Hnei epuni kö hna e la itre Ita Ne Thup ne la macatre celë? Atreine kö epuni sa la itre hnying celë:

Nemene la aqane tro sa ujë kowe la itre Keresiano hna iën?

Easa metrötrë angatr ke, ka catre lapaune angatr, ngo tha easë kö a atrunyi angatr. Eje hi, tha easë kö a “haine la pengö i ketre.” (Iudra 16, ftn) Ketre, tha easë kö a hnying göne la mejiune i angatr.—w20.01, g. 29.

Nemene la ka anyipicine laka, Iehova a wangatrunyi së isa ala cas?

Tusi Hmitrötr a amamane laka, qëmekene troa hnaho së, atre së hë hnei Iehova. Ketre, Nyidrëti a dreng la itre thithi së. Atre hi Nyidrëti la itre mekuna së me itre aliene hni së, nge Nyidrëti a madrin la easa kuca la loi. (1 A. l. ite jo. 28:9; Ite edomë 27:11) Iehova la ka eatrongë angatr koi Nyidrë.—w20.02, g. 12.

Eu la ijine tro sa ithanata me ijine tro sa lapa thaup?

Easa madrin troa qeje Iehova. Ketre, ame la easa öhne laka, ketre trejin a troa kuca la ngazo, easa canga ithanata koi angeic. Nge tha cile kö la itre qatre thup troa hamë eamo kowe la ketre trejin ka aja ixatua. Tha easë kö a hnying (maine qaja) la itre aqane eköth la huliwa ne cainöj ngöne la itre nöj hna wathebon. Tha easë kö a qaja la itre ithuemacany ka sihngödr e tha nyine tro kö a qaja.—w20.03, g. 20-21.

Nemene la eisapengönene la itre sipa hna qaja ngöne Ioela 2 me itre sipa hna qaja ngöne Hna Amaman 9?

Kola qaja ngöne Ioela 2:20-29 ka hape, hnei Akötresie hna helën la iume sipa me thingehnaean ka hape, tro Nyidrëti a nyihnane la nöjei ewekë hna angazone hnei iume sipa. Kolo fe a perofetan ka hape, “thupene lai,” hnei Akötresie hna nue la uati hmitrötre i Nyidrë. Hna eatr la hna perofetane celë, ngöne lo angetre Babulona a lepi angetre Isaraela me ngöne la ketre ijine fe. Ame la itre sipa hna qaja ngöne Hna Amaman 9:1-11, tre, kola qaja la itre Keresiano hna iën ngöne la ijine së. Angatr a catre tro fë la itre hna amekötin hnei Akötresie. Celë hi matre itre atrene fen a hmahma me elëhni.—w20.04, g. 3-6.

Drei la joxu ne kolopi enehila?

Russie me itre sine xöle i angatr. Hetre ethane la huliwa i angatr kowe la mele ne la itre hlue i Akötresie. Eje hi, angatr a wathebone la huliwa ne cainöj me amamane laka, xele catre angatr ma wai së. Ketre, joxu ne kolopi a icilekeu memine la joxu ne kolojë.—w20.05, g. 13.

Hapeu la “wene la ua,” kolo hi a qaja la naene lao thiina hna qaja ngöne Galatia 5:22, 23?

Waea. Uati hmitrötr a xatua së troa hetre itre xaa thiina, tune la meköt. (Efe. 5:8, 9)—w20.06, g. 17.

Hapeu, hetre ethane kö la troa amë ngöne Ëternet la itre ithuemacanyi thatraqane la mele së?

Jëne la itre hne së hna amë ngöne Ëternet, ijije hi tro itre xan a mekun laka, pëkö hni ne ipië së. Nge easa sipu selë së me pi mama.—w20.07, g. 6-7.

Nemene la ini hne së hna xom qa ngöne la itre ka nyi ie?

Angatr a nyi ie ngöne la hawa me götrane gaa hetre ie. Hetrenyi la itre jiane huliwa ka lolo nge maca angatr troa huliwan. Ketre, angatr a cile catr kowe la itre ijine jol. Celë hi matre, ijije hi tro sa nyitipu la tulu i angatr ngöne la hna cainöj.—w20.09, g. 5.

Tro sa xatuane tune kaa la ketre hnainin troa acatrene la ihnimi angeic koi Iehova?

Loi e tro sa ithuecatre koi angeic troa e Tusi Hmitrötr e nöjei drai me lapa mekun. Ketre, loi e tro fe sa ini angeic troa thith.—w20.11, g. 4.

Paulo a qeje drei ngöne lo nyidrëti a hape: “Jëne Keriso, tro ha mele la nöjei atr”? —1 Kor. 15:22.

Tha nyidrëti kö a qaja ka hape, troa amelene la nöjei atr asë. Nyidrëti e celë a qaja la itre hna iën, itre “hna ahmitrötrën me ka casi me Iesu Keriso.” (1 Kor. 1:2; 15:18)—w20.12, g. 5-6.

Nemene la hna troa kuca hnene la itre hna iën ngöne la ‘angatr a troa ketrepengön kösë samek, ngöne la ijine ufi trutru tixenuë’? —1 Kor. 15:51-53.

Tro angatr a ceme Iesu matre troa musinëne la itre nöj hnene la sine tö fao. (Hna ama. 2:26, 27)—w20.12, g. 12-13.