Nabibbig mu kari tu mapia i isyu ira na Passifusifutan taw nga dagun? Innammu nu matabbag mu yaw ira nga pakkiavu:

Kunnasi tam nakuan tratuan i nazelugan ira?

Appresiattam i pangurugda; ngem, ariattam ira iddan tu sossobra nga atension. Ibita tam i pangidolo ta totolay. (Jud. 16) Ariattam makkiavu tu personal ira nga gannug meyannung ta iddanamada.​—w20.01, p. 29.

Interesadu kari niakan mismu si Jehova?

Ipasingan na Biblia nga kilala naka ngana ni Jehova nige mu paga neyana. Gigginnanna gapa i pakimallo mu ira. Ammuna i nononopammu anna i naddian na futum, anna egga efekto na kukukuammu ta panagenona. (1 Cro. 28:9; Prov. 27:11) Yayya i nangiyaranni nikaw nisa.​—w20.02, p. 12.

Kanni nakuan nga maguvovug anna kanni nakuan nga ari mattannug?

Kakayà tam nga ipakiyuvovug ta tanakuan i meyannung kani Jehova. Maguvovug ittam nu egga i kukukuan na tadday nga marresulta ta madammo nga liwa. Maguvovug i elder ira nu kawagan nga manabarang ira. Ari ittam gapa nga makkiavu (onu mangikagi) tu detalye ira na trabahu tam ta lugar ira nga megamma yatun. Ariattam ikagi ta tanakuan i konfidensial ira nga gannug.​—w20.03, p. 20-21.

Anni ira i nadduman na durun ira ta Joel kapitulo 2 ta durun ira ta Nepakannammu kapitulo 9?

Kagian na Joel 2:20-29 nga pinapanaw na Dios i durun ira anna nipromesana nga itolina i nawawan ira megafu ta panaralda. Kabalin natun, niyaluvu na Dios i espirituna. Natuppal danatun turi ta sinakup na Babilonio ira i Israel anna turi ta tumunug paga ira nga nesimmu tatun. Deskriban na Nepakannammu 9:1-11 i nazelugan ira ta kaggawattam nga negitta ta durun durante nga iproklamada i pamanunnu na Dios kontra taw nga marake nga sistema, yayya nga ari nga makapagimammo danuri massussuporta tatun.​—w20.04, p. 3-6.

Sinni i patul na sigiran ta maddaggun?

I Russia anna i kaalyaduna ira. Pinersigida i totolay na Dios, nigammada i pallayyagayya tam anna ikalussoda i Saksi ira. Makkalaba-laban i patul na sigiran anna i patul na zita.​—w20.05, p. 13.

Danuri laman kari siam nga kualidad ta Galacia 5:22, 23 i aspeto na “vunga na Espiritu”?

Ari. Uuffunan ittam na masanto nga espiritu tapenu mapeggan tu karuan paga nga makasta nga kualidad, gitta na kinatunung. (Efe. 5:8, 9)​—w20.06, p. 17.

Anni i tadday nga peligro na pangipost ta online meyannung ta baggim?

Baka ipasa-pasingan na post mu nga mangipara-parayag ka, ari tu mapakalinno.​—w20.07, p. 6-7.

Anni i magigiammu na ministro ira nga Cristiano ta malalaki ira nga gumaggimmanango?

Tiempuadda nu kanni anna nu sitaw egga i manango. Sanay ira nga mangusa tu mepangngo nga rimienta. Magutu ira nga mattrabahu maski nu manguloli i situasion. Parigattam nakuan gapa yatun ta ministerio tam.​—w20.09, p. 5.

Kunnasi tam nga mas moffunan i Bible study tam ira tapenu mas ayatadda si Jehova?

Pagarammattam ira nga bibbigan i Biblia kadaggaw anna pannonopadda tu mapia i mabibbigda. Tudduattam gapa ira nga makimallo.—w20.11, p. 4.

Sinni i kasali taw: ‘Mapaginnolay i ngamin nga totolay gafu kani Cristo’?​—1 Cor. 15:22.

Ari kinagi ni Pablo nga mapaginnolay i ngamin nga natay nga tolay. Tukuyanna tatun i nazelugan ira nga Cristiano, danuri ‘napili tapenu mabbalin tu masanto nga totolay ta ketaddeda kani Cristo Jesus.’ (1 Cor. 1:2; 15:18)​—w20.12, p. 5-6.

Anni noka i kuan danuri na ‘moli ta kalistu na pakkuridam na mata ta pangurianan nga kapaguni na trumpeta’?​—1 Cor. 15:51-53.

Uffunadda noka si Cristo ta pammagurena ta totolay gukaban na pangusada ta baston nga balayang. (Nep. 2:26, 27)​—w20.12, p. 12-13.