Nanchi mwatanga magazini a katataka a Kyamba kya Usopa nyi? Monai inge mwakonsha kukumbula ano mepuzho:

Twafwainwa kumonanga byepi bashingwa?

Twibasanchila pa lwitabilo lwabo, bino kechi tukizhamo kwibatentemesha ne. Tuchinuzhuka “kukumbwa byubilo bya bantu.” (Yuda 16, tubyambo twa munshi.) Kechi twibepuzha mepuzho pa mambo a lwitabilo lwabo ne.—w20.01, ji. 29.

Ki ka kyakonsha kwimulengela kushiinwa’mba Yehoba wimuta muchima?

Baibolo waamba’mba Yehoba wimuyukile saka mukyangye ne kusemwa. Kabiji umvwa milombelo yenu. Wayuka biji mu muchima wenu, milanguluko yenu, ne byubilo byenu byakonsha kumusangajika nangwa kumufichisha ku muchima. (1 Moba 28:9; Maana 27:11) Yehoba wimukokela ko aji.—w20.02, ji. 12.

Bañanyi bo tufunjilako pa kimye kyo twakonsha kwamba ne kya kubula kwamba?

Tumvwa bulongo kwamba pe Yehoba. Twamba inge twamona mukwetu ubena kuba bintu byakonsha kumulengela kuba bintu byatama. Bakulumpe mu kipwilo bapana lujimuno umvwe kyakebewa. Kechi twamba pa balongo ne banyenga byo bengila mwingilo wetu mu byalo mo bamukanya ne. Kechi tusolola bintu bya bufyamfya ne.—w20.03, ma. 20-21.

Nzhiye yanembwa mu Yoela kitango 2 yapusana byepi na nzhiye yanembwa mu Lumwekesho kitango 9?

Yoela 2:20-29 waamba’mba Lesa wapangijile nzhiye kwalepa kabiji walaile kwibabwezhezha byajiile nzhiye. Panyuma ya bino, Lesa waitulwile mupashi wanji. Bino byafikile kimye bena Babilona kyo balukukile bena Isalela. Lumwekesho 9:1-11 waamba pa bashingwa baji nobe nzhiye mu ano moba babena kusapwila byambo bya luzhachisho ku ino ntanda ibi, kabiji kino kibena kulengela bechina kala na ino tanda kumvwa bibi.—w20.04, ma. 3-6.

Mfumu wa ku kabeta ka buyeke lelo jino ye ñanyi?

Russia ne byalo bikwabo bikitundaika. Balukuka bantu ba Lesa kupichila mu kukanya mwingilo wa kusapwila, ne kumanyika Bakamonyi. Mfumu wa ku buyeke ubena kwikyombesha na mfumu wa ku bulenge.—w20.05, ji. 13.

Nanchi byubilo bitanu na bina byatanchikwa pa Ngalatiya 5:22, 23 byo byonkatu “bipangwa bya mupashi” nyi?

Ine. Mupashi wa Lesa wakonsha kwitukwasha kwikala na byubilo bikwabo byawama, nabiji bololoke. (Efi. 5:8, 9)—w20.06, ji. 17.

Mambo ka o kyatamina kunemba nangwa kubika bipikichala pa Intaneti?

Kunemba byambo nangwa kubika bipikichala pa Intaneti kwakonsha kumwesha’mba muntu witota nangwa wipelula.—w20.07, ma. 6-7.

Bena Kilishitu bakonsha kufunjilako ka ku bakwata masabi?

Baya pa mpunzha pataanwa masabi ne kimye kyo ataainwapo. Bafunda bya kwingijisha bingijisho byafwainwa. Kabiji bachinchika ne kutwajijila kwingila nangwatu inge kwaikala byakatazha. Ne atweba byo byo twafwainwa kuba pa kwingila mwingilo wa kusapwila.—w20.09, ji. 5.

Mu ñanyi mashinda mo twakonsha kukwashisha bantu bafunda Baibolo kubaisha butemwe bo batemwa Yehoba?

Twakonsha kwibatundaika kutanganga Baibolo moba onse ne kulanguluka-languluka pa byo batanga. Kabiji twafwainwa kwibafunjisha bya kulomba.—w20.11, ji. 4.

Bañanyi bavwangwamo mu byambo bya kuba’mba: “Bonse bakasangulwa na mambo a Kilishitu”?—1 Ko. 15:22.

Mutumwa Paulo kechi waambilenga amba bantu bonse basangulwa ne. Waambilenga ku bena Kilishitu bashingwa “bazhijikwa mwi Kilishitu Yesu.” (1 Ko. 1:2; 15:18)—w20.12, ma. 5-6.

Bashingwa bakoba byepi inge ‘baalulwa nobe mu kukopa kwa jiso, kimye kikavuma ntolompita yapelako’?—1 Ko. 15:51-53.

Bakengijila pamo ne Kilishitu mwingilo wa kufunga bantu na kamama ka kapotwe. (Lum. 2:26, 27)—w20.12, ma. 12-13.