Ès ou pa pèd on may adan sé Tou dè Gad la ki sòti an 2020 la ? Si sé sa, gadé si ou ka rivé réponn a sé kèsyon-lasa :

Kijan pou nou aji èvè sé krétyen wen la ?

Nou ka aprésyé fwa a yo ; men nou pa’a pòté-yo anlè. Nou ka rèfizé « flaté moun » (Jid 16, nòt). Nou ké évité pozé-yo kèsyon anrapò èvè èspérans-la yo ni la (w20.01, p. 29).

Poukwa ou pé sèten kè Jéova ka voyé zyé si-w ?

Bib-la ka montré kè Jéova té ja konnèt-vou avan menm ou té sòti an vant a manman-w. Jéova limenm ka kouté tout priyè ou ka fè. I konnèt tousa ou ka pansé, tousa ou ka rèsanti, é lè ou ka fè sa ki byen, sa ka fè-y plézi (1 Kron. 28:9 ; Pwov. 27:11). Sé-y ki fè-w vin owa a-y (w20.02, p. 12).

Kitan pou nou palé é kitan pou nou pa di ayen ?

Nou kontan palé dè Jéova. Si nou ka rann-nou kont kè on moun ka fè on biten ki pé menné-y a fè on péché grav, fò-nou palé ba-y. Si sa nésésè, sé ansyen-la ké ba on moun on konsèy. Si nou ka viv adan on péyi ki ka entèwdi aktivité an nou, nou pé’é fè moun sav kijan aktivité an nou òwganizé. Si nou fè konésans a on pwoklamatè ki ka viv adan on péyi ki ka entèwdi aktivité an nou, nou pé’é pozé-y kèsyon. Nou pé’é rakonté ponmoun on biten nou pa andwa di (w20.03, p. 20-21).

Ka ki vréman diféran ant sé krikèt-la Joèl vwè la é sé krikèt-la Jan palé la ?

Joèl 2:20-29 ka di kè Jéova ka fè sé krikèt-la pati é i ka pwomèt kè i ké réparé tout déga yo fè. Aprésa, Bondyé ka vidé lèspri a-y. Sé biten-lasa réyalizé lè sé Babilonyen-la anvayi péyi a Izrayèl é lè lèspri sen désann asi sé prèmyé krétyen-la. An Révélasyon 9:1-11 sé krikèt-la ka rèprézanté sé krétyen wen la. Yo ka anonsé jijman a Bondyé kont mond méchan lasa èvè onlo kouraj é sa ka jenné sé moun-la ki ka soutyenn mond-lasa toubònman (w20.04, p. 3-6).

Kimoun ki wa di Nò jòdijou ?

Larisi é sé péyi-la ki èvè-y la. Yo ataké pèp a Bondyé pou anpéché-y préché é yo ka montré kè yo hay pèp-lasa toubònman. Wa di Nò la é wa di Sid la anripaj yonn èvè lòt (w20.05, p. 13).

Èskè sé yenki sé 9 kalité-la nou ka touvé an Galat 5:22, 23 ki adan « fwi a lèspri » a Bondyé ?

Non. Lèspri sen a Bondyé ka édé-nou pwodui dòt kalité. Pa ègzanp, i ka édé-nou pwodui lajistis (Éféz. 5:8, 9) (w20.06, p. 17).

Si on moun ka mèt foto a-y é vidéo ki ka palé dè-y asi Entèwnèt, ki pwoblèm sa pé menné ?

Sa ou ka mèt asi Entèwnèt pé ba moun lenprésyon kè ou ka akwè-w é kè ou pa ni imilité (w20.07, p. 6-7).

Ka ègzanp a on maren-péchè pé aprann on moun ki ka fè disip ?

I k’ay péché la pwason-la yé la é a lè-la i ka mòdé-la. I ni sé bon zouti-la é i sav kijan pou i sèvi èvè yo. I ka aji èvè kouraj menm lè sitiyasyon-la rèd. É nou osi, fò nou fè kon-y lè nou ka préché (w20.09, p. 5).

Ka nou pé fè pou édé on étidyan enmé Jéova pi fò ?

Nou pé ankourajé-y li Labib chak jou é nou pé édé-y réfléchi asi sa i ka li. Nou pé aprann-li priyédyé osi (w20.11, p. 4).

Dè kimoun Pòl té ka palé lè i di : « Grasa Kris toutmoun ké wouviv » ? (1 Kor. 15:22).

Lapòt Pòl pa té vé di kè toutmoun té’é résisité. I té ka palé dè sé krétyen wen la. Bondyé fè sé krétyen-lasa vin sen pou ini-yo èvè Jézikris (1 Kor. 1:2 ; 15:18) (w20.12, p. 5-6).

Labib ka di kè sé wen-la ké ‘chanjé fap-fap, adan on batzyé’. Ka yo ké fè lè yo ké an syèl-la ? (1 Kor. 15:51-53).

Yo ké dirijé sé nasyon-la èvè on baton an fè, ansanm èvè Jézikris (Rév. 2:26, 27) (w20.12, p. 12-13).