miʼ mejlel i ñumen tajob, miʼ cʼʌñob ti wen jiñi eʼtijib añoʼ bʌ i chaʼan i miʼ chaʼleñob eʼtel yicʼotob i chʼejlel. Cheʼʌch miʼ mejlel lac mel jaʼel ti jiñi subtʼan (w20.09, i yopol 5).

¿Bajcheʼ miʼ mejlel laj coltañob jiñi muʼ bʌ la cʌqʼueñob estudio chaʼan miʼ ñumen cʼuxbiñob Jehová?

Laʼ lac subeñob i pejcan jiñi Biblia ti jujumpʼejl qʼuin, laʼ laj coltañob chaʼan miʼ wen ñaʼtañob muʼ bʌ i pejcan, laʼ laj cʌntesañob i mel oración (w20.11, i yopol 4).

¿Majqui woliʼ taj ti tʼan Pablo cheʼ bʌ tsiʼ yʌlʌ chaʼan «mi caj i chaʼ cuxtʌyelob pejtelel añoʼ bʌ tiʼ Cristo»? (1 Co. 15:22).

Jiñi apóstol Pablo maʼañic tsiʼ yʌlʌ chaʼan mi caj i chaʼ cuxtʌyelob pejtelel jiñi quixtañujob, woliʼ taj ti tʼan jiñi yajcʌbiloʼ bʌ tsaʼ ‹pʌjyiyob chaʼan miʼ yochelob ti Cristo Jesús› (1 Co. 1:2; 15:18) (w20.12, i yopol 5 yicʼot 6).

¿Chuqui mi caj i melob cheʼ bʌ yaʼix añob ti panchan jiñi yajcʌbiloʼ bʌ cheʼ bʌ mi caj i yʌjñelob ti ora «cheʼ bajcheʼ ora jach miʼ mujtsʼel miʼ cajñel lac wut» «cheʼ miʼ wustʌl jini cojix bʌ trompeta»? (1 Co. 15:51-53).

Mi caj i coltañob Jesús cheʼ bʌ chucul i chaʼañob vara melbil bʌ ti tsucul taqʼuin cheʼ bʌ mi caj i melob i yeʼtel ti tejclum tac (Ap. 2:26, 27) (w20.12, i yopol 12 yicʼot 13).